ရန်ကုန်မြို့အခြေစိုက် မြေအောက်တော်လှန်ရေးအဖွဲ့တစ်ခုဖြစ်သည့် Myanmar Underground People Defense Force – MUPDF အား စစ်ကောင်စီတပ်က လမ်းပေါ်တွင် လိုက်လံပစ်ခတ်၍ ဖမ်းဆီးရန်လုပ်ဆောင်ခဲ့သော်လည်း ထွက်ပြေးလွတ်မြောက်ခဲ့ကြောင်း MUPDF တာဝန်ခံ ကိုစနေက People’s Spring သို့ ပြောသည်။
ယနေ့(ဖေဖော်ဝါရီ ၂၁)နေ့လယ် ၁ နာရီဝန်းကျင်က ရန်ကုန်မြို့ မြောက်ဥက္ကလာပမြို့နယ် ခြောက်ကွေ့မီးပွိုင့်အနီး ခဲရောင်ပရာဒို(Parado)ကားတစ်စီးအား စစ်ကောင်စီတပ်မှ အင်အား (၅၀)ခန့်ဖြင့် ပိတ်ဆို့ဖမ်းဆီးခဲ့ခြင်းဖြစ်သည်။
ဖြစ်စဥ်မှာ မြို့ပြစစ်ဆင်ရေးအချို့တွင် MUPDF အဖွဲ့အား နည်းပညာနှင့် ပစ္စည်းအကူအညီပေးနေသည့် URF အဖွဲ့မှ ဖောက်ခွဲရေးလုပ်ငန်းသုံးပစ္စည်းများပေးမည်ဟု ဆက်သွယ်လာသောကြောင့် ကားတစ်စီးဖြင့်သွားရောက်ယူဆောင်စဥ် လမ်းခုလတ်၌ အထက်ပါအတိုင်း ပိတ်ဆို့ဖမ်းဆီးခြင်းနှင့် ရင်ဆိုင်ရခြင်းဖြစ်ကြောင်း ကိုစနေက ရှင်းပြသည်။
“ကားကို မီးပွိုင့်မှာပိတ်ပြီး ဖမ်းတာပါ။ (စစ်ကောင်စီတပ်အင်အား)၅၀ လောက်ရှိပါတယ်။ အဆင့်ဆင့်ပိတ်ပြီး ဖမ်းတာ”ဟု MUPDF တပ်ဖွဲ့တာဝန်ခံ ကိုစနေကပြောသည်။
Public Service Announcement
စစ်ကောင်စီတပ်က လိုက်လံပစ်ခတ်သော်လည်း ကားအားမောင်းထွက်ပြေးရာ ကိုစနေနှင့် ရဲဘော်တစ်ဦးထွက် ပြေးလွတ်မြောက်ခဲ့သော်လည်း ယာဥ်မောင်းဖြစ်သူမှာ ကားပေါ်ကဆင်းချိန်မရဘဲ ဖမ်းဆီးခံလိုက်ရသည်ဟုဆိုသည်။
အထက်ပါဖြစ်စဥ်အရ URF ၏ ရန်ကုန်အခြေစိုက်အဖွဲ့မှာ စစ်ကောင်စီဘက်မှ အသွင်ယူထားသူများဖြစ်နိုင် သည်ဟုယူဆရပြီး အကြောင်းမှာ ယနေ့မနက်ပိုင်းက MUPDF ထံ ပစ္စည်းလွှဲပြောင်းပေးခဲ့သူများပါ ဖမ်းဆီးမှုတွင် ပါဝင်နေသည်ကိုတွေ့ရကြောင်း ကိုစနေက ဆက်ပြောသည်။
“မီးပွိုင့်နားမှာ ပစ်တယ်ခတ်တယ်ဆိုတာတော့ ဟုတ်တယ်။ ကားတစ်စီးကိုပစ်တာလား ကားတစ်စီးပေါ်ကနေ စစ်ကားတွေကိုပစ်သွားတာလား သေချာတော့မသိဘူး။ထွက်ပြေးတဲ့ကလေးတွေက ကန်သာယာနားမှာ ကားကို ထားခဲ့တာ”ဟု မြောက်ဥက္ကာပမြို့နယ်မှ ဒေသခံတစ်ဦးကပြောသည်။
ယခုရက်ပိုင်းတွင် စစ်ကောင်စီတပ်က ရန်ကုန်မြို့သို့ PDF တပ်ဖွဲ့ဝင် အင်အား (၅၀၀)ခန့်ရောက်လာနိုင်သည်ဟုဆိုကာ မြောက်ဥက္ကလာပရှိ အောင်မဂ်လာအဝေးပြေးဝင်းအပါအဝင် ရန်ကုန်အဝင်အထွက်များတွင် လုံခြုံရေးတင်းကြပ်ထားပြီး အစစ်အဆေးများလျက်ရှိသည်။
