မြန်မာနိုင်ငံအတွင်း သံနှင့် သံမဏီတင်သွင်းရာတွင် အမေရိကန်ဒေါ်လာအစား တရုတ်ယွမ်ငွေပြောင်းလဲသုံးစွဲပါက လိုင်စင်ချဦးစားပေးချထားပေးမည်ဖြစ်ကြောင်း မြန်မာနိုင်ငံ သံနှင့် သံမဏီအသင်းက ထုတ်ပြန်သည်။
ပြည်တွင်းသို့ သံနှင့် သံမဏီတင်သွင်းရာတွင်ယခင်အဒေါ်လာတစ်မျိုးတည်းသာ သုံးစွဲခဲ့ပြီး ၂၀၂၃တွင် ဒေါ်လာအစား တရုတ်ယွမ်ငွေကို ပြောင်းလဲသုံးစွဲရန် စစ်ကောင်စီထိန်းချုပ်ထားသည့် ကုန်သွယ်ရေးဦးစီးဌာန အထက်ပါအသင်းကို အကြောင်းကြားခဲ့ခြင်းဖြစ်သည်ဟု ထုတ်ပြန်ချက်တွင်ဖော်ပြထားသည်။
လက်ရှိ ကုမ္ပဏီများအနေဖြင့် ဒေါ်လာဖြင့်လိုင်စင်တင်ထားပါကလည်း ညီမျှသည့် တရုတ်ယွမ်ငွေကိုပြောင်းလဲပြင်ဆင်ပြီး လိုင်စင်တင်နိုင်သည်ဟုအသင်းကဆိုသည်။
“ဒေါ်လာရှားလာတဲ့အချိန်မှာတရုတ်ယွမ်ပေးသုံးတော့ပစ္စည်းတင်သွင်းတာကော၊ဖြန့်ဖြူးတာကော အဆင်ပြေနိုင်တယ်”ဟု သံမဏီလုပ်ငန်းရှင်တစ်ဦးပြောသည်။
Public Service Announcement
ယခု အစီအစဉ်သည်စစ်တပ်အာဏာသိမ်းပြီးနောက် တရုတ်နိုင်ငံအပေါ်အလွန်အကျုးမှီခိုမှုကိုပြသနေခြင်းဖြစ်ပြီးတရုတ်လုပ်ငန်းရှင်များက ၎င်းတို့စီမံကိန်းများအတွက် မြန်မာပြည်တွင် ဒေါ်လာမသုံးလို၍ တရုတ်ယွမ်ငွေကို တိုက်ရိုက်သုံးစွဲရန် စစ်ကောင်စီက လိုက်လျောပေးခြင်းဖြစ်သည်ဟု စီးပွားရေးလုပ်ငန်းရှင်တစ်ဦးက သုံးသပ်ပြောကြားသည်။
စစ်အုပ်စုအာဏာသိမ်းပြီးနောက်ပိုင်း အမေရီကန်အစိုးရက စစ်ကောင်စီကို ဒဏ်ခပ်အရေးယူပိတ်ဆို့မှုပြုလုပ်ခြင်း ၊နိုင်ငံတကာလုပ်ငန်းများထွက်ခွာသွားခြင်း၊ပြည်ပရင်းနှီးမြှုပ်နှံမှုလျော့ကျလာခြင်း ၊ပြည်တွင်းစီးပွားရေးကျဆင်းကာ စစ်ကောင်စီနှင့်ဘဏ်များအပေါ်ပြည်သူများယုံကြည်မှု မရှိတော့ခြင်းကြောင့်ကျပ်ငွေတန်ဖို့စံချိန်တင်ကျဆင်းခြင်း ၊စစ်တပ်က ပြည်သူများကို ဒေါ်လာကိုင်ဆောင်ခွင့်ပိတ်ပင်ခြင်း စသည်တို့ကြောင့် ပြည်တွင်းဈေးကွက်၌ဒေါ်လာရှားပါးခဲ့သည်။စစ်တပ်က ဒေါ်လာဈေးမတက်စေရန်ကိုင်ဆောင်ခွင့်နှင့်ရောင်းဝယ်ခွင့်ကိုတင်းကြပ်စွာထိန်းချုပ်ကန့်သပ်ထားသော်လည်း ဒေါ်လာဈေးမှာ မကြာခဏမြင့်တက်လေ့ရှိပြီး ယခုအခါ တစ်ဒေါ်လာလျှင် ကျပ် ၃၀၀၀ ကျော်ဈေးပေါက်သည်။
ပြည်သူများကို ဒေါ်လာကိုင်ဆောင်ခွင့်မပြုသော်လည်းစစ်တပ်က လက်နက်ဝယ်ယူရန်နှင့် လေယာဥ်ဆီအပါအဝင်စက်သုံဆီဝယ်ယူရန် ဒေါ်လာကို ရသမျှ သိမ်းယူနေသည်ဟုလုပ်ငန်းရှင်များကပြောသည်။စစ်တပ်က အာဏာသိမ်းပြီးနောက် ၂ နှစ်အတွင်း ရုရှား ၊တရုတ် ၊အိန္ဒိယ၊ထိုင်း၊စင်ကာပူအပါအဝင်နိုင်ငံတကာမှ လက်နက်မျိုးစုံ ဒေါ်လာ ၁ ဘီလီယံ(ဒေါ်လာ သန်း ၁၀၀၀ )ကျော်ဖိုးဝယ်ယူခဲ့သည်။
မြန်မာနိုင်ငံတွင် နှစ်စဉ် သံနှင့် သံမဏီများကိုတန်ချိန် ၃ သန်းခန့်တင်သွင်းရပြီး ပြည်တွင်း သုံးစွဲမှု ၉၂ ရာခိုင်နှုန်းရှိသည်ဟု သံနှင့် သံမဏီအသင်းကဆိုသည်။
သံနှင့် သံမဏီတင်သွင်းမှုကို တရုတ်နိုင်ငံမှအများဆုံးတွင်သွင်းပြီး ၂၀၂၂ ခုနှစ်တွင် ဒေါ်လာသန်း ၄၀၀ ကျော်ဖိုးတင်သွင်းခဲ့ကြောင်း COMTRADE ကဖော်ပြထားသည်။ စစ်အုပ်စုအာဏာသိမ်းခဲ့သော ၂၀၂၁ ခုနှစ်တွင် တင်သွင်းမှုလျော့နည်းခဲ့ရာမှ ၂၀၂၂ ခုနှစ်တွင် ပြန်များလာခြင်းဖြစ်သည်။တရုတ်မှ သံနှင့် သံမဏီတင်သွင်းမှု အများဆုံးမှာ ၂၀၁၅ ခုနှစ်ကဖြစ်ပြီး ဒေါ်လာသန်း ၈၀၀ ဖိုးခန့်တင်သွင်းခဲ့ခြင်းဖြစ်သည်။
