ထီးချိုင့်မြို့နယ်၊ ဧရာဝတီမြစ်အရှေ့ဘက်ကမ်းကျေးရွာအချို့တွင် တိုက်ပွဲများဖြစ်ပွားနေပြီး စစ်ကောင်စီတပ်က ကျေးရွာနှစ်ရွာကို မီးရှို့ဖျက်ဆီးနေကြောင်း ဒေသခံများကပြောသည်။
ထီးချိုင့်မြို့နယ်လှည်းကူး၊ ကြို့ကုန်း၊ ကျွဲတဲကုန်း၊ တုံးပုံရွာသစ် ကျေးရွာတို့တွင် စစ်ကောင်စီစစ်ကြောင်းရောက်ရှိနေပြီး ယမန်နေ့(ဇူလိုင် ၁၄ရက်)ညနေက ကျွဲတဲကုန်းရွာအနီးတွင်တိုက်ပွဲအပြင်းအထန်ဖြစ်ပွားခဲ့ကြောင်း သိရသည်။
“စစ်ကြောင်းနှစ်ကြောင်းက ကျွဲတဲကုန်းရွာအနီးမှာ မနေ့က လာဆုံတယ်။ အဲ့အချိန်မှာ ကာကွယ်ရေးအဖွဲ့တွေကတိုက်တာ။ ဒီမနက်မှာတော့ကျွဲတဲကုန်းကို မီးရှို့နေတယ်။ မီးခိုးတွေ မဲနေတာပဲ”ဟုထီးချိုင့်မြို့နယ်မှ ပြည်သူ့ကာကွယ်ရေး ထောက်ပို့ရဲဘော်တစ်ဦးက ယနေ့(ဇူလိုင် ၁၅ရက်)နံနက် ၈နာရီခွဲခန့်တွင် ပြောသည်။
တိုက်ပွဲအတွင်းနှစ်ဖက် ထိခိုက်မှု အခြေအနေကိုမူ မသိရှိရသေးပေ။
Public Service Announcement
စစ်ကောင်စီတပ်သည် ဇူလိုင် ၁၄ရက် ကတုံးပုံရွာသစ်ကို မီးရှို့သဖြင့် နေအိမ် ၂၃ လုံး မီးလောင်ပျက်စီးသွားသည်ဟု ဒေသခံများကပြောသည်။
ဇူလိုင်လ ၉ရက်ကလည်းဧရာဝတီမြစ်ကြောင်းမှတဆင့် ထီးချိုင့်မြို့နယ်အတွင်း တပ်အပြောင်းအရွှေ့ပြုလုပ်သည့် စစ်ကောင်စီတပ်က မြစ်ကမ်းဘေးဝဲ၊ယာကိုသေနတ်ဖြင့် ရမ်းသမ်းပစ်ခတ်သောကြောင့်ကမ်းနီရွာမှ သားအဖနှစ်ဦး သေနတ်ကျည်ဆန်ထိမှန်သေဆုံးခဲ့သည်။
စစ်ကောင်စီတပ်သည် ပြီးခဲ့သည့် တစ်ပတ်ခန့်က ထီးချိုင့်မြို့ပေါ်သို့ ရဟတ်ယာဉ်ဖြင့် အင်အားတိုးချသွားသည်ဟု မြို့ခံများကပြောသည်။ ယခုရက်ပိုင်းတွင် ထီးချိုင့်နှင့် ကသာမြို့တို့တွင် စစ်ကောင်စီက စစ်ရေးလှုပ်ရှားမှုများ ရှိနေ၍ ဒေသခံများ သတိပြုနေထိုင်ကြရန် ပြည်သူ့ကာကွယ်ရေးရဲဘော်များက သတိပေးသည်။
