ကရင်နီပြည်နယ်အတွင်းရှိ အင်အားစုများအားလုံး တော်လှန်ရေးတွင် ပါဝင်ကာ ပိုမိုစည်းလုံး ညီညွတ်ပြီး ကျစ်လစ်ခိုင်မာစေရန် တည်ဆောက်သွားနိုင်ရေးသည် ကရင်နီပြည်နယ်အတွက် အရေးတကြီး လိုအပ်ချက်ဖြစ်ကြောင်း ကရင်နီအမျိုးသားတိုးတက်ရေးပါတီ(KNPP)က ယနေ့ကျရောက်သည့် (၁၄၈)နှစ်မြောက် ကရင်နီအမျိုးသားနေ့သို့ သဝဏ်လွှာပေးပို့ ပြောကြားလိုက်သည်။
သို့မှသာ တော်လှန်ရေးကာလမှ ဖက်ဒရယ်ဒီမိုကရေစီ ပြည်ထောင်စုတည်ဆောက်ရေးကာလအထိ မိမိတို့၏ ကိုယ်ပိုင်ပြဌာန်းခွင့်ဖြစ်သော ဥပဒေပြုရေး၊ အုပ်ချုပ်ရေးနှင့် တရားစီရင်ရေး ကဏ္ဍများကို ခိုင်ခိုင်မာမာချမှတ် ကျင့်သုံးသွားနိုင်မည် ဖြစ်ကြောင်း ဖော်ပြသည်။
အဆိုပါအချက်များကို တည်ဆောက်နိုင်ရေးအတွက် ပြည်နယ်အတွင်းတွင် ရှိကြသော ကရင်နီ အမျိုးသား အင်အားစုများအကြား မှန်ကန်သည့် ဆုံးဖြတ်ချက်၊ ဘုံရပ်တည်ချက်များနှင့် အတူ အကြမ်းဖက် စစ်အာဏာရှင်ချုပ်ငြိမ်းရေးအတွက် အမြန်ဆုံးဆောင်ရွက်ကြရန် အထူးလိုအပ်နေပြီဖြစ်ကြောင်း ထပ်လောင်းဖော်ပြသည်။
စစ်အာဏာရှင် ချုပ်ငြိမ်းပြီး ဖက်ဒရယ်ဒီမိုကရေစီ ပြည်ထောင်စုအတွင်း ကိုယ်ပိုင်ပြဌာန်းခွင့်အပြည့်အ၀ရှိသော ကရင်နီပြည် ဖြစ်ပေါ်လာရေးအတွက် ရောက်ရှိသည့်နေရာမှ အမျိုးသားရေးအတွက် ကျရာကဏ္ဍများ၌ တက်ညီလက်ညီ ပူးပေါင်းဆောင်ရွက်သွားကြရန်လည်း KNPPက တိုက်တွန်းထားသည်။
Public Service Announcement
KNPP ဦးဆောင်ပါဝင်သည့် ကရင်နီပြည်ကြားကာလ အုပ်ချုပ်ရေးကောင်စီကို ဖွဲ့စည်းပြီးဖြစ်ကြောင်း ယခုလ ဇွန်လ ၁၂ရက်တွင် ကြေညာထားသည်။ KNPP ၏ တပ်ဖြစ်သောကရင်နီတပ်မတော်(KA) အနေဖြင့် စစ်တပ်အာဏားသိမ်းပြီးနောက်ပေါ်ပေါက်လာသည့် ကရင်နီအမျိုးသားများကာကွယ်ရေးတပ်(KNDF) အပါအဝင် ဒေသတွင်း ကာကွယ်ရေးတပ်များ၊ တော်လှန်ရေးအင်အားစုများနှင့် ပူးပေါင်းပြီး စစ်ကောင်စီတပ်ကို တိုက်ခိုက်လျက်ရှိရာ ကရင်နီဒေသ စစ်ပွဲများ၌ ကရင်နီးပူးပေါင်းတပ်များက အောင်ပွဲများရရှိနေသည်။
ယနေ့ ဇွန် ၂၁ရက်၌ ကျရောက်သည့် ကရင်နီအမျိုးသားနေ့သို့ ပအိုဝ်းဖက်ဒရယ်ကောင်စီ (PNFC)၊ကျောင်းသားတပ်ဖွဲ့(ABSDF)ကရင်နီပြည်နယ် အတိုင်ပင်ခံကောင်စီ(KSCC)၊ ပြည်သူ့လွှတ်တော်ကိုယ်စားလှယ်များအဖွဲ့၊ လူ့ဘောင်သစ်ဒီမိုကရက်တစ်ပါတီ၊ ကရင်နီပြည်လူငယ်များသမဂ္ဂ တို့က သဝဏ်လွှာများပေးပို့ခဲ့သည်။
