မန္တလေးတိုင်း၊ မြင်းခြံအကျဥ်းထောင်မှ နိုင်ငံရေးအကျဥ်းသား ၄ ဦးကိုစစ်ကောင်စီက ထပ်မံခေါ်ထုတ်သွားကြောင်း နိုင်ငံရေးတက်ကြွလှုပ်ရှားသူများက ပြောသည်။
မေလ ၂၁ ရက်နေ့ နှင့် ၂၂ ရက်နေ့များက မြင်းခြံအကျဥ်းထောင်မှ နိုင်ငံရေးအကျဥ်းသား ၇ ဦးအား ခေါ်ထုတ်သွားပြီးနောက် ကိုဥက္ကာဆိုသူ ကျဆုံးခဲ့သည်။
ထို့နောက် ယမန်နေ့ (မေလ ၂၃ ရက်နေ့)တွင် မြင်းခြံအကျဥ်းထောင်ရှိ မန္တလေးမှ ကိုမင်းရဲထွေး(ခ)ကိုမင်းသွေးနှင့် ကိုကျော်စိုးတင့်၊ မြင်းခြံမှ ကိုဇော်လှိုင်းနှင့် ကိုစိုးရာဇာတို့ကိုပါ ထပ်မံခေါ်ထုတ်သွားကြောင်း မုံရွာစီးပွားရေးတက္ကသိုလ် ကျောင်းသားများသမဂ္ဂ ဥက္ကဌ၊ မုံရွာလူထုသပိတ်တိုက်ပွဲဦးဆောင်ကော်မတီအဖွဲ့ဝင် ကိုရှင်းသန့်က ပြောကြားသည်။
“ထောင်ပိုင်ရုံးခန်းထဲမှာပဲ စစ်ဆေးနေတယ်လို့သိရတယ်။ ကိုဥက္ကာရဲ့ရုပ်အလောင်းကို ထုတ်သွားတာတော့ မတွေ့ရသေးဘူးလို့ကြားတယ်။ ထောင်ဝင်စာပို့တာတွေ စစ်ဆေးတာတွေ အရမ်းကြမ်းနေတယ်လို့ သိရတယ်။ အဝင်အထွက်တွေကိုလည်း အရမ်းစစ်နေပြီး ရှေ့နေတွေနဲ့တွေ့ခွင့်မပေးဘူးလို့ ကြားထားတယ်။”ဟု ကိုရှင်းသန့်က ပြောသည်။
Public Service Announcement
ယခင်ခေါ်ထုတ်သွားသူများမှာ တောင်သာမြို့နယ်မှ ကိုကျော်မင်းနိုင်နှင့် ကိုသက်မောင်မောင်၊မန္တလေးမှ ကိုကျော်မျိုးတင့်နှင့် ကိုဇော်ဇော်အောင်၊ မုံရွာမှ ကိုဥက္ကာ၊ ကိုကျော်ဇင်ဦးနှင့် ကိုအောင်မျိုးသန့်တို့ဖြစ်ပြီး ကိုဥက္ကာမှာ ရိုက်နှက်စစ်ဆေးခံရကာ ကျဆုံးသွားသည်ဟု မုံရွာလူထုသပိတ်တိုက်ပွဲဦးဆောင်ကော်မတီက ပြောသည်။
မြင်းခြံထောင်အတွင်းမှ ခေါ်ထုတ်သွားသူများအနက် ကိုကျော်ဇင်ဦး(မြင်းခြံ)ကို မေလ ၂၂ ရက်နေ့ ညနေပိုင်းတွင် ထောင်တွင်းသို့ ပြန်လာပို့သွားကြောင်း မြင်းခြံလူထုလှုပ်ရှားမှုကော်မတီက အသိပေးသည်။
ထိုသို့ခေါ်ဆောင်မှုများအား နိုင်ငံရေးအကျဉ်းသားများက အိပ်ဆောင်မှူးနှင့် ထောင်ပိုင်အား မေးမြန်းခဲ့သော်လည်း အကြောင်းပြန်မှုမရှိကြောင်း သိရသည်။
ပြည်သူများအနေဖြင့် မြင်းခြံထောင်တွင်းသတင်းများအား ဆက်လက်စောင့်ကြည့်ပေးပြီး လိုအပ်သည်များဝန်းရံပေးရန် မုံရွာလူထုသပိတ်တိုက်ပွဲဦးဆောင်ကော်မတီတောင်းဆိုထားသည်။
ထိုဖြစ်စဥ် ဖြစ်ပွားပြီးနောက် မြင်းခြံထောင်အတွင်းတွင် အိပ်ဆောင်များအား တန်းဖွင့်ပေးထားခြင်းမရှိဘဲ အကျဉ်းသားများကို အဆောင်ထဲတွင် သော့ခတ်ပိတ်ထားကာ စစ်သားနှင့် ရဲများလည်း အုတ်ရိုးအတွင်းတွင် တပ်စွဲခဲ့သည်။
မြင်းခြံအကျဥ်းထောင်သို့ မန္တလေး၊ မုံရွာ၊ ပခုက္ကူနယ်များမှ နိုင်ငံရေးအကျဥ်းသားများအား ယမန်နှစ်အတွင်းက ပြောင်းရွှေ့ချထားခဲ့ပြီး အကြမ်းဖက် ဖိနှိပ်ရိုက်နှက်ခြင်း၊ သံခြေကျင်းမဖြုတ် ပေးဘဲ အလုပ်ကြမ်းများ အဓမ္မခိုင်းခြင်း ပြုလုပ်ခဲ့သည်။
