▪︎စစ်ရှောင် ၄၀၀၀ ကျော်ရှိ၊ စစ်ကောင်စီတပ်က ပြည်သူလူထုနေအိမ် ၄၀၀ ကျော်မီးရှို့ဖျက်ဆီးသွား
ကချင်ပြည်နယ်၊ ဖားကန့်မြို့နယ်၊ တာမခန်ကျေးရွာရှိ စစ်ကောင်စီတပ်စခန်းကို ကချင်လွတ်လပ်ရေးတပ်မတော်(KIA) ပူးပေါင်းတပ်က တိုက်ခိုက်သိမ်းပိုက်ပြီးဖြစ်၍ ဒေသခံ ပြည်သူများ ရွာအတွင်းသို့ ပြန်လည်ဝင်ရောက်နိုင်ပြီဖြစ်ကြောင်း KIA သတင်းပြန်ကြားရေးဌာနက မတ်လ ၁၈ရက်ညတွင် သတင်းဖော်ပြသည်။
ဖားကန့် တာမခန် ရဲစခန်းနှင့် စစ်တပ်စခန်းကို ဖေဖော်ဝါရီ ၂၆ရက်တွင် KIA တပ်မဟာ(၉)က ထိုးစစ်ဆင်တိုက်ခိုက်ခဲ့ရာ ရဲစခန်းကို ဖေဖော်ဝါရီ ၂၇ရက်တွင် သိမ်းယူနိုင်ပြီး တပ်စခန်းကို မတ်လ ၉ရက်တွင် သိမ်းယူနိုင်ခဲ့သည်။ တိုက်ပွဲဖြစ်ပွားစဉ်က တိမ်းရှောင်နေသည့် ပြည်သူ ၄၀၀၀ ကျော်ရှိပြီး နေရပ်ပြန်လာနိုင်ကြောင်း သက်ဆိုင်ရာက အသိပေး ထားသည်ဟု KIA သတင်းပြန်ကြားရေးက ဖော်ပြပြီး တာမခန်ပြည်သူအချို့ နေရပ်ပြန်လာနေပြီဟု အသိပေးသည်။
စစ်ကောင်စီတပ်ကတိုက်ပွဲတွင်အထိနာပြီးနောက် ပြည်သူလူထု နေအိမ် ၄၀၀ ကျော်ကို စစ်ကောင်စီက မီးရှို့ဖျက်ဆီးခဲ့ကြောင်းလည်း ဖော်ပြခဲ့သည်။
တိုက်ပွဲဖြစ်ပွားစဉ် တာမခန်ကို စစ်ကူလာသည့် စစ်ကောင်စီတပ်က ရွာကို မီးရှို့ဖျက်ဆီးခဲ့ရာ အဆိုပါ စစ်ကောင်စီတပ် ကိုလည်း KIAက ချေမှုန်းတိုက်ခိုက်ခဲ့သည်။
ပျက်စီးသွားသည့် တာမခန် အထက ကျောင်းတွင် မပေါက်ကွဲသေးသည့် လက်နက်ကြီး ကျည်များ ရှိနေကြောင်း၊ တာမခန် ဘုန်းကြီးကျောင်းဝန်း အတွင်း၌လည်း လူသေအလောင်းများနှင့် လက်နက်ကြီး ကျည်များ မရှင်းရသေးကြောင်း တာမခန်နွေဦးတော်လှန်ရေး ဖေစ်ဘွခ် စာမျက်နှာ၌ ဖော်ပြထားသည်။
တာမခန် ပြည်သူများအနေဖြင့် မကွဲသေးသည့် ဗုံးသီးများ၊ လက်နက်ကြီး ကျည်များ၊ မိုင်းများ တွေ့ပါက သက်ဆိုင်ရာထံ အကြောင်းကြားရန်လည်း အသိပေးထားသည်။
အထူးသဖြင့်စစ်ကောင်စီတပ်စွဲထားသော နေစာအနီးတွင် စစ်ကောင်စီက မိုင်းများစွာထောင်ခဲ့သောကြောင့် ပြည်သူများ ထိုနေရာများသို့မသွားရန် တားမြစ်ထားကြောင်းဒေသခံအချို့ကပြောသည်။