စစ်ကောင်စီ၏ အကြမ်းဖက်လုပ်ရပ်များ၊ ဥပဒေ ချိုးဖောက်မှုများ အပေါ် နိုင်ငံတကာအသိုင်းအဝိုင်း အနေဖြင့် အမြန်ဆုံးတားဆီးအရေးယူရန်အကြိမ်ကြိမ် အသိပေးတိုက်တွန်း ခဲ့သော်လည်း နိုင်ငံတကာအသိုင်းအဝိုင်း၏ တုံ့ပြန်ဆောင်ရွက်ချက်များမှာ နှေးကွေး၍ မသိကျိုးကျွန် ပြုနေကြဆဲ ဖြစ်ကြောင်း အမျိုးသားညီညွတ်ရေးအစိုးရအဖွဲ့ ကျန်းမာရေးဝန်ကြီးဌာနက ဧပြီ ၂၈ရက်တွင် ထုတ်ပြန်သည်။
မြန်မာနိုင်ငံတွင် ကျန်းမာရေးဝန်ထမ်းများ၊ ဆေးရုံ/ဆေးခန်းများအပါအဝင် ကျန်းမာရေးကဏ္ဍအပေါ် စစ်ကောင်စီ၏ အကြမ်းဖက်တိုက်ခိုက်မှုများမှာ တစ်နေ့တခြား ပိုမိုဆိုးရွားလာနေခြင်းအား အသိပေးထုတ်ပြန်ရာ၌ အထက်ပါအတိုင်း ဖော်ပြခဲ့သည်။
စစ်ကောင်စီသည် အရပ်သားပြည်သူများကို ကုသပေးနေသည့် ဆေးရုံ၊ဆေးခန်းများအပေါ် လေကြောင်းမှတစ်ဆင့် ဗုံးကြဲတိုက်ခိုက်မှုများ ကို ယခုဧပြီလအတွင်း ရည်ရွယ်ချက်ထား၍ အရှိန်တိုးမြှင့်ကျူးလွန်နေသည်ဟုဆိုသည်။
ဧပြီအတွင်း ကျန်းမာရေးကဏ္ဍအပေါ် စစ်ကောင်စီတပ် တိုက်ခိုက်ခဲ့သည့်စဉ်များမှာ ဧပြီ ၂ရက် က ထီးချိုင့် ညောင်ပင်သာ တိုက်နယ်၊ ဧပြီ ၅ရက် က ရွှေကူမြို့နယ် စီသာတိုက်နယ်ဆေးရုံ၊ ဧပြီ ၇ရက်က ကယား-ရှမ်းနယ်စပ်ရှိ အရေးပေါ် ကယ်ဆယ်ရေး ဆေးအဖွဲ့ နေရာ၊ ဧပြီ ၁၈ရက်တွင် မြိုင်မြို့နယ် မကျည်းကန် ပြည်သူ့ဆေးရုံ၊ ဧပြီ ၂၅ရက်တွင် ရှမ်းတောင် ဖယ်ခုံမြို့နယ် ဆောင်းဖွေး ပြည်သူ့ဆေးရုံ တို့ကို စစ်ကောင်စီတပ်က လေကြောင်းမှ ဗုံးကြဲတိုက်ခိုက်ခြင်းများ လုပ် ဆောင်ခဲ့သည်ဟု ဆိုသည်။ ထို့အပြင် မတ်လ ၂၄ရက်ကလည်း ဒီးမော့ဆိုမြို့နယ် ဒေါတမကြီးဆေးရုံကို လေယာဉ်ဖြင့် ဗုံးကြဲတိုက်ခိုက်ခဲ့သည်။
Public Service Announcement
ထိုသို့ တိုက်ခိုက်မှုများကြောင့် အရပ်သားပြည်သူများ သေဆုံးထိခိုက်မှုများရှိခဲ့သည်။
စစ်ကောင်စီက ထိုကဲ့သို့ ကျန်းမာရေးကဏ္ဍအပေါ် ရည်ရွယ်ချက်ရှိရှိ ပစ်မှတ်ထား၍ အကြမ်းဖက်တိုက်ခိုက်နေခြင်းသည် ဂျီနီဗာကွန်ဗန်းရှင်း (Geneva Conventions) ၊ ကမ္ဘာ့ကုလသမဂ္ဂလုံခြုံရေးကောင်စီ ဆုံးဖြတ်ချက်များ၊ နိုင်ငံတကာဥပဒေများနှင့် ပြည်တွင်း ဥပဒေများကို ပြောင်ပြောင်တင်းတင်း ချိုးဖောက်နေခြင်းဖြစ်ကြောင်း၊ နိုင်ငံတကာအသိုင်းအဝိုင်း အနေဖြင့် အမြန်ဆုံး တားဆီးအရေးယူရန် မိမိတို့အနေဖြင့် အကြိမ်ကြိမ် အသိပေးတိုက်တွန်း ခဲ့သော်လည်း နိုင်ငံတကာအသိုင်းအဝိုင်း၏ တုံ့ပြန်ဆောင်ရွက်ချက်များမှာ နှေးကွေး၍ မသိကျိုးကျွန် ပြုနေကြဆဲ ဖြစ်ကြောင်း ထုတ်ပြန်သည်။
အမျိုးသားညီညွတ်ရေးအစိုးရ၊ ကျန်းမာရေးဝန်ကြီးဌာနအနေဖြင့် စစ်ကောင်စီ၏ အကြမ်းဖက် တိုက်ခိုက်မှုများ ရှိနေသည့်တိုင် ပြည်သူ့ကျန်းမာရေးစောင့်ရှောက်မှုလုပ်ငန်းများကို သူရဲကောင်းကျန်းမာရေးဝန်ထမ်းများ၊ ဒေသခံအဖွဲ့အစည်းများ၊ တိုင်းရင်းသားပြည်သူများ နှင့်လက်တွဲ၍ စွမ်းစွမ်းတမံ ဆက်လက်ဆောင်ရွက်သွားမည်ဖြစ်ကြောင်း အသိပေးဖော်ပြသည်။
