ချင်းပြည်နယ် ဟားခါးမြို့နယ်အခြေစိုက် ချင်းကာကွယ် ရေးတပ်(CDF) – ဆဲန်ထန်(Senthang)၏ ဌာနချုပ်နှင့် တပ်စခန်းတစ်ခုကို စစ်ကောင်စီက ယမန်နေ့ည သန်းခေါင်အချိန်တွင် လေကြောင်းမှ ဗုံးကြဲတိုက်ခိုက်ခဲ့ကြောင်း CDF ဆဲန်ထန် သတင်းရင်းမြစ်က ပြောသည်။
မေလ ၈ရက်တွင် CDF ဆဲန်ထန် ဌာနချုပ်နှင့် တပ်စခန်းကို စစ်ကောင်စီက လေကြောင်းမှ တိုက်ခိုက်ခဲ့ပြီးနောက် ယခု မေလ ၁၀ ရက်ညပိုင်းတွင် ထပ်မံတိုက်ခိုက်လာခြင်းဖြစ်သည်ဟု ဆိုသည်။
” ညတုန်းက စခန်းကတော့ မီးလောင်သွားတယ်။ ဌာနချုပ်ကတော့ အဆောက်အဦး အထိအခိုက်တော့ရှိတယ်။ အရင်ကတည်းက ပစ်ကတည်းက အထိအခိုက် ရှိပြီးသား။ လူထိခိုက်တာတော့မရှိဘူး”ဟု CDF ဆဲန်ထန် သတင်းရင်းမြစ်က ပြောသည်။
မေလ ၈ရက် လေကြောင်းတိုက်ခိုက်ခံရမှုတွင် CDF ဆဲန်ထန် ရဲဘော် နှစ်ဦးကျဆုံးကာ ဒဏ်ရာရသူအချို့ရှိခဲ့သည်။
Public Service Announcement
သို့သော် လေကြောင်း တိုက်ခုက်ခံရ၍ တော်လှန်ရေးအပေါ် စိတ်ပျက်အားလျော့သွားမည်မဟုတ်ဘဲ ခွန်အားပင်ဖြစ်စေသည်ဟု CDF ဆဲန်ထန် သတင်းရင်းမြစ်က ပြောသည်။
“တော်လှန်ရေးမပြီးမချင်း ကျတော်တို့က မလျှော့ဘဲနဲ့ ကျနော်တို့ အဖွဲ့အစည်းအနေနဲ့ ရှေ့ဆက် သွားမယ်။ ပြီးရင် သူတို့ လေကြောင်းအားကိုးနဲ့ ကျနော်တို့ကို အဲဒီလိုမျိုးလုပ်တာ။ ကျနော်တို့အတွက်တော့ ရှေ့ဆက်ဖို့ပဲတွေးထားတယ်။ကျဆုံးသွားတဲ့ ရဲဘော်တွေအတွက် စိတ်မကောင်းတော့ ဖြစ်မိတယ်။ ပြီးရင်သူတို့ လုပ်လာတဲ့ အရာတွေကို ကျနော်တို့ ဆက်လုပ်ဖို့ စိတ်ဓာတ်ပြင်းပြနေပါတယ်။” ဟု ၎င်းက ပြောသည်။
ဟားခါးမြို့နယ်အတွင်း ဧပြီမှစ၍ တိုက်ပွဲများ ဆက်တိုက်ပြင်းထန်လျက်ရှိရာ စစ်ကောင်စီတပ်က အထိနာလျက်ရှိ၍ ဟားခါးမြို့နယ်အပါအဝင် ချင်းပြည်နယ်ရှိ ပြည်သူလူထုများနေထိုင်ရာ နေရာများကို လေကြောင်းမှ ပစ်မှတ်ထား တိုက်ခိုက်မှုများ အရှိန်မြှင့်လုပ်ဆောင်နေသည်။
