ကရင်အမျိုးသားအစည်းအရုံး(KNU) တပ်မဟာ(၇)နယ်မြေ၌ ယနေ့ တိုက်ပွဲဖြစ်ပွားခဲ့ရာ စစ်ကောင်စီ လက်အောက်ခံ နယ်ခြားစောင့်တပ်ဖွဲ့(BGF)ကင်းစခန်းငယ်အချို့ကိုတော်လှန်ရေးအဖွဲ့များက သိမ်းပိုက်ဖျက်ဆီးခဲ့ကြောင်း KNU သတင်းရင်းမြစ်က ပြောသည်။
ရွှေကုက္ကိုလ်မြို့ နှင့် ၆ မိုင်အကွာ ရှိထီးကောထောကျေးရွာ အနီး ကရင်အအမျိုးသားလွတ်မြောက်ရေတပ်မတော်(KNLA) ဦးဆောင်သော ပူးပေါင်းတပ်နှင့် စစ်ကောင်စီ၊BGFတပ်တို့ ယနေ့( ဧပြီ ၅ရက် )မနက်တွင် တိုက်ပွဲဖြစ်ပွားခဲ့သည်။ စစ်ကောင်စီ လက်အောက်ခံ BGF ကင်းစခန်း ၂ခုကို တော်လှန်ရေးအင်အားစုများက တိုက်ခိုက်သိမ်းပိုက်ထားသည်ဟု မြေပြင် တပ်မှူးကို ကိုးကားပြီး Salween Press က ဖော်ပြသည်။
KNU သတင်းရင်းမြစ်တစ်ဦးကလည်း “စခန်းသေးသေးလေးပါပဲ။ BGF စခန်းပေါ့။ တပ်မဟာဂွင်ထဲမှာပေါ့။ အာရှလမ်း ဒီဘက်အခြမ်းဆိုတော့ တပ်မဟာ(၇)။ စဖြစ်ကတည်းက ဟိုး ၂၅၊ ၂၆ တုန်းကလည်း တပ်မဟာ(၇) ဂွင်ထဲမှာပဲ။ ညီနောင်မှာဖြစ်တာလည်း တပ်မဟာ(၇) ဂွင်ထဲမှာပဲ။စခန်းတက်သိမ်းတဲ့ သဘောပါပဲ။ ဖျက်ဆီးတဲ့ သဘောပေါ့” ဟု ရှင်းပြသည်။
တိုက်ပွဲ၌ နှစ်ဖက်ထိခိုက်ကျဆုံး အခြေအနေကိုမူ မသိရသေးဟု အထက်ပါသတင်းရင်းမြစ်ကဆက်ပြောသည်။
Public Service Announcement
KNLA ပူးပေါင်းတပ်ဖွဲ့သည် မတ်လ ၂၅ရက်တွင် မြ၀တီ ကုန်သွယ်ရေးဇုန်၊ သင်္ဃန်းညီနောင်၊ ကျုံဒိုး၊ကော့ကရိတ်တို့တွင် စစ်ကောင်စီတပ်များကို တိုက်ခိုက်ခဲ့ရာမှ ယနေ့အထိ တိုက်ပွဲများ ဆက်တိုက်ဖြစ်ပွားလျက်ရှိသည်။
တိုက်ပွဲဖြစ်ပွားနေသဖြင့် ဒေသခံများ ထွက်ပြေးတိမ်းရှောင်နေရကြောင်း Salween Pressက ရုပ်သံမှတ်တမ်းနှင့်အတူ ဖော်ပြသည်။ ယင်းရုပ်သံတွင် ဒေသခံ များစွာ မြစ်ကိုကူးပြီး ဘေးလွတ်ရာသို့ တိမ်းရှောင်နေကြသည်ကို တွေ့ရသည်။
ကရင်အမျိုးသားမီဒီယာကလည်း နယ်စပ်အနီးဖြစ်ပွားခဲ့သည့် တိုက်ပွဲ အခြေအနေ ရုပ်သံမှတ်တမ်းကို ဖော်ပြခဲ့ရာ ပစ်ခတ်သံအချို့ကြားရပြီး အဆောက်အဦ မီးလောင်နေသည်ကို တွေ့ရသည်။
ဧပြီ ၄ ရက်ကလည်း နယ်စပ်တွင် စစ်တပ်နှင့် BGF တို့အဓိကလုပ်ကိုင်ကြသော ဂိမ်ဆိုင်နှင့် လောင်ကစားရုံကိုကော်ဘရာစစ်ကြောင်းမှ တပ်ဖွဲ့ဝင်များကစီးနင်းပြီး ဂိမ်းများကိုဖျက်ဆီးပေးခဲ့သည်ကိုလည်း တွေ့ရသည်။ ရွှေကုက္ကိုလ်ဒေသသည် နယ်ခြားစောင့်တပ်နှင့် စစ်တပ် ခွင့်ပြုချက်ဖြင့် လောင်ကစားလုပ်ငန်းများစွာရှိသောဒေသဖြစ်သည်။
