ကချင်ပြည်နယ် ဖားကန့်မြို့နယ်မှ တနိုင်းမြို့နယ်သို့ ဦးတည် စစ်ကြောင်းထိုးလာသည့် စစ်ကောင်စီတပ်များက ဒေသခံပြည်သူများအား လူသားဒိုင်းအဖြစ် ဖမ်းဆီးခေါ်ဆောင်မှုများ ရှိနေကြောင်း တနိုင်းလီဒိုလမ်း၌ နေထိုင်သည့် ဒေသခံက ပြောသည်။
ပြီးခဲ့သည့် ရက်ပိုင်းအတွင်း အင်အား ၇၀မှ ၈၀ အကြားရှိသည့် စစ်ကောင်စီတပ်သည် ဖားကန့် လဝါးမှ တနိုင်းမြို့ဘက်သို့ လီဒိုလမ်းနှင့် လမ်းဘေးဝဲယာလမ်းများကို အသုံးပြုပြီး ခြေလျင်စစ်ကြောင်းထိုးလာခြင်းဖြစ်သည်ဟု ဆိုသည်။
“ထူးခြားတာ ပစ်ခတ်တာတော့မရှိဘူး။ စစ်ကြောင်းတက်တာတော့ ရှိတယ်။ ဖားကန့်ဘက်ကနေလာတယ်။ ဖားကန့်ကနေ လဝါး၊ လဝါးကနေ လမ်းလျှောက်တက်လာတယ်။ သူတို့က တွေ့တဲ့သူ ကလေးရော ကိုယ်ဝန်နဲ့ မိခင်တွေရော၊ လူကြီးသက်ကြီးပိုင်းရောတွေ့တဲ့ဟာ အကုန်လုံး လမ်းမှာတို့ လယ်သွားတဲ့ တောင်ယာတွေမှာ ဖမ်းခေါ်ခေါ်သွားတယ်။ ဖမ်းခေါ်ပြီးမှ တစ်ရွာဝင် တစ်ရွာထွက်ပေါ့။ အဲဒီတစ်ရွာ ပြန်ရောက်ရင် ပြန်လွှတ်ပေးတယ်။ ဟိုရွာရောက်ရင် ဟိုရွာ အဲဒီကြားက လူတွေတွေ့ရင်တော့ ခေါ်သွားတယ်” ဟု ဒေသခံက ပြောသည်။
ယခင်က အဆိုပါဒေသ၌ စစ်ကောင်စီတပ် စစ်ကြောင်းများ လှုပ်ရှားပါက ကချင်လွတ်လပ်ရေးတပ်မတော်(KIA)က ကြားဖြတ်တိုက်ခိုက်မှုများလုပ်ဆောင်ခဲ့၍ စစ်ကောင်စီတပ် သေဆုံးထိခိုက်မှုများပြားခဲ့သည်။ ယခုနောက်ပိုင်းတွင် စစ်ကောင်စီတပ်က ကချင်ဒေသ၌ စစ်ရေးလှုပ်ရှားရာတွင် ဒေသခံပြည်သူများကို ဖမ်းဆီးပြီးလူသားဒိုင်းအဖြစ် အသုံးပြုခြင်းများ မကြာခဏ ပြုလုပ်လျက်ရှိသည်။
Public Service Announcement
“အရပ်သားတွေကို ခေါ်သွားတယ်ဆိုတာ ဒါ ပေါ်တာ သဘောဆောင်တာရယ် နောက်ပြီးတော့မှ လူသားတံတိုင်းအဖြစ်ပေါ့။ သူတို့က ရွာသားတွေ ပါရင် KIA ဘက်က မပစ်ဘူးဆိုတဲ့ ပုံစံမျိုးနဲ့ လုပ်တာထင်တယ်” ဟု ဒေသခံက ပြောသည်။
တနိုင်းဒေသ အပါအဝင် ကချင်ဒေသ စစ်ရေးအခြေအနေများကို မေးမြန်းရန် KIA သတင်းနှင့် ပြန်ကြားရေးဌာန တာဝန်ခံ ဗိုလ်မှူးကြီးနော်ဘူထံသို့ ဆက်သွယ်ရာ အဆက်အသွယ်မရသေးပေ။
စစ်ကောင်စီတပ်သည် မေလ ၁၇ရက်က ဖားကန့်မြို့နယ်၊ နန့်ယားကျေးရွာနှင့် ခင်တောင်ကျေးရွာကို ဝင်ရောက်စီးနင်းပြီး ဒေသခံ ပြည်သူ ၄၀ ခန့်ကို လူသားဒိုင်းအဖြစ် ဖမ်းဆီးခေါ်ဆောင်သွားခဲ့သည်။
ထို့အပြင် ဧပြီ ၂၆ ရက်ကလည်း ဖားကန့်မြို့နယ်၊မဇွပ်ယန်နှင့် ဆန်ခါ ကျေးရွာ ၂ရွာ ပြည်သူ ၁၀၀ ခန့် ကိုလည်းစစ်ကောင်စီတပ် လူသားဒိုင်းအဖြစ်အသုံးပြုရန်ဖမ်းဆီးခဲ့သေးကြောင်း ဒေသခံများပြောသည်။
