ကချင်လွတ်လပ်ရေးတပ်မတော်(KIA)ဌာနချုပ်နယ်မြေအနီး လဂျားယာန်ဒေသ၌ စစ်ကောင်စီတပ် စစ်ကြောင်းတစ်ခုကို လက်နက်ကြီးဖြင့် တိုက်ခိုက်ခဲ့ကြောင်း KIA သတင်းပြန်ကြားရေးဌာနတာဝန်ခံ ဗိုလ်မှူးကြီးနော်ဘူက ပြောသည်။
ဗန်းမော်ဘက်မှ ဝိုင်းမော်မြို့နယ် နမ့်ဆန်ယာန်ဒေသသို့ စစ်ကူလာသည့် စစ်ကောင်စီတပ်ကို ဇူလိုင် ၂၀ရက် ညနေပိုင်းတွင် KIAက တိုက်ခိုက်ခဲ့မှုနှင့်ပတ်သက်ပြီး မေးမြန်းချက်ကို ဗိုလ်မှူးကြီးနော်ဘူက အတည်ပြုခဲ့ခြင်းဖြစ်သည်။
“မနေ့က ညနေ ၅နာရီ ဝန်းကျင်လောက်မှာ စစ်ကောင်စီဘက်က စစ်ကြောင်းတစ်ကြောင်းက ဗန်းမော်ဘက်က တက်လာတာကို ကျနော်တို့ဘက်က လဂျားယာန်တံတားမှာ လက်နက်ကြီးနဲ့ ကြားဖြတ်ပြီးမှ ပစ်ခတ်တာပဲရှိပါတယ်။ ရင်ဆိုင်တိုက်ပွဲတော့ မဟုတ်ဘူး။ အဲဒီစစ်ကြောင်းတွေကလည်း ညမိုးချုပ်တဲ့ နောက်ပိုင်းမှာ သူတို့ တဖြည်းဖြည်းနဲ့ ခယာဘက်ကို ပြန်ဝင်သွားတဲ့ သတင်းတွေ ကျနော်တို့ ကြားရပါတယ်”ဟု ဗိုလ်မှူးကြီးနော်ဘူက ပြောသည်။
ထိုသို့လက်နက်ကြီးဖြင့် တိုက်ခိုက်မှုကြောင့် စစ်ကောင်စီတပ်ဘက်က ထိခိုက်မှုများကြောင်း ကချင်ဒေသ စစ်ရေးသတင်းရင်းမြစ်က ပြောကြားသည်။ KIA ဘက်ကမူ တိုက်ပွဲ၌ ထိခိုက်ကျဆုံး အခြေအနေကို လတ်တလော အသိပေးပြောကြားခြင်းမရှိပေ။
Public Service Announcement
KIO/KIA ဌာနချုပ်နှင့်နီးသည့် နမ်ဆန်ယာန်ဒေသသို့ စစ်ကောင်စီတပ်က ဇူလိုင်လဆန်းတွင်စစ်အင်အားများဖြည့်တင်း ထိုးစစ်ဆင်လာ၍ တိုက်ပွဲများ မကြာခဏ ဖြစ်ပွားနေခြင်းဖြစ်သည်။
