မြန်မာနိုင်ငံအလယ်ပိုင်းဒေသပါဝင်တဲ့ အမှတ် (၁) စစ်ဒေသမှာ ပြီးခဲ့တဲ့ မတ်လအတွင်း စစ်ကောင်စီတပ်နဲ့ တိုက်ပွဲ ၄၀၀ ကျော်ဖြစ်ပွားခဲ့တယ်လို့ NUG အစိုးရရဲ့ ကာကွယ်ရေးဝန်ကြီးဌာနက စစ်ရေးသတင်းထုတ်ပြန်ပါတယ်။
အမှတ် ( ၁) စစ်ဒေသမှာ မန္တလေးတိုင်း ၊မကွေးတိုင်း ၊စစ်ကိုင်းတိုင်း နဲ့ ရှမ်းပြည် မြောက်ပိုင်းတို့ပါဝင်တယ်လို့သိရပါတယ်။
မတ်လအတွင်း အဲဒီဒေသမှာ စစ်ကောင်စီတပ်နဲ့ ထိတွေ့ တိုက်ပွဲဖြစ်တာ ၊ စစ်ကောင်စီတပ်ဖွဲ့ဝင်တွေကို သွားရောက်ပစ်ခတ် တာ ၊ ဒရုန်းသုံးပြီး ဗုံးချတာ ၊ မိုင်းဆွဲတာ ၊စစ်ကောင်စီ ရဲ့လေကြောင်းတိုက်ခိုက်မှု တွေ ကို NUG ကာကွယ်ရေးဝန်ကြီးဌာနရဲ့စစ်ရေးသတင်းမှာ တွေ့ရပါတယ်။
ထိတွေ့တိုက်ပွဲဖြစ်တာ ၁၃၇ ကြိမ် ၊ မိုင်းဆွဲတာ. ၁၁၈ ကြိမ် ၊ ဒရုန်းသုံးပြီး တိုက်ခိုက်တာ ၄၅ ကြိမ် ၊ သွားရောက်ပစ်ခတ်တာ ၁၂၅ ကြိမ်ရှိပြီး စစ်ကောင်စီရဲ့လေကြောင်းတိုက်ခိုက်မှုဟာ ၁၂ ကြိမ်ရှိခဲ့တယ်လို့ NUG ရဲ့စာရင်းအရသိရပါတယ်။
Public Service Announcement
မတ်လအတွင်း ၂ ဖက် အကျအဆုံးရှိခဲ့ပါတယ်။ NUG ရဲ့စာရင်းအရတော့ စစ်ကောင်စီဖက်က ၆၀၀ ကျော်သေဆုံးပြီး ၇၀၀ ထိခိုက်ဒဏ်ရာရသလို PDF တွေဘက်ကလည်း ၆၀ ကျဆုံးပြီး ၉၀ ကျော် ဒဏ်ရာရတယ်လို့ သိရပါတယ်။
တိုက်ပွဲတွေကို PDF ၊ ပြည်သူ့ကာကွယ်ရေးအဖွဲ့ (ပ.က.ဖ) တွေနဲ့ တိုင်းရင်းသားလက်နက်ကိုင်အဖွဲ့အစည်းတွေ ပူးပေါင်းဆင်နွှဲကြတာလို့ NUG က ဆိုထားပါတယ်။
စစ်ကောင်စီဘက်ကတော့ အကျအဆုံးထိခိုက်မှုတွေ စာရင်းထုတ်ပြန်တာမရှိပါဘူး။
