ဗမာလူမျိုးအများစုပါဝင်လာ၍ တော်လှန်ရေး အောင်မြင်ခြင်းသို့ရောက်မည်ဟု လုံးဝယုံကြည် ကြောင်း ကရင်နီစစ်ဦးစီးချုပ်ပြော

မြန်မာနိုင်ငံ၌ ဗမာလူမျိုးအများစုမှာ တော်လှန်ရေးတွင် ပါဝင်တော်လှန်လာကြပြီဖြစ်သော ကြောင့် တော်လှန်ရေးအင်အားကောင်းမွန်လာပြီး အောင်မြင်ခြင်းသို့ရောက်ရှိမည်ဟု လုံး၀ယုံကြည် ကြောင်း ကရင်နီတပ်မတော်(KA) စစ်ဦးစီးချုပ်ဗိုလ်မှူးချုပ်အောင်မြတ်က ပြောကြားသည်။

ယနေ့(ဩဂုတ် ၁၇ရက်)တွင် ကျရောက်သည့် (၇၅)နှစ်မြောက် ကရင်နီတပ်မတော်နေ့တွင် ဗိုလ်မှူးချုပ်အောင်မြတ်၏ အမှာစကား၌ အထက်ပါအတိုင်း ထည့်သွင်း ပြောကြားခဲ့ခြင်းဖြစ်သည်။

“တော်လှန်ရေးမအောင်မြင်လျင် သားစဉ်မျိုးဆက် ခုနစ်ဆက် ကျွန်ကဲ့သို့ရုန်းရမည်ဟု အတက်ပြောရဲပါသည်။ ထို့ကြောင့် ကိုယ်ကျိုးအတ္တစိတ်တွေ ခေတ္တဥပေက္ခာပြုပြီး တပ်မှူးများမှ ဦးဆောင်လမ်းပြပေးပါရန် နှင့် စည်းလုံးညီညွတ်ကြပါရန် အထူးမှာကြားလိုပါသည်”ဟု ဗိုလ်မှူးချုပ်အောင်မြတ်က ပြောသည်။

ကရင်နီပြည်တပ်မတော် ၊KNDF ၊KPDF များကို စေတနာအပြည့်နှင့် ကူညီပံ့ပိုးထောက်ပံ့နေကြသော ပြည်တွင်း၊ပြည်ပရှိ တော်လှန်ရေးဘက်တော်သားများ ရဟန်းရှင်လူမိဘပြည်သူနှင့် လူမှုအဖွဲ့အစည်းများအား ကျေးဇူးတင်ကြောင်းလည်း ထည့်သွင်းပြောကြားသည်။

Public Service Announcement

ကရင်နီပြည်သည် သေးငယ်သော်လည်း ရန်သူများ အဆမတန်အင်အားများဖြင့် စစ်ဆင်လာသော်လည်း နောက်ဆုံးတပ်ပျက်သွားကြောင်း ၎င်းက ဆိုသည်။

ရန်သူ့၏ အခြေအနေမကောင်းတော့သည်ကို မြေပြင်တွင်ရှိနေသော တပ်မှူး၊ တပ်သားများ ပိုတွေ့မြင်ရမည်ဖြစ်ကြောင်းလည်း ကရင်နီတပ်မတော် စစ်ဦးစီးချုပ်က ပြောသည်။

စစ်အာဏာရှင် ပြုတ်ကျရေးအတွက်လည်းကောင်း၊ ကိုယ့်ကံကြမ္မာကိုယ်ဖန်တီးနိုင်ရေးအတွက်လည်းကောင်း တော်လှန်ရေးတိုက်ပွဲဆင်နွှဲရာတွင် ကရင်နီဟူသော အမည်တစ်ခုတည်း၏ အောက်တွင်ရှိလျင် စည်းလုံးညီညွတ်ကြမည်ဖြစ်ကြောင်း ၎င်းက ဆိုသည်။

ယခုအခါ အောင်မြင်တော့မည်ဖြစ်သော်လည်း ရန်သူကို အထင်မသေးရန်နှင့် အထင်မကြီးရန်လိုအပ်ကြောင်း ပြောသည်။

လက်ရှိအခြေအနေတွင် ကရင်နီတပ်မတော်အပါအဝင် ကရင်နီအမျိုးသားကာကွယ်ရေးတပ် မြို့နယ်၊ဒေသ ကာကွယ်ရေးတပ်များသည် ကရင်နီပြည်သူပြည်သားများ၏ အားကိုးအားထား၍ ယုံကြည်ရသောတပ်ဖွဲ့များဖြစ်ကြောင်း၊ ပြည်တစ်ခု နယ်တစ်ခု ဒေသတစ်ခု၏ ကိုယ်စားပြုမှုကို ရရှိလာသည်နှင့်အမျှ ဆက်လက်၍ ကြိုးစားသွားကြပါရန် ကရင်နီတပ်မတော် စစ်ဦးစီးချုပ်က မှာကြားသည်။

ကျဆုံးသွားကြသော မိမိသွေးသောက် ရဲဘော်ရဲဘက်၏ ဝိညာဉ်နှင့်အသက်ပေးကြသော ပြည်သူပြည်သားများ၏ မျက်နှာထောက်ရှုကြရန် မြို့ပျက်၊ရွာပျက်၊အိမ်ပျက်၊ ဘ၀ပျက်သွားသော လူထုမျက်နှာငဲ့ကြည့်ပါရန် ၎င်းက ပြောကြားပြီး နိုင်ငံရေး အချောင်သမားများ၊ဘာသာရေး အချောင်သမားများအား မယုံကြည်ရန် သတိပေးသည်။