သေနတ်သုံးလက်နှင့် စစ်အသုံးအဆောင်များ သိမ်းဆည်းရရှိ
စစ်ကိုင်းတိုင်း၊ ရွှေဘိုခရိုင်၊ ရွှေဘိုမြို့နယ်၊ တည်သီးတောကျေးရွာပျူစောထီးစခန်းအား မဟာမိတ်များပူးပေါင်းတိုက်ခိုက်ရာ ၉ဦးသေဆုံးပြီး သေနတ် သုံးလက်နှင့် စစ်အသုံးအဆောင်များ သိမ်းဆည်းနိုင်ခဲ့ကြောင်း ရွှေဘိုမြို့နယ်(ပကဖ)အဖွဲ့က သတင်းထုတ်ပြန်သည်။
ယနေ့ (ဇူလိုင်၂၃ ရက်) နံနက် ၃ နာရီခန့်က တည်သီးတောကျေးရွာအနီးရှိ ပျူစောထီးစခန်းကို တိုက်ခိုက်ခဲ့ရာ သေနတ် သုံးလက်နှင့်ဆက်စပ်ပစ္စည်းများ သိမ်းဆည်းရရှိခဲ့ကြောင်း ရွှေဘိုမြို့နယ် (ပကဖ) အဖွဲ့က အသိပေးသည်။
တိုက်ခိုက်ချိန် မိနစ် ၂၀ခန့်ကြာခဲ့ပြီးစစ်ကောင်စီဘက်က ၉ဦး သေဆုံးခဲ့သည်ကို အတည်ပြုနိုင်ကာ အများအပြားထိခိုက်ဒဏ်ရာရရှိနိုင်ကြောင်း မဟာမိတ်အဖွဲ့များက ဆိုသည်။
“အဓိက ဝင်ချတာက ညောင်ပင်လှမဟုတ်ဘူး။ တည်သီးတောကို ဝင်ချတာ။ အကျအဆုံးက မသိသေးဘူး။ ဝင်တိုက်ပြီး ပြန်ထွက်လာတာ” ဟု ရွှေဘိုမြို့မှ ပြည်သူ့ကာကွယ်ရေးရဲဘော်တစ်ဦးက ပြောသည်။
Public Service Announcement
သို့သော် စစ်ကောင်စီဘက်က ထိခိုက်သေဆုံးမှုအား လူထုနွေဦးက သီးခြားအတည်ပြုနိုင်ခြင်း မရှိသေးပေ။
တိုက်ပွဲအတွင်း စစ်အုပ်စုထံမှ ကာဘိုင် (၂) လက်၊ ကိုးလုံး(၁)လက်၊ ကိုးလုံးကျည် (၂၅)တောင့်၊ ကာဘိုင်ကျည် (၂၀၉) တောင့်၊ ကျည်ဘောက် (၁)ခုနှင့် ချပ်ဝတ်တန်ဆာ (၇)ခုနှင့် Huawei ဖုန်း(၁)လုံးတို့ သိမ်းဆည်းနိုင်ခဲ့ကြောင်း ရွှေဘို(ပကဖ)အဖွဲ့က ထုတ်ပြန်သည်။
စစ်ဆင်ရေးကို ရွှေဘိုမြို့နယ်ပကဖ(PDO)(Shwebo Justice Force အဖွဲ့၊ ရွှေတောသားအဖွဲ့၊ ကျားပျံအဖွဲ့)၊ ရွှေဘိုမြို့နယ်တိုက်နယ်(၃)ပကဖအဖွဲ့နှင့် ဒီပဲယင်းမြို့နယ်ပကဖ Group 3(ဂဠုန်မင်းအဖွဲ့၊ စံရှားအဖွဲ့၊ ဒေါင်းမင်းအဖွဲ့၊ သရဲကြီးအဖွဲ့၊ မတထောင်တကောင်ဘွားအဖွဲ့)တို့ ပူးပေါင်းတိုက်ခိုက်ခဲ့ပြီး ပြည်သူ့ကာကွယ်ရေးအဖွဲ့ ရဲဘော်များ အထိအခိုက်မရှိကြောင်း အသိပေးထားသည်။
တည်သီးတောရွာသည် စစ်ကောင်စီတပ်က လက်နက်တပ်ဆင်ပေးထားသည့် ပျူအားကောင်းသော ကျေးရွာတစ်ရွာဖြစ်သည်။ အဆိုပါ ကျေးရွာသည် ခင်ဦးမြို့နှင့် ပိုမိုနီးကပ်လျက်ရှိသည်။
