ရေမော်တော်ယာဥ်များကိုပါ စစ်အုပ်စု မီးတင်ရှို့နေ
မကွေးတိုင်း၊ ရေစကြိုမြို့နယ်ရှိ ရေလယ်ကျွန်းဒေသကို စစ်ကောင်စီတပ်က သုံးရက်မြောက် စစ်ကြောင်းထိုး မီးရှို့နေပြီး စစ်ဘေးရှောင်ပြည်သူ နှစ်ဦးကိုလည်း ပစ်ခတ်သတ်ဖြတ်သွားကြောင်း ဒေသတွင်းသတင်းရင်းမြစ်များက ပြောသည်။
ယနေ့ (မေလ ၂၈ ရက်) နံနက် ၆ နာရီခန့်မှစတင်ကာ စစ်ကောင်စီတပ်သည် ချင်းယားရွာ၊ မိုးကွဲရွာ၊ မိုးဖြူရွာတို့အား မီးရှို့ဖျက်ဆီးခဲ့ကြောင်း၊ ထို့နောက် အခြားစစ်ကြောင်းတစ်ကြောင်းသည် ကူနီနှင့် ရေယှားကျေးရွာကြားရှိ စစ်ဘေးရှောင် ၂၀၀ ခန့် တိမ်းရှောင်နေသောနေရာသို့ ပစ်ခတ်ဝင်ရောက်ကာ စစ်ဘေးရှောင် အမျိုးသား နှစ်ဦးအား ပစ်သတ်ခဲ့ပြီး ပစ်ခတ်မှုကြောင့် အမျိုးသမီးအချို့လည်း ကျည်ထိမှန်ခဲ့ကြောင်း ဒေသတွင်းသတင်းရင်းမြစ်များက ပြောသည်။
“သေနတ်မှန်ထားတဲ့ အမျိုးသမီးတွေနဲ့ တခြားဓားစာခံပြည်သူအမျိုးသမီးများကို ဖမ်းဆီးခေါ်သွားတယ်လို့ သိရပါတယ်။”ဟု yay lal kyun news အဖွဲ့ တာဝန်ရှိသူက ပြောသည်။
ထို့အပြင် စစ်ကောင်စီတပ်သည် နန်းဦးကျေးရွာအား မီးရှို့ဖျက်ဆီးသွားသည့်အပြင် ကျေးရွာအနီးရေပြင်နှင့် ဆိပ်ကမ်း၌ ရပ်ထားသော မော်တော်ယာဥ် ၁၅စီးခန့်ကိုပါ မီးရှို့ဖျက်ဆီးသွားကြောင်း သိရသည်။
Public Service Announcement
ရေယှားရွာအတွင်းမှ စစ်ကောင်စိတပ် စစ်ကြောင်းသည် စစ်ရှောင်များ၏ ဆိုင်ကယ် ၁၅စီးနှင့် ဓားစာခံ ပြည်သူများခေါ်ဆောင်ကာ နေရင်းရွာနှင့် မင်းရွာသို့ နှစ်ဖွဲ့ခွဲ၍ ဝင်ရောက်နေကြောင်း ဒေသခံများက ပြောသည်။
ပြီးခဲ့သည့် ဖေဖော်ဝါရီ ၂၆ ရက်ကလည်း ရေစကြိုမြို့နယ် ရေလယ်ကျွန်းဒေသသို့ စစ်ကြောင်း လေးခုထက်မနည်းထိုးနေသော စစ်ကောင်စီတပ်သည် နှစ်ရက်အတွင်း ကျေးရွာ ၁၅ ရွာထက်မနည်း မီးရှို့ဖျက်ဆီးခဲ့သည်။
ထို့အပြင် ကျေးရွာပေါင်း ၃၀ခန့်မှ ဒေသခံပြည်သူထောင်နှင့်ချီ ထွက်ပြေးတိမ်းရှောင်နေရပြီး အမျိုးသမီးတစ်ဦးသေဆုံးကာ ကလေးငယ်တစ်ဦး ထိခိုက်ဒဏ်ရာရရှိခဲ့သည်။
ရေစကြိုမြို့နယ်ရှိ ရေလယ်ကျွန်းဒေသသည် စစ်အာဏာရှင်ဆန့်ကျင်တော်လှန်မှုအားကောင်းရာဒေသဖြစ်ပြီး ကျေးရွာအများအပြား မီးရှို့ဖျက်ဆီးခံခဲ့ရကာ ပြည်သူအများအပြားလည်း ဖမ်းဆီးသတ်ဖြတ်ခံခဲ့ရသည်။
