ထိုင်း-မြန်မာနယ်စပ် ကရင်ပြည်နယ် ဘုရားသုံးဆူမြို့တွင် ယနေ့နံနက်အစောပိုင်း တိုက်ပွဲဖြစ်ပွားနေပြီး လက်နက်ကြီးကြောင့် အဆောက်အဦးတချို့ ထိခိုက်ပျက်စီးသွားခဲ့ကြောင်း နယ်စပ်သတင်းအရင်းအမြစ်များထံမှ သိရသည်။
ယနေ့ ဖေဖေါ်ဝါရီလ(၂၅)ရက် နံနက်(၆)နာရီခွဲအချိန်တွင် ဘုရားသုံးဆူမြို့ စစ်ကောင်စီရဲစခန်းကို အမည်မသိလက်နက်ကိုင်အဖွဲ့တစ်ဖွဲ့က ဝင်ရောက်ပစ်ခတ်ခဲ့ရာမှ တိုက်ပွဲ စတင်ခဲ့ခြင်းဖြစ်သည်။ စစ်ကောင်စီတပ်နှင့် တိုက်ပွဲပြင်းထန်စွာဖြစ်ပွားခဲ့ပြီး မီးခိုးလုံးများလည်း ထွက်ပေါ်နေကြောင်း ထိုင်းနယ်စပ်သတင်းရင်းမြစ်ဖြစ်သည့် ကန်ချနာဘူရီသတင်းစဥ်၏ ဖော်ပြချက်အရ သိရသည်။
တိုက်ပွဲဖြစ်ပွားစဉ်အတွင်း စစ်ကောင်စီတပ်ဘက်က လက်နက်ကြီးများဖြင့် ပြန်လည်ပစ်ခတ်ခဲ့ရာ ဘုရားသုံးဆူမြို့ပေါ်ရှိ နေအိမ်အဆောက်အဦးတချို့ ထိခိုက်ပျက်စီးခဲ့ကြောင်း မြို့ခံများထံမှ သိရသည်။
Public Service Announcement
တိုက်ပွဲကြောင့် ထိခိုက်ဒဏ်ရာရရှိမှုကို မသိရှိရသေးဘဲ တိုက်ပွဲအခြေအနေကြောင့် ထိုင်းနိုင်ငံ စံခရဘူရီဘက်ခြမ်းတွင် ထိုင်းစစ်တပ်က လုံခြုံရေးတိုးမြှင့်ဆောင်ရွက်ထားကြောင်းလည်း သိရသည်။
ဘုရားသုံးဆူမြို့သည် ကေအဲန်ယူ-ကရင်အမျိုးသားအစည်းအရုံး တပ်မဟာ(၆)နယ်မြေတွင်ရှိပြီး စစ်ကောင်စီတပ်က စစ်အုပ်ချုပ်ရေးထုတ်ပြန်ကြေညာထားသည့် မြို့နယ်ထဲတွင်ပါဝင်ကာ ဘုရားသုံးဆူမြို့ အနီးပတ်ဝန်းကျင်ဒေသတွင် စစ်ကောင်စီတပ်မှ ဗုံးကြဲတိုက်ခိုက်မှုများနှင့် တိုက်ပွဲများလည်း မကြာခဏဆိုသလို ဖြစ်ပွားနေသည်။
