စစ်ကိုင်းတိုင်း၊ ရွှေဘိုနယ်အနောက်ခြမ်း၌ စစ်ကောင်စီတပ်နှင့်ပျူများအား နှစ်ကြိမ် တိုက်ခိုက်ရာ စစ်အုပ်စု ထိခိုက်သေဆုံးမှုများရှိကြောင်း ဗိုလ်ကျားရိုင်းပြည်သူ့ကာကွယ်ရေးတပ်ဖွဲ့၏ ပြန်ကြားရေးတာဝန်ခံက ပြောသည်။
သြဂုတ်လ ၇ ရက်နေ့ နံနက် ၈နာရီ မိနစ် ၄၀ ခန့်က ရွှေဘိုအနောက်ခြမ်း ဇီးဖြူကုန်းကျေးရွာတွင် တပ်စွဲထားသည့် စစ်ကောင်စီ တပ်သားများအား ဒေသတွင်းတော်လှန်ရေးအင်အားစုများက ဒရုန်းဖြင့် ၆၀မမဗုံးသီးတစ်လုံး ကျဲချတိုက်ခိုက်ခဲ့သည်။
ထိုဗုံးသီးကြောင့် စစ်သားတစ်ဦး ပြင်းထန်ဒဏ်ရာရရှိသွားပြီး ညနေ ၅နာရီ ၂၀မိနစ်ခန့်တွင် သေဆုံးသွားကြောင်းဗိုလ်ကျားရိုင်းပြည်သူ့ကာကွယ်ရေးတပ်ဖွဲ့၏ ပြန်ကြားရေးတာဝန်ခံက ပြောသည်။
ထို့နောက် နံနက် ၉ နာရီ မိနစ် ၅၀ ခန့်တွင်ကူးတို့ဆိပ်နှင့် တည်သီးတောရွာမှ အင်အား၄၀ ခန့်ပါ ပျူများ ထွက်လာစဉ် မင်းဘေးရွာနှင့် ဂျိုးမြေဇင်းကြားတွင် ပဒေသာဆွဲမိုင်းဖြင့် ထပ်မံမိုင်းဆွဲတိုက်ခိုက်ခဲ့သည်။
ထိုဆွဲမိုင်းကြောင့် ပျူ ၁ဦးပွဲချင်းပြီး သေဆုံးပြီး ပျူ ၆ဦး ပြင်းထန်ဒဏ်ရာ ရရှိသွားကြောင်း၊ ထိုနေ့ ည ၇နာရီခန့်တွင် ဒဏ်ရာရသူများအနက် ပျူ ၃ဦးထပ်မံ သေဆုံးသွားကြောင်း ဗိုလ်ကျားရိုင်းပြည်သူ့ကာကွယ်ရေးတပ်ဖွဲ့ကဆိုသည်။
Public Service Announcement
“လက်ရှိရွှေဘိုနယ်ကပျူရွာတွေအခြေနေကတော့ ကျွန်တော်တို့ တော်လှန်ရေးမဟာမိတ်ညီကိုတွေက ပျူရွာတွေကို ရွာထဲထိဝင်ပစ်လိုက် သူတို့အသွားအလာလမ်းတွေမှာ ဆီးကြိုဆော်လိုက်နဲ့ သူတို့ကျီးလန့်စာစားပုံစံမျိုးဖြစ်နေကြတယ်။လက်နတ်ကိုင်ထားတဲ့သူ တော်တော်များများတောင် ပျူရွာတွေမှာမနေရဲကြတော့ဘဲ မြို့တွေဝေးရာ ရှောင်ပြီး ထွက်ပြေးကုန်ကြပြီ။”ဟု ဗိုလ်ကျားရိုင်းပြည်သူ့ကာကွယ်ရေးတပ်ဖွဲ့၏ ပြန်ကြားရေးတာဝန်ခံက ပြောသည်။
ထိုစစ်ဆင်ရေးကို ဗိုလ်ကျားရိုင်းပြည်သူ့ကာကွယ်ရေးတပ် – Wild Tiger LPDF အဖွဲ့ ၊ Lightning Done Force – We are Everywhere Drone တပ်ဖွဲ့၊ ဒီပဲယင်း လက်ဝါးအဖွဲ့၊ GOLDEN EAGLE-ZBG LPDF၊ ဗိုလ်ဂျပန်ကြီး – ရွှေဘို LPDF၊ တောင်သူကြီးများအဖွဲ့-LDF၊သပြေညို ပြည်သူ့ကာကွယ်ရေးအဖွဲ့၊ Bo Ba Taw – SHWEBO LPDF အဖွဲ့ တို့ ပူးပေါင်း ကာ တိုက် ခိုက်ခဲ့ခြင်းဖြစ်ကြောင်း အသိပေးထားသည်။
ဇူလိုင်လ ၃၀ ရက်နေ့ နံနက်ပိုင်းကလည်း ရွှေဘိုအနောက်ခြမ်း ပျူရွာများမှ ပျူများလစာထုတ်ရန်အသွား မြို့လှ၊ ဂျိုးမြေဇင်း လမ်းပိုင်းတွင် မိုင်းဆွဲတိုက်ခိုက်ခဲ့ရာ စစ်အုပ်ထိခိုက်မှုများရှိခဲ့သည်။
