မန္တလေးတိုင်း၊ မိတ္ထီလာမြို့ပေါ်တွင် ငါးရက်အတွင်း ဓားခုတ်ဓားထိုးမှု သုံးကြိမ် ဖြစ်ပွားခဲ့ပြီး အမျိုးသားတစ်ဦးသေဆုံးခဲ့ကြောင်း ဒေသခံများက ပြောသည်။
ပြီးခဲ့သည့် မေလ ၂၂ ရက် ည ၁၁နာရီခွဲခန့်က မိတ္ထီလာမြို့ ပထမလမ်းမတော်တွင် အမျိုးသားနှစ်ဦးစီးလာသော ဆိုင်ကယ်အား ဆိုင်ကယ်တစ်စီးက ဘေးချင်းကပ်၍ လိုက်လာပြီး ဓားဖြင့် ထိုးသွားခဲ့ကြောင်း၊ ဆိုင်ကယ်လဲသွားပြီး အထိုးခံရသူမှာ နေရာတွင်သေဆုံးကာ ကျန်တစ်ဦးမှာ ပွန်းပဲ့ဒဏ်ရာများရရှိခဲ့ကြောင်း မိတ္ထီလာမြို့ခံများက ပြောသည်။
“သုံးယောက် တစ်ယောက်ကိုချုပ်ပြီး နှလုံးနေရာတည့်တည့်ကို အချွန်နဲ့ ထိုးသွားတာ။”ဟု မြို့ခံတစ်ဦးက ပြောသည်။
မေလ ၂၂ ရက်ကပင် နေ့လည်၂ နာရီခန့်က မိတ္ထီလာမြို့၊ ကျွဲတလင်းအုပ်စု ကမ္မကျေးရွာရှိ အိမ်တစ်အိမ်သို့ အမျိုးသားတစ်ဦးဝင်ရောက်လာပြီး အမျိုးသမီးအား ဓားဖြင့်ခုတ်ခဲ့ကြောင်း၊ အဆိုပါ အမျိုးသမီးမှာ ဦးခေါင်းတွင်တစ်ချက်အခုတ်ခံရပြီး လက်များလည်းပြတ်ရှဒဏ်ရာများရရှိခဲ့ကြောင်း ဒေသခံများက ပြောသည်။
Public Service Announcement
အလားတူ မေလ ၁၈ ရက် ည ၇ နာရီခန့်ကလည်း မိတ္ထီလာမြို့ရှောင်လမ်း၊ သပြေဝရွာအနီး တွင် ဓားခုတ်မှုဖြစ်ပွားခဲ့ရာ လူသုံးဦး ဒဏ်ရာများရရှိသွားခဲ့ကြောင်း မြို့ခံများက ပြောသည်။
မိတ္ထီလာမြို့တွင် အာဏာသိမ်းပြီးနောက် ခိုးဆိုးလုယက် ရိုက်နှက်မှုများ ပေါများနေ၍ သတိထားသွားလာနေရကြောင်း မြို့ခံများက ပြောသည်။
“ထီလာက အိမ်ထဲမှာပဲ နေတာကောင်းတယ်။”ဟု မြို့ခံတစ်ဦးက ဆိုသည်။
မိတ္ထီလာမြို့သည် စစ်ကောင်စီ၏ လေတပ်စခန်းအပါအဝင် စစ်တပ်စခန်းအများအပြားရှိရာ မြို့တစ်မြို့ဖြစ်သော်လည်း အာဏာသိမ်းကာလအတွင်း ခိုးဆိုးလုယက်ရိုက်နှက်မှုများ ပိုမိုများပြားလာကြောင်း ဒေသခံများက ပြောသည်။
