စစ်ကိုင်းတိုင်း၊ ဝန်းသိုမြို့နယ်တွင် ဆီသယ်ယာဥ်များ အခွန်လာကောက်သည့် ပျူစောထီးအဖွဲ့အား ပစ်ခတ်တိုက်ခိုက်ရာ သုံးဦးသေဆုံးပြီး လက်နက်အချို့ သိမ်းဆည်းနိုင်ခဲ့ကြောင်း ကောလင်းခရိုင်အမှတ်(၄)တပ်ရင်း၏ ထောက်လှမ်းရေးအရာရှိက ပြောသည်။
ဇွန်လ ၁၅ ရက် နံနက် ၇နာရီခန့်က ဝန်းသိုမြို့အရှေ့ဘက် ရွှေကောင်းထက်ဆီဆိုင်ရှိ ဆီသယ်ယာဥ်များအား ဝန်းသိုမြို့ ပျူစောထီးခေါင်းဆောင် ကျော်ဝင်းမောင်၊ အဖွဲ့ဝင် ဝင်းကိုနှင့် အမည်မသိပျူတစ်ဦးတို့က အခွန်လာကောက်ခဲ့သည်။
အဆိုပါ ပျူ သုံးဦးကို ပစ်ခတ်တိုက်ခိုက်ရာ သုံးဦးစလုံး သေဆုံး၍ ၎င်းတို့ထံမှ ကာဘိုင် (၁)လက် ၊ KA (၁)လက်နှင့် လက်လုပ်သေနတ်များရရှိခဲ့ကြောင်း Wuntho Revolution-WR အဖွဲ့က ထုတ်ပြန်သည်။
“အချိန်ကတော့ ၁၅မိနစ်လောက်ပဲကြာပါတယ်။ သူတို့ ပြန်မပစ်နိုင်ဘူး။ ဝန်းသိုမြို့အရှေ့ဘက် မီတာ၁၀၀အကွာမှာ ရှိတဲ့ရွှေကောင်းထက်ဆီဆိုင်ထဲမှာပါ။ မြို့နဲ့နီးတယ်။ မီတာ ၁၀၀ဆိုတာ ဘောလုံးကွင်း တစ်ကွင်း စာလောက်တောင်မဝေးဘူး။ ဖြစ်ပြီးစကစတွေရောက်လာတယ်။ ပြီးတော့ ပတ်ချာလှည့်ပြီး တောတွေကို (၆၀)မမနဲ့ ထုတယ်။”ဟု ထောက်လှမ်းရေးအရာရှိက ပြောသည်။
Public Service Announcement
အဆိုပါ စစ်ဆင်ရေးအား ဝန်းသိုမြို့နယ်တွင်းရှိ PDFနှင့် ပကဖများပူးပေါင်း၍ တိုက်ခိုက်ခဲ့ကြောင်း အသိပေးထားသည်။
