ထိုင်း-မြန်မာနယ်စပ်မြို့တစ်မြို့ဖြစ်သည့် ဘုရားသုံးဆူမြို့ပေါ်ရှိ စစ်ကောင်စီတပ် ဗိုလ်မှူးတစ်ဦးကို ပစ်ခတ်ခဲ့ကြောင်း နဂါးနီစစ်ကြောင်းတော်လှန်ရေးအဖွဲ့ကထုတ်ပြန်သည်။
ဘုရားသုံးဆူမြို့ရှိ အလှပြင်ဆိုင်တစ်ခုအတွင်း ရောက်ရှိနေသော စစ်ကောင်စီလက်အောက်ခံ ခလရ(၉၇)တပ် ဒုတပ်ရင်းမှူး အေးချမ်းအား နဂါးနီးစစ်ကြောင်းကပစ်ခတ်ခဲ့ခြင်းဖြစ်ပြီး နေရာတွင်ပင် ပွဲချင်းပြီးသေဆုံးသွားကြောင်းသိရသည်။
နိုဝင်ဘာလ(၂၃)ရက် မနက်ပိုင်းက ဖြစ်ပွားခဲ့ခြင်းဖြစ်သည်။
သေဆုံးသွားခဲ့သည့် ဗိုလ်မှူးအေးချမ်းသည် ကော့ကရိတ်မြို့အခြေစိုက် ခလရ(၉၇)တပ်ရင်းမှဖြစ်ပြီး ဘုရားသုံးဆူဒေသသို့ တာဝန်ဖြင့် ရောက်ရှိလာသူတစ်ဦး ဖြစ်သည်ဟု နဂါးနီစစ်ကြောင်းက ထုတ်ပြန်ထားသည်။
Public Service Announcement
“(ဘုရားသုံးဆူကိုရောက်တာ) ခန့်မှန်းခြေ ၆ လ လောက်ရှိပြီဗျ” ဟု နဂါးနီစစ်ကြောင်း တာဝန်ရှိသူတစ်ဦးက ပြောသည်။
ဘုရားသုံးဆူမြို့၏ နယ်စပ်ချက်ပွိုင့်ဂိတ်တွင် အများပြည်သူမော်တော်ယာဉ်များ အဆမတန် ဆက်ကြေးကောက်ခံနေခြင်း၊ မြို့တွင်းပေါ်၌ အများပြည်သူ စိတ်အနှောင့်အယှက်ဖြစ်စေရန် ခြိမ်းခြောက်ခြင်းများ၊ တော်လှန်ပြည်သူများအား လိုက်လံဖမ်းဆီးခြင်းများ ပြုလုပ်ရန် အားထုတ်လျက်ရှိသူတစ်ဦးလည်းဖြစ်ဟု ရေးသားထုတ်ပြန်ထားသည်။
ထုတ်ပြန်ချက်နှင့်ပတ်သက်၍ နဂါးနီစစ်ကြောင်းသို့မေးမြန်းရာတွင် “ကျွန်တော်တို့ ဒီထုတ်ပြန်ထားတဲ့အတိုင်းပါပဲ။ ကျန်တဲ့ဟာတော့ ကျွန်တော်တို့ ဒါသေချာတော့ ပြောပြလို့တော့ မရဘူး” ဟု တာဝန်ရှိသူတစ်ဦးက ပြောသည်။
