စစ်ကိုင်းတိုင်း၊ ရွှေဘိုမြို့နယ်၊ ကွန်ဆိပ်ကျေးရွာတွင် ဒေသတွင်း PDFအဖွဲ့တစ်ဖွဲ့၏ လက်နက်ခဲယမ်းများ သိမ်းဆည်းခံရပြီး အဆိုပါ စစ်ကောင်စီတပ်အား ဒေသတွင်း PDF ပူးပေါင်းအဖွဲ့က လိုက်လံတိုက်ခိုက်ခဲ့ကြောင်း သတင်းရရှိသည်။
အောက်တိုဘာ ၂၁ ရက် ညက ရွှေဘိုမြို့နယ်၊ ပလိုင်းကျေးရွာသို့ ရောက်ရှိနေသည့် စစ်ကောင်စီတပ်က ကွန်ဆိပ်ကျေးရွာဘက်သို့ လက်နက်ကြီးများဖြင့် စတင်ပစ်ခတ်တိုက်ခိုက်ခဲ့သည်။
ထို့နောက် အောက်တိုဘာ ၂၂ ရက် နံနက်ပိုင်းတွင် ကွန်ဆိပ်ကျေးရွာသို့ စစ်ကြောင်းထိုးဝင်ရောက်ခဲ့ကြောင်း၊ တိုက်မိုင်းများထိပြီးနောက် ကျေးရွာ စာသင်ကျောင်းကိုပါ မီးရှို့ဖျက်ဆီးခဲ့ကြောင်း ဒေသတွင်း တော်လှန်ရေးအင်အားစုများက ပြောသည်။
စာသင်ကျောင်းအား မီးရှို့ချိန်တွင် Shar Htoo Wawနည်းပညာသုံး မောင်းသူမဲ့လေယာဉ်ငယ် ဖြင့် ဗုံးသီး နှစ်လုံးချတိုက်ခိုက်ခဲ့ကြောင်း Northern Tigers Group၏ ပြန်ကြားရေးတာဝန်ခံက ပြောသည်။
Public Service Announcement
ထို့အပြင် စစ်ကောင်စီတပ်က ကျေးရွာအတွင်းရှိ PDFတစ်ဖွဲ့၏ လက်နက်ခဲယမ်းများ သိမ်းဆည်းသွားကြောင်း ဒေသခံအချို့က ပြောသည်။
ညပိုင်းတွင်လည်း လက်နက်ကြီးများဖြင့် ရမ်းသမ်းပစ်ခတ်နေ၍ PDFများက မောင်းသူမဲ့လေယာဥ်ဖြင့် ဗုံးသီး နှစ်လုံးချထပ်မံတိုက်ခိုက်ခဲ့ကြောင်း ဒေသတွင်းတော်လှန်ရေးအင်အားစုများက ပြောသည်။
“စာသင်ကျောင်းဆောင်သုံးဆောင်ကိုလည်း မီးရှို့သွားတယ်။ ခုက ရွှေဘိုပြန်ဝင်သွားပြီ။ အင်အား ၁၅၀ နဲ့ ၂၀၀ ဝန်းကျင်ရှိပါမယ်။”ဟု Northern Tigers Group၏ ပြန်ကြားရေးတာဝန်ခံက ပြောသည်။
ယင်းတိုက်ခိုက်မှုကို Northern Tigers Groupနှင့် ဂဠုန်ကြီး ပြည်သူ့ကာကွယ်ရေးအဖွဲ့၊ 96 Soldier တပ်ခွဲ TTA people defense force(SBO)၊ Black Eagle local PDF၊ Saviour Revolution Force၊ Farmer Heros (Khin U)နှင့်အတူ ဒေသခံကာကွယ် ရေးအဖွဲ့များ ပူးပေါင်းတိုက်ခိုက်ခဲ့ခြင်း ဖြစ်သည်။
အောက်တိုဘာဒုတိယပတ်အတွင်းကလည်း ရွှေဘိုမြို့ပေါ်ရှိ စစ်ကောင်စီတပ်သည် ရွှေဘိုနယ်တောင်ခြမ်းရှိ ကျေးရွာများသို့ စစ်ကြောင်းထိုးခဲ့ပြီး တော်လှန်ရေးအင်အားစုများနှင့် ထိတွေ့ပစ်ခတ်မှုများရှိခဲ့သည်။
