ခရီးသည်တင်ကားကို မှားယွင်းပစ်ခတ်မိလို့ တနင်္သာရီ ပ.က.ဖ တောင်းပန်

ရန်ကုန် − ကော့သောင်းပြေးဆွဲနေတဲ့ မြတ်မန္တလာထွန်း ခရီးသည်တင်ကားကို မှားယွင်းပစ်ခတ်မိတဲ့အပေါ် တနင်္သာရီမြို့နယ်ပြည်သူ့ကာကွယ်ရေးတပ်ဖွဲ့က အနူးအညွှတ်တောင်းပန်လိုက်ပါတယ်။

ပြီးခဲ့တဲ့စနေနေ့ ဧပြီလ ၁ ရက်ည ၈ နာရီဝန်းကျင်က တနင်္သာရီမြို့နယ်ထဲမှာ ခရီးသည်တင်ကား ပစ်ခတ်ခံရပြီး အသက် ၆ နှစ်အရွယ်မိန်းကလေးငယ်အပါအဝင် ၂ ဦးသေဆုံးကာ ၄ ဦး ထိခိုက်ဒဏ်ရာရခဲ့တာပါ။

တိုက်ပွဲ​တွေဖြစ်​နေတုန်းမှာပြည်ထာင်စုလမ်း​ပေါ် မသွားလာကြဖို့ တနင်္သာရီမြို့နယ်ပြည်သူ့ကာကွယ်ရေးတပ်ဖွဲ့က ဧပြီ ၁ ရက်ည​နေ ၄ နာရီ​ကျော်မှာသတိ​ပေးချက်ထုတ်ပြန်ပြီး​တော့ ည ၈ နာရီခန့်မှအခုဖြစ်ရပ်ဖြစ်ပွားတာပါ။တနသာ်ရီမြို့နယ်​ရေဖြူ​ကျေးရွာကစစ်​ကောင်စီတပ်ဗျူဟာကို PDF ​တွေကတိုက်ခိုက်တာမှာ ကား​တွေ ဖြတ်သန်းသွားလာ​နေလို့​နောက်ဆုတ်ခဲ့ရတဲ့အတွက် တိုက်ပွဲဖြစ်ပွား​နေစဥ်မှာ ပြည်​ထောင်စုလမ်း​ပေါ်လုံးဝ မသွားလာကြဖို့ သတိ​ပေးချက်ထုတ်ခဲ့တာဖြစ်ပါတယ်။

ပစ်ခတ်မှုဖြစ်ပြီး နောက်ရက်မှာပဲ ခရီးသည်တင်ကားကို မှားယွင်းပစ်ခတ်မိတာလို့ တနင်္သာရီမြို့နယ်ပြည်သူ့ကာကွယ်ရေးတပ်ဖွဲ့ စာထုတ်ပြီးတောင်းပန်တာတွေ့ရပါတယ်။

Public Service Announcement

ထိခိုက်သေဆုံးခဲ့ရတဲ့ မိသားစုဝင်တွေအတူ ထပ်တူ ဝမ်းနည်း၊ကြေကွဲရပြီး ကာယကံရှင် မိသားစုတွေကို အနူးအညွှတ်တောင်းပန်တယ်လို့ဆိုထားပါတယ်။

အခင်းဖြစ်ပွားရက်က အဲဒီလမ်းပိုင်းနဲ့ဆက်စပ်နေတဲ့ ထုံခါ − မောတောင်လမ်း မှာ တိုက်ပွဲတွေဖြစ်ခဲ့သလို စစ်ကောင်စီ စစ်ကူတွေလာရောက်မယ်ဆိုတဲ့ သတင်းရထားလို့ စောင့်ဆိုင်းနေကြချိန်လည်းဖြစ်တယ်လို့ ထုတ်ပြန်စာမှာဖော်ပြပါတယ်။

ပစ်ခတ်မှုဖြစ်ပွားချိန်ဟာ အရပ်သားပြည်သူတွေသွားလာချိန်မဟုတ်သလို ကားကို ရပ်ဖို့ သတိပေး ပစ်ခတ်ချိန်မှာ မရပ်တဲ့အတွက် စစ်ကောင်စီတပ်အသွင်ယူသွားလာတယ်လို့ ယူဆပြီး မှားယွင်းပစ်ခတ်မိတာလို့ တနင်္သာရီမြို့နယ်ပြည်သူ့ကာကွယ်ရေးတပ်ဖွဲ့ က ရှင်းလင်းပါတယ်။

ပစ်ခတ်ခံရတဲ့ မြတ်မန္တလာထွန်းကားဟာ ခရီးသွား ၁၆ ဦးလိုက်ပါလာတယ်လို့သိရပြီး အမျိုးသမီး ၁ဦးနဲ့ အသက်၆ နှစ်အရွယ် မိန်းကလေး ၁ ဦးတို့သေဆုံးကာ ဘုန်းကြီး ၂ ပါး၊ ယာဉ်မောင်းနဲ့ ခရီးသွားအမျိုးသားတို့ ထိခိုက်ဒဏ်ရာရခဲ့တယ်လို့သိရပါတယ်။