နွားထိုးကြီးတွင် ကင်းပတ်ထွက်လာသော စစ်ကောင်စီတပ်ကို မိုင်းဆွဲတိုက်ခို​က်

မန္တလေးတိုင်း၊ နွား​ထိုးကြီးမြို့အနီးတွင် ကင်းပတ်ထွက်လာသော စစ်ကောင်စီတပ်ကို မိုင်းဆွဲတိုက်ခိုက်ရာ စစ်ကောင်စီတပ်သား နှစ်ဦးသေဆုံးကြောင်း မြင်းခြံခရိုင် အမှတ်(၄) တပ်ရင်း နွားထိုးကြီး PDFအဖွဲ့ တာဝန်ခံတစ်ဦးက ပြောသည်။

ယမန်နေ့ (ဖေဖော်ဝါရီ ၉ ရက်) နံနက် ၁၁နာရီဝန်းကျင်က နွားထိုးကြီးမြို့၏ အရှေ့ဘက် (၁)မိုင်ခန့်အကွာတွင် ကင်းပတ်ထွက်လာသော စစ်ကောင်စီတပ်ဖွဲ့ဝင်များလိုက်ပါလာသည့် ယာဥ်ငယ်တစ်စီးအား မိုင်းဆွဲတိုက်ခိုက်ခဲ့ခြင်းဖြစ်ကြောင်း နွားထိုးကြီး PDFအဖွဲ့ တာဝန်ခံက ပြောသည်။

ထိုသို့တိုက်ခိုက်မှုကြောင့် စစ်ကောင်စီတပ်ဖွဲ့ဝင် နှစ်ဦး ပွဲချင်းပြီးသေဆုံးပြီး လေးဦး ပြင်းထန်ဒဏ်ရာရသွားသည်ဟု အထက်ပါတာဝန်ခံက ဆိုသည်။

“ကားကတော့ ထိုးရပ်သွားပါတယ်။”ဟု နွားထိုးကြီး PDF အဖွဲ့ တာဝန်ခံက ပြောသည်။

Public Service Announcement

စစ်ကောင်စီတပ်၏ ထိခိုက်သေဆုံးမှုအခြေအနေကို လူထုနွေဦးက သီးခြားအတည်ပြုနိုင်ခြင်း မရှိသေးပေ။

ဖေဖော်ဝါရီ ၆ ရက် နံနက်ပိုင်းကလည်း နွားထိုးကြီးမြို့နယ်၊ နနွင်းတော်ဘိုးရွာ၊ကူကုန်းကျေးရွာဘက်မှ ပြန်လာသည့် စစ်ကားတစ်စီးကို မြင်းခြံမြို့နယ် သင်ပြွန်းလမ်းခွဲအနီးတွင် မိုင်းဆွဲတိုက်ခိုက်ခဲ့ရာ ကားဘီးပွင့်ပြီး စစ်ကောင်စီတပ်သား သုံးဦးသေဆုံးခဲ့ကြောင်း၊ စစ်အုပ်စုက ရမ်းသမ်းပစ်ခတ်ခဲ့သောကြောင့် ပျိုးကန်ရွာက စျေးသည်တစ်ဦး သေဆုံးခဲ့ကြောင်း မြင်းခြံလူထုလှုပ်ရှားမှုကော်မတီက ထုတ်ပြန်ထားသည်။