မုံရွာတွင် စစ်တပ်ဂိတ်အနီးရှိ အိမ်တစ်လုံးအနုကြမ်းစီးခံရပြီး ကျပ်သိန်းငါးရာကျော်နှင့် ရွှေထည်များပါသွား

စစ်ကိုင်းတိုင်း၊ မုံရွာမြို့တွင် စစ်ကောင်စီဂိတ်အနီးရှိ နေအိမ်တစ်လုံး ယ​မန်​နေ့က အနုကြမ်းစီးခံရပြီး ငွေကျပ်သိန်းငါးရာကျော်နှင့် ရွှေထည်များယူဆောင်သွားကြောင်း မြို့ခံများကပြောသည်။

ဇူလိုင်လ ၁၄ ရက်နေ့ မွန်းလွဲ ၂ နာရီခွဲခန့်က မုံရွာမြို့၊ မုံရွာပညာရေးကောလိပ် သာစည်လမ်းအရှေ့ဘက် စစ်ကောင်စီစစ်ဆေးရေးဂိတ်နှင့်ကိုက် ၂၀၀ခန့် အကွာ အမှတ်၇လမ်း​ပေါ်ရှိ နေအိမ်တစ်အိမ် ဓားပြတိုက်ခံရခြင်းဖြစ်သည်။

ထိုနေအိမ်သို့ သေနတ်နှစ်လတ်၊ ဓားနှစ်ချောင်းကိုင်ဆောင်ထားသော အမျိုးသားနှစ်ဦးနှင့် အမျိုးသမီးနှစ်ဦးက ဆိုင်ကယ်နှစ်စီးဖြင့် ရောက်လာပြီး အနုကြမ်းစီးသွားခြင်းဖြစ်ကြောင်း မြို့ခံများက People’s Spring သို့ပြောကြားသည်။

အနုကြမ်းစီးခံရသည့် နေအိမ်မှာ ခင်မွန်ရွာမီးရှို့ခံရ၍ မုံရွာမြို့ပေါ်တက်နေသည့် ကားဂိတ်လုပ်ငန်းရှင်တစ်ဦး၏ နေအိမ်ဖြစ်ပြီး ငွေကျပ်သိန်း၅၀၀ကျော်၊ ဆိုင်ကယ်နှစ်စီးနှင့် ရွှေများယူဆောင်သွားကြောင်း ​မုံရွာမြို့ခံများက ပြောသည်။

Public Service Announcement

စစ်ကောင်စီတပ်ဂိတ်နှင့် မနီးအဝေးတွင်ဖြစ်ပွားခဲ့ခြင်းဖြစ်​၍ စစ်အုပ်စု၏ အပေါင်းအပါများက ပြုလုပ်သွားခြင်းဖြစ်ကြောင်း မြို့ခံအချို့က မှတ်ချက်ပြုသည်။

“ဂိတ်နဲ့ဘာမှမဝေးဘူး။ သူတို့လုပ်ချင်ရာလုပ်နေတာ။လူတွေတော့ဘာမှလုပ်မသွားဘူး။အဲဒီအိမ်မှာအန်တီကြီးတစ်ယောက်ပဲရှိတာ။ ဖြစ်ချင်တော့အဲဒီနေ့ကမှ အိမ်ပြန်တာလို့ကြားတယ်။”ဟု မုံရွာမြို့ခံတစ်ဦးက ဆိုသည်။

မုံရွာမြို့ပေါ်တွင် စစ်ကောင်စီအာဏာသိမ်းပြီးနောက် ရွှေဆိုင်ကြီး၂ ဆိုင်အပါအဝင် စတိုးဆိုင်များ၊ မြို့ခံလုပ်ငန်းရှင်များမကြာခဏဓားပြတိုက်ခံနေရသည်။စစ်ကောင်စီတပ်ဂိတ်နှင့်နီး​သော ၊စစ်​ကောင်စီ အရာရှိလမ်း​ကြောင်းရှိပြီး လုံခြုံ​ရေးမြှင့်ထား​သော ​နေရာများအနီးတို့တွင် ဓါးပြတိုက်မှုများမကြာခဏဖြစ်ပွားသလို ဖမ်းဆီးနိုင်ခြင်းမရှိကြောင်း ဒေသခံများက ပြောသည်။

စစ်ကောင်စီတပ်သည် မုံရွာမြို့တွင် အနုကြမ်းစီးသူများအား ဖမ်းဆီးနိုင်ခြင်းမရှိသော်လည်း ပြည်သူများကိုမူ စစ်ဆေးရှာဖွေခြင်း၊ ပစ်ခတ်ဖမ်းဆီးခြင်းများ နေ့စဥ်ပြုလုပ်နေသည်။