▪︎ကားတစ်စီးလမ်းဘေးထိုးကျပြီးသုံးဦးသေ
ရေဖြူမြို့နယ် နဘုလယ်ဒေသ ထားဝယ်ရေနက်ဆိပ်ကမ်းသို့ အင်အားဖြည့်တင်းရန်လာသော စစ်ကောင်စီတပ်ယာဥ်တန်းကို ကြားဖြတ်တိုက်ခိုက်ခဲ့ကြောင်း ထားဝယ်ခရိုင် PDF တပ်ရင်း(၁)မှ တာဝန်ရှိသူတစ်ဦးက ပြောသည်။
ဇူလိုင်၁၁ရက်နေ့နံနက်၈နာရီကျော်ကရေဖြူနယ်၊နဘုလယ်ဒေသရေနက်ဆိပ်ကမ်းဘက်သို့ရှမ်းကိုင်းလမ်းမှတဆင့်အစီးရေခုနစ်စီးဖြင့်လာသော စစ်ကောင်စီတပ်ယာဥ်တန်းကို ထားဝယ်ခရိုင် တပ်ရင်း (၁)၊ ရေဖြူ ဝေဟင်-ပကဖ၊ KBDF၊ DDT တပ်ခွဲ(၃)နှင့် နွေဦးပြောက်ကြားတပ်ဖွဲ့စသည့် PDF ပူးပေါင်းတပ်များက လမ်းမှနေ၍ ကြားဖြတ်တိုက်ခိုက်ခဲ့ခြင်း ဖြစ်သည်။
“ယာဉ်က ခုနစ်စီးပါ။ ရိက္ခာတွေနဲ့ စစ်လက်နက် ပစ္စည်းတွေ သယ်ယူလာတဲ့ပုံစံပါပဲ။ အင်အားများတယ်။ ရေနက်ဆိပ်ကမ်းဖက်ခြမ်းကို အင်အားအ များကြီးသုံးလာတဲ့ သဘောပါ”ဟု တိုက်ခိုက်မှုလုပ်ဆောင်ခဲ့သည့် စစ်တပ်ယာဥ်တန်း၏အခြေအနေကို တပ်ရင်း(၁)မှ တာဝန်ရှိသူက ပြောသည်။
PDF ပူးပေါင်းတပ်များ၏ ပစ်ခတ်တိုက်ခိုက်မှုကြောင့် စစ်တပ်ယာဥ်တန်းမှ ကားတစ်စီးလမ်းဘေးထိုးကျပျက်စီးသွားပြီး သုံးဦးသေဆုံးကာ လေးဦးအပြင်း အထန်ဒဏ်ရာရသွားကြောင်း ၎င်းတာဝန်ရှိသူက ဆက်ပြောသည်။
Public Service Announcement
ပြီးခဲ့သည့် မေ ၁၄ ရက်ကလည်း ရေနက်ဆိပ်ကမ်းတည်ရှိရာ ထားဝယ်အထူးစီးပွားရေးဇုန်ရှိ စစ်တပ်စခန်းကို PDF ပူးပေါင်းတပ်များက ဒရုန်းဖြင့် ဗုံးကျဲခြင်း၊ စနိုက်ဘာအပါအဝင် လက်နက်ငယ်များဖြင့် ပစ်ခတ်တိုက်ခိုက်ခြင်းတို့ကြောင့် စစ်တပ်ဘက်မှ အထိနာပြီး လေကြောင်းပစ်ကူပါ ပေးခဲ့ရသည်။
ထို့ကြောင့် ယခုနောက်ပိုင်းတွင် စစ်ကောင်စီတပ်က ရေနက်ဆိပ်ကမ်းရှိရာ နဘုလယ်ဒေသအား ခြေကုပ်ယူရန် အင်အားတိုးချဲ့ခြင်း၊ လက်နက်ခဲယမ်းဖြည့်တင်းခြင်းအပြင် အနီးဝန်းကျင်ကျေးရွာများမှ ဒေသ ခံပြည်သူများကို ဖမ်းဆီးနှိပ်စက်ကာ နေအိမ်များအား ဖျက်ဆီးမှုများလည်း ရှိနေသည်။
