ဖားကန့်တွင် မတ်လ၁၈ ရက်တွင် စစ်တပ်တိုက်ခိုက်ခံခဲ့ရသည့် လုံးခင်းကျေးရွာ မျောက်ကုန်းနေရာမှ အိမ်များကို စစ်ကောင်စီတပ်က ဘူဒူဇာဖြင့် ထိုး၍ ဖျက်ဆီးခဲ့ကြောင်း ဖားကန့်မြို့ခံများကပြောသည်။
မျောက်ကုန်းနေရာမှအိမ်များကိုမတ်လ ၁၉ရက် ညနေ ၅ နာရီခန့်မှစတင်၍ စစ်ကောင်စီတပ် အင်အား၁၀၀ ခန့်က ဖျက်ဆီးနေခြင်းဖြစ်ကြောင်း သိရသည်။
“လူတွေကို ထွက်ခိုင်းတယ်။အကုန်ဖြိုချတာ။ အိမ် ၅၀လောက် ဖြိုပြီးနေပြီ။ တိုက်အိမ်တွေလည်းပါတယ်။ ဘယ်သူမှမကပ်ရဲကြဘူး”ဟု မြို့ခံတစ်ဦးကပြောသည်။
မတ်လ ၁၈ရက် ညနေ ၆နာရီခန့်က ဖားကန့်မြို့သို့အဝင် လုံးခင်းကျေးရွာ မျောက်ကုန်းနေရာတွင် ကားပေါ်လိုက်ပါလာသော စစ်ကောင်စီတပ်ကို ကချင်လွတ်လပ်ရေးတပ်မတော်(KIA)နှင့် PDF ပူးပေါင်းတပ်ဖွဲ့က လမ်းမှဖြတ်၍ တိုက်ခိုက်ခဲ့သည်။စစ်ကောင်စီတပ်ဖွဲ့ဝင်သုံးဦး သေဆုံးခဲ့ပြီး စစ်ကောင်စီတပ်ကပစ်သည့် လက်နက်ကြီးကျည်ထိ၍ပြည်သူ၇ ဦးဒဏ်ရာရရှိခဲ့ပြီး ထိုထဲမှခြောက်ဦးသေဆုံးခဲ့သည်။
Public Service Announcement
“သူများဘဝတွေ ပျက်သလို အသေဆိုးနဲ့ ပြန်သေကြပါစေ။ စစ်ခေါင်းဆောင်ကစပြီး သူတို့ တဖွဲ့လုံး မီးလိုပူပါစေ” ဟု ဖားကန့် မြို့ခံတစ်ဦးကပြောသည်။
ယခုရက်ပိုင်းအတွင်း ကချင်ပြည်နယ်တွင် KIA နှင့် စစ်တပ် တိုက်ပွဲများမကြာခဏဖြစ်ပွားနေသည်။
