အာဏာသိမ်းစစ်ကောင်စီတပ်နှင့် ၎င်း၏ အပေါင်းအပါများ မီးရှို့ဖျက်ဆီးမှုကြောင့် ၂၀၂၁ မေ ၁ ရက်မှ ၂၀၂၃ မေ ၃၁ ရက်အထိ နိုင်ငံတဝန်းလူနေအိမ် ၇၀,၃၂၄ လုံး ပျက်ဆီးဆုံးရှုံးခဲ့ကြောင်း Data For Myanmar က အစီရင်ခံထုတ်ပြန်သည်။
ဧရာဝတီတိုင်းမှ လွဲ၍ တိုင်းနဲ့ပြည်နယ်အားလုံးတွင် စစ်ကောင်စီတပ်နှင့် အပေါင်းအပါများက ပြည်သူလူထုနေအိမ်များကို မီးရှို့ဖျက်ဆီးခဲ့ခြင်းဖြစ်ပြီး စစ်ကိုင်းတိုင်းက ၅၃,၈၁၆ ဖြင့် အများဆုံးဆုံးရှုံးခဲ့ခြင်းဖြစ်သည်။ ဒုတိယအများဆုံးမှာ မကွေးတိုင်းဖြစ်ပြီး အိမ်ခြေ ၁၀,၄၅၁ လုံး ပျက်ဆီးဆုံးရှုံးခဲ့ကြောင်း Data For Myanmar က ဖော်ပြသည်။
Data For Myanmar သည် နိုင်ငံတဝန်း စစ်ကောင်စီတပ်၏ မီးရှို့ဖျက်ဆီးမှုအခြေအနေကို ၂၀၂၁ မေလမှ စတင်ကာ လစဥ် တိုင်း၊ပြည်အလိုက်၊ မြို့နယ်အလိုက် မီးရှို့ဖျက်ဆီးခံရသည့် ကျေးရွာများ၊ အိမ်ခြေအရေအတွက်ကို စာရင်းကောက်ယူ မှတ်တမ်းတင်ထားသည်။ စစ်ကောင်စီတပ်သားများနှင့် အပေါင်းအပါများကျူးလွန်သော ကျေးရွာတည်နေရာ လက်တီကျု၊ လောင်ဂျီကျု အမှတ်အသား များကိုလည်း Data For Myanmar က အတိအကျဖော်ပြသည်။
စစ်ကိုင်းနှင့် မကွေးတိုင်းတို့ နောက်တွင် ချင်းပြည်နယ်က ၁၆၃၇၊ ကချင်ပြည်နယ်က ၁၃၇၈၊ မန္တလေးတိုင်းက ၁၂၀၆၊ တနင်္သာရီတိုင်းက ၆၄၀၊ ကရင်နီပြည်နယ်က ၄၂၁၊ မွန်ပြည်နယ်က ၂၂၉၊ ရှမ်း(တောင်)က ၁၈၇၊ ကရင်ပြည်နယ်က ၁၅၄၊ ပဲခူး(အရှေ့)က ၁၃၂၊ ပဲခူး(အနောက်)က ၅၅၊ ရခိုင်ပြည်နယ်က ၁၃၊ ရှမ်း(မြောက်)က ၄ နှင့် ရန်ကုန်တိုင်းက ၁ လုံး စသဖြင့် ပြည်သူလူထု၏ နေအိမ်များကို စစ်အုပ်စုက မီးရှို့ဖျက်ဆီးခဲ့ကြသည်။
Public Service Announcement
ယမန်နေ့(ဇွန်လ ၁၃ ရက်)ကပင် စစ်ကိုင်းမြို့နယ် ဆားတောင်မြို့ သာဇင်ရွာကို စစ်ကောင်စီတပ်ဖွဲ့ဝင်များ၏ အကြမ်းဖက်မီးရှို့မှုကြောင့် အိမ်ခြေ ၆၀၀ ကျော် ပျက်စီးဆုံးရှုံးခဲ့ရပြီး စစ်ရှောင်ပြည်သူများအတွက် အရေးပေါ်ကူညီရန်လိုအပ်နေကြောင်း Sagaing District Medical Team အဖွဲ့က အသိပေးသည်။ ယနေ့အထိလည်း သာဇင်ရွာကို စစ်အုပ်စုက ဆက်လက်မီးရှို့နေကြောင်း ဒေသခံအချို့က ပြောသည်။
