ရွေးကောက်ပွဲဒုညွှန်ချုပ်ပစ်သတ်ခံရမှု လူ ၁၀ ဦးကို ရန်ကုန်မှာ စစ်ကောင်စီဖမ်းဆီး

ရွေးကောက်ပွဲကော်မရှင် ရဲ့ ဒုတိယညွှန်ကြားရေးမှူးချုပ် ဦးစိုင်းကျော်သူပစ်သတ်ခံရမှုနဲ့ပတ်သက်ပြီး ရန်ကုန်မှာလူငယ်အချို့အပါအဝင် ၁၀ ဦးကိုဖမ်းမိထားတယ်လို့ စစ်ကောင်စီက မနေ့ မေလ ၂၀ က ကြေညာပါတယ်။

ဦးစိုင်းကျော်သူ ပစ်သတ်ခံရပြီး ရက်သတ္တပတ် ၃ ပတ်ကျော်အကြာမှာ စမ်းချောင်း၊ တောင်ဒဂုံ၊ မြောက်ဥက္ကလာ ၊ကမာရွတ် ၊ ဒလ ၊ ရွှေပြည်သာမြို့နယ်တွေထဲက လူ ၁၀ ဦးကို စစ်ကောင်စီက ဖမ်းဆီးတာပါ။

စစ်ကောင်စီရဲ့ သတင်းထုတ်ပြန်ချက်အရ တစ်ဦးချင်စီဖမ်းမိတာဖြစ်ပြီး ပစ္စတို ၂ လက် သိမ်းဆည်းရမိတယ်လို့သိရပါတယ်။

သူတို့ ၁၀ ဦးဟာ Yangon Revolution Force-YRF အဖွဲ့ဝင်တွေဖြစ်တယ်လို့လည်း စစ်ကောင်စီက စွပ်စွဲထားပါတယ်။

Public Service Announcement

YRF ဘက်ကတော့ တစုံတရာထုတ်ပြန်တာမတွေ့ရသေးပါဘူး။

စစ်ကောင်စီရဲ့ ရွေးကောက်ပွဲ ဒုညွှန်ချုပ် ဦးစိုင်းကျော်သူဟာ ပြီခဲ့တဲ့ ဧပြီလ ၂၂ ရက်က ရန်ကုန်မြို့ ၊သင်္ဃန်းကျွန်းမြို့နယ်က အောင်ရတနာဆေးရုံအနီးမှာ ကားမောင်းနေရင်း ပစ်ခတ်ခံရတာပါ။

ပစ်ခတ်မှု CCTV မှတ်တမ်းအရ စက်ဘီးစီး အမျိုးသား ၂ ဦးက ကားပေါ်မှာရှိတဲ့ ဦးစိုင်းကျော်သူကို ပစ္စတိုနဲ့ ပစ်ခတ်တာတွေ့ရပါတယ်။

အဲဒီပစ်ခတ်မှုကို For the Yangon အမည်ရ မြို့ပြပြောက်ကျားတပ်ဖွဲ့က ဆောင်ရွက်ခဲ့တာလို့ NUG အစိုးရ ရဲ့ ရန်ကုန်တိုင်း စစ်ဒေသ ကွပ်ကဲရေးတာဝန်ခံ ကမီဒီယာကို အတည်ပြုထားတာရှိပါတယ်။