ကရင်ပြည်နယ်၊ မြ၀တီမြို့နယ်၊ မဲကနယ်ကျေးရွာမှာ ယနေ့ ဧပြီလ(၁၈)ရက် မနက်ပိုင်းက တော်လှန်ရေးပူးပေါင်းတပ်ဖွဲ့နှင့် စစ်ကောင်စီတပ်တို့အကြား ထိတွေ့မှုဖြစ်ပွားခဲ့ပြီး လက်နက်ခဲယမ်းအချို့ သိမ်းဆည်းရခဲ့သည်ဟု VENOM PDF စစ်ကြောင်းမှ သတင်းထုတ်ပြန်သည်။
ယနေ့ ဧပြီလ(၁၈)က် နံနက်က မဲကနယ်ကျေးရွာတွင် စစ်ကောင်စီတပ်မှ ကေအဲန်ယူ ယူနီဖောင်းများဖြင့် ဝတ်ဆင်အယောင်ဆောင်ပြီး စစ်ကြောင်းထိုးတက်လာခဲ့ရာ ကော်ဘရာစစ်ကြောင်း(၂) VENOM PDF စစ်ကြောင်း ပူးပေါင်းအဖွဲ့နှင့် ထိတွေ့မှုဖြစ်ပွားခဲ့သည်ဟု ထုတ်ပြန်ချက်တွင် ဖော်ပြထားသည်။
” သူတို့(စစ်ကောင်စီ)ဘက်ကနေပြီးတော့မှ KNU ဝတ်စုံတွေနဲ့ ပုံမှားရိုက်ပြီး ထိုးတက်လာတယ်။ တိုက်ပွဲကတော့ အခုချိန်ထိ ဖြစ်နေဆဲပေ့ါ” ဟု VENOM PDF စစ်ကြောင်း၏ ပြန်ကြားရေတာဝန်ခံက ပြောသည်။
ထိတွေ့မှုတိုက်ပွဲအတွင်း စစ်ကောင်စီတပ်ဘက်မှ (၂)ဦးသေဆုံးခဲ့ပြီး လက်နက်(၂)လက်ကို သိမ်းဆည်းရခဲ့ကြောင်း VENOM PDF စစ်ကြောင်း၏ ထုတ်ပြန်ချက်တွင် ဆိုထားသည်။
Public Service Announcement
ကေအဲန်ယူ တပ်မဟာ(၆)နယ်မြေအတွင်းရှိ မဲကနယ်ကျေးရွာတွင် ပြီးခဲ့သည့် မတ်လကုန်ပိုင်း၌ KNLA ပူးပေါင်းအဖွဲ့နှင့် စစ်ကောင်စီတပ် နယ်ခြားစောင့်တပ်(BGF)တို့အကြား ထိတွေ့တိုက်ပွဲများပြင်းထန်စွာ ဖြစ်ပွားခဲ့ပြီး စစ်ကောင်စီတပ်က ကျေးရွာထဲကို လက်နက်ကြီးနှင့် လေယာဉ်များဖြင့် ပစ်ခတ်တိုက်ခိုက်ခဲ့သောကြောင့် ဒေသခံပြည်သူနေအိမ်များ၊ ဘာသာရေးအဆောက်အဦးများ ထိခိုက်ပျက်စီးခဲ့ရသည်။
VENOM PDF စစ်ကြောင်းတစ်ကြောင်းလုံးသည် ပြီးခဲ့သည့် ဧပြီလ(၆)ရက်နေ့တွင် ဗိုလ်ဒါဘောဦးဆောင်သော ကော်ဘရာစစ်ကြောင်းထံ၌ လာရောက်ပူးပေါင်းခဲ့ပြီး ကော်ဘရာစစ်ကြောင်းကို စစ်ကြောင်း(၁)နှင့်စစ်ကြောင်း(၂) ဟူ၍ ပြန်လည်ဖွဲ့စည်းခဲ့ကာ စစ်ကြောင်း(၂)စစ်ကြောင်းမှူးအဖြစ် VENOM PDF စစ်ကြောင်းမှ ဗိုလ်စောဝင်းမြင့်က တာဝန်ယူဆောင်ရွက်ထားသည်။
