တနင်္သာရီမြို့မှ ထွက်လာသော စစ်ကောင်စီတပ် ယာဥ်တစ်စီးကို မဟာမိတ်တပ်များနှင့်အတူ ယနေ့နံနက်အစောပိုင်းက ကြားဖြတ်တိုက်ခိုက်ခဲ့ကြောင်း မြိတ်ခရိုင် PDF တပ်ရင်း (၂)မှ တာဝန်ရှိသူတစ်ဦးက People’s Spring သတင်းဌာနသို့ ပြောသည်။
ယနေ့ (ဧပြီ ၉ ရက်)နံနက် ၁ နာရီခွဲခန့်က လယ်တောင်ရွာအနီးတွင် မြိတ်ခရိုင် တပ်ရင်း-၂ တပ်ခွဲ(၂)၊ တနင်္သာရီပျောက်ကျား၊ တနင်္သာရီရိုးမ၊ တောင်ပံနီနှင့် ကျွန်းစု ပ.က.ဖ အဖွဲ့တို့က ကြားဖြတ်တိုက်ခိုက်ခဲ့ခြင်း ဖြစ်သည်။
အဆိုပါ ယာဥ်ပေါ်တွင် အင်အား ၆၀ခန့်လိုက်ပါလာပြီး နှစ်ဖက်အပြန်အလှန်ပစ်ခတ်မှု မိနစ် ၃၀ ခန့်ဖြစ်ပွားခဲ့ရာ စစ်ကောင်စီတပ်ဘက်မှ ထိခိုက်သေဆုံးမှုရှိနိုင်ကြောင်း မြိတ်ခရိုင် တပ်ရင်း (၂)မှ တာဝန်ရှိသူတစ်ဦးက ပြောသည်။
“(တိုက်ပွဲ)မနက်စောစော ပြီးသွားပါပြီခင်ဗျာ။ သူတို့ဘက်က ထိခိုက်မှုတော့ရှိပါတယ်။ အတိ အကျတော့ မသိသေးပါဘူး ခင်ဗျာ”ဟု ၎င်းတာဝန်ရှိသူက People’s Spring သို့ ပြောသည်။
Public Service Announcement
လမ်းတစ်နေရာမှ ကြားဖြတ်တိုက်ခိုက်ခံရပြီးနောက် စစ်ကောင်စီတပ်သားများသည် တနင်္သာရီမြို့နယ်အခြေစိုက် ခမရ (၅၅၈)တပ်ရင်းအတွက်းသို့ ပြန်လည်ဆုတ်ခွာသွားကြောင်း မြိတ်ခရိုင် တပ်ရင်း (၂)က ပြောသည်။
တိုက်ခိုက်မှုအတွင်း တပ်ရင်း (၂)အပါအဝင် ပူးပေါင်းတပ်မှ တော်လှန်ရေးရဲဘော်များ အထိ အခိုက်မရှိ အောင်မြင်စွာဆုတ်ခွာနိုင်ခဲ့ကြောင်း အသိပေးထားသည်။
တိုက်ပွဲများအချိန်မရွေးဖြစ်ပွားလာနိုင်သောကြောင့် တနင်္သာရီမြို့နယ် ထုံခါ – မောတောင်လမ်းပိုင်းကို မတ်လကုန်ထဲက တော်လှန်ရေးတပ်ဖွဲ့များမှ ယာယီပိတ်ထားခဲ့ပြီး ဧပြီ ၁ ရက်နှင့် ၂ ရက်များတွင် စစ်ကောင်စီတပ်နှင့် တော်လှန်ရေးတပ်ဖွဲ့များကြား သိန်းခွန်ရွာအနီးတိုက်ပွဲများဖြစ်ပွားခဲ့သေးသည်။
