စစ်ကိုင်းတိုင်း၊ ဝက်လက်မြို့နယ်ရှိ ရှိမ်းမကားရဲစခန်းအား ကာကွယ်ရေးအဖွဲ့ လေးဖွဲ့ပူးပေါင်းပြီး ဒရုန်းဖြင့် သွားရောက်တိုက်ခိုက်ခဲ့ကြောင်း ရှိမ်းမကားတိုက်နယ်တာဝန်ခံက ပြောသည်။
ယနေ့(ဇူလိုင် ၂၉ ရက်)က ဝက်လက်မြို့နယ်အရှေ့ခြမ်းရှိ ရှိမ်းမကားရဲစခန်းအား ဒရုန်း သုံးစီးဖြင့် ဗုံးချတိုက်ခိုက်ခဲ့ကြောင်း ရှိမ်းမကားတိုက်နယ်တာဝန်ခံက ပြောသည်။
စစ်အုပ်စုထိခိုက်မှုရှိ၍ လက်နက်ကြီး၊လက်နက်ငယ်များဖြင့် ပြန်လည်ပစ်ခတ်ခဲ့ကြောင်း၊ ရဲဘော်တစ်ဦး ထိခိုက်ခဲ့သော်လည်း မစိုးရိမ်ရကြောင်း တော်လှန်ရေးအင်အားစုများက ပြောသည်။
“ လွန်ခဲ့တဲ့ရက်တွေက စစ်ဗိုလ်က အရက်သေစာသောက်စားပြီး ရှိမ်းမကားကျေးရွာထဲမှာရှိတဲ့ပြည်သူတွေကို လမ်းမှာတွေ့တဲ့သူတွေကို စစ်တယ်။ မူးပြီး ပြောဆိုတယ်။ သေနတ်နဲ့ပစ်သတ်လိုက်ရမလားဆိုပြီး ခြိမ်းခြောက်မှုတွေပြုလုပ်တယ်။ စျေးဆိုင်တချို့ကိုလည်း အခွန်အဖြစ် ကျပ်သုံးသိန်းအထိ တောင်းခံနေတယ်။” ဟု ရှိမ်းမကားတိုက်နယ်တာဝန်ခံက ဆိုသည်။
Public Service Announcement
အဆိုပါ စစ်ဆင်ရေးအား ရှိမ်းမကားတိုက်နယ်အဖွဲ့ဦးဆောင်ကာ စိန်ပန်းနီနီ ဒရုန်းတပ်ဖွဲ့ ၊People’s Servant Revolution(WetLet) ဒရုန်းတပ်ဖွဲ့ ၊ လျှပ်စီးပြောက်ကျား ဒရုန်းတပ်ဖွဲ့တို့ ပူးပေါင်း တိုက်ခိုက်ခဲ့ကြောင်း အသိပေးထားသည်။
ရှိမ်းမကားရဲစခန်းရှိ စစ်အုပ်စုသည် ပြီးခဲ့သည့် ဇူလိုင် ၁၄ ရက်ညကလည်း ရှိမ်းမကားရွာအတွင်းရှိ စည်ပင်သာယာဈေးဆိုင်ခန်းများနှင့် လူနေအိမ်များကို မီးရှို့ဖျက်ဆီးခဲ့ရာ ဆိုင်ခန်းနှင့် နေအိမ် ၃၀ကျော် မီးလောင်ပျက်စီးခဲ့သည်။
