ခလရ(၂၇၄)တပ်က ရမ်းသမ်းပစ်နေ၍ သတိဖြင့်နေထိုင်ရန် မင်းတပ် CDF သတိပေး
ဝင်းမောင်/People’s Spring
ချင်းပြည်နယ် မင်းတပ်မြို့အဝင်တွင် စစ်ကောင်စီတပ်က မိုင်းထောင်ထားသည့်မိုင်းပေါက်ကွဲမှုကြောင့် တောင်ယာသွားသည့် သက်ကြီးအမျိုးသားတစ်ဦး သေဆုံးကာ အမျိုးသမီးတစ်ဦး ဒဏ်ရာရခဲ့ကြောင်း ဒေသခံက အသိပေးသည်။
စက်တင်ဘာ ၂၆ရက် နံနက် ၁၀နာရီကျော်တွင် မင်းတပ်မြို့ဝင် ဦး၀မ္မသူးမောင်း ပန်းခြံနားတွင် ပြည်သူ နှစ်ဦး မိုင်းထိခဲ့ခြင်းဖြစ်သည်ဟု ဆိုသည်။
“မြို့ဝင်ဂိတ်နား သူတို့ အမြဲရှိတော့ အပစ်ခံနေရတော့ ထောင်ထားတာနေမှာ။ အဲဒီ လမ်းက တောင်ယာ၊ တော၊ ယာဉ်တွေသွားလာတဲ့လမ်းကို။ အဲဒီလို ထောင်တာတော့ အဆင်မပြေဘူးလေ”ဟု မင်းတပ် ဒေသခံက ပြောသည်။
Public Service Announcement
ယခင်ကလည်း စစ်ကောင်စီထောင်သည့် မိုင်းကြောင့် ဒေသခံပြည်သူများ ထိခိုက်သေဆုံးမှုဖြစ်စဉ်များ ရှိခဲ့သည်ဟု ဆိုသည်။
စစ်ကောင်စီတပ်သည် ယနေ့နံနက် ၁၀နာရီခွဲခန့်တွင်လည်း မင်းတပ်အခြေစိုက် ခလရ(၂၇၄) တပ်မှ ပြည်သူများနေထိုင်ရာ တိုက်နယ်(၂)ဘက်သို့ လက်နက်ကြီးဖြင့်အကြောင်းမဲ့ရမ်းသမ်း ပစ်ခတ်ခဲ့ကြောင်း ဒေသခံက ပြောသည်။
လက်နက်ကြီးဖြင့် လေးကြိမ် ရမ်းသမ်းပစ်ခတ်ခဲ့ရာ ထိခိုက်ပျက်စီးမှုကို မသိရသေးဟု ဆိုသည်။
ခလရ(၂၇၄) တပ်သည် လက်နက်ကြီးများဖြင့် ရမ်းသမ်းပစ်ခတ်နေ၍ ပြည်သူများအနေဖြင့် သတိဖြင့်နေထိုင်ကြရန် မင်းတပ် ချင်းဒေသကာကွယ်ရေးတပ်(CDF)က ယမန်နေ့ စက်တင်ဘာ ၂၅ရက်တွင် ထုတ်ပြန် သတိပေးထားသည်။
ထို့ပြင် စစ်ကောင်စီတပ်က လိုင်းကားများအသုံးပြုပြီး အရပ်ဝတ်များဖြင့် စစ်အင်အားဖြည့်တင်းနေ၍ ကင်းစောင့်တာဝန်ကျရဲဘော်များအနေဖြင့် ကြပ်မတ်စစ်ဆေးကြရန် မင်းတပ် CDFက ထုတ်ပြန်ထားသည်။
