အောင်ဇေယျ/People’s Spring
စစ်ကိုင်းတိုင်း၊ ရွှေဘိုခရိုင်၊ ရေဦးမြို့ပေါ်တွင် စစ်မှုထမ်းရန် စစ်ကောင်စီ၏ ဖမ်းဆီးခံထားရသူများအနက် ၁၁ ဦး ထွက်ပြေးလွတ်မြောက်သွားကြောင်း သတင်းရရှိသည်။
ရေဦးမြို့ အထက (၁)ကျောင်းအတွင်း၌ စစ်ကောင်စီတပ်က ဖမ်းဆီးထားသည့် အမျိုးသားများအနက် ပြီးခဲ့သည့် မေလ ၉ ရက်နှင့် ၁၀ရက်က ၁၁ ဦးထွက်ပြေးလွတ်မြောက်လာကြောင်း ရေဦးမြောက်ပိုင်းနယ်မြေခံ ပကဖတာဝန်ခံ ကိုစိုးကြီးက ပြောသည်။
” သုံးယောက်ကအရင် ထွက်ပြေးတယ်။ နောက်ရက်မှာ ရှစ်ယောက်လိုက်လာတယ်။ အတွင်းထဲမှာတော့ တအားကြီးစည်းကမ်းတင်းကျပ်ထားတဲ့ပုံစံမျိုးတော့ မရှိဘူးပြောတယ်။ ဘောလုံးကန်ချင်ကန်၊ ခြင်းခတ်ချင်ခတ်ခိုင်းတယ် ပြောတယ်။ အပြင်မှာတော့ ကင်းတွေချထားတာပေါ့။လွတ်တဲ့အချိန် ဟတဲ့အချိန်ကို ပြေးပြီးထွက်ခဲ့လိုက်တာ”ဟု ကိုစိုးကြီးက ပြောသည်။
Public Service Announcement
ထွက်ပြေးလာသူများမှာ အသက်(၂၀)ကျော်အရွယ်များဖြစ်ပြီး ရေဦးမြို့ပေါ်နှင့် ကျေးရွာများမှဖြစ်ကြောင်း၊ နေအိမ်ပြန်နေရန်အခက်အခဲရှိ၍ နေခွင့်ပေးထားကြောင်း ရေဦးမြောက်ပိုင်းနယ်မြေခံ ပကဖတာဝန်ခံက ပြောသည်။
စစ်ကောင်စီတပ်သည် ဧပြီနှင့်မေလအတွင်း ရေဦးမြို့ပေါ်မှ အမျိုးသား ၈၀ကျော်အား စစ်မှုထမ်းရန် ဖမ်းဆီးခဲ့သည်။ စစ်မှုထမ်းစာရင်းပါထားသူများနှင့် စာရင်းမပါသူများကိုပါ ဖမ်းဆီးခဲ့ကြောင်း ဒေသခံများက ပြောသည်။
ထို့အပြင် မေလ ၉ ရက်က ရေဦးမြို့ ဟိန်းဆီဆိုင်ဂိတ်အနီးတွင် ပြည်သူ ရှစ်ဦးထက်မနည်း ဖမ်းဆီးသွားကြောင်း၊ ဖမ်းဆီးခံထားရသူ စုစုပေါင်း ၉၀ကျော်အထိရှိနေပြီဖြစ်ကြောင်း ရေဦးမြို့နယ်စစ်ရှောင်ပြည်သူ ထောက်ပံ့ရေးအဖွဲ့က ပြောသည်။
ယခုတွင် ၁၁ ဦး ထွက်ပြေးလွတ်မြောက်လာ၍ ၈၀ခန့် ကျန်ရှိနေသေးကြောင်း သိရသည်။
ဖမ်းဆီးခံထားရသူများတွင် အသက်ငယ်ရွယ်သူများအပြင် အသက် (၄၀)ကျော်နှင့် အိမ်ထောင်သည်အမျိုးသားများပါ ဖမ်းဆီးခံထားရကြောင်း ရေဦးမြို့နယ် စစ်ရှောင်ပြည်သူထောက်ပံ့ရေးအဖွဲ့က ပြောသည်။
ထိုသို့ဖမ်းဆီးမှုများကြောင့် ရေဦးမြို့ပေါ်နှင့် ကျေးရွာများရှိ အမျိုးသားများမှာ ထွက်ပြေးတိမ်းရှောင်နေရကြောင်း သိရသည်။
စစ်ကောင်စီတပ်သည် မတ်လအတွင်းက စစ်မှုထမ်း ပထမအသုတ်အား ရွေးချယ်၍ စစ်သင်တန်းစပေးခဲ့ပြီး ယခုအခါ ဒုတိယအသုတ်အတွက် လူစုဆောင်းနေသည်။
စစ်မှုထမ်းကိစ္စ ရှောင်ရှားလို၍ အမျိုးသားများ ပြည်ပထွက်အလုပ်လုပ်ကိုင်သူများပြားလာခဲ့ရာ အာဏာသိမ်းစစ်ကောင်စီတပ်က မေလ ၁ ရက်မှစပြီး အမျိုးသားများ ပြည်ပထွက်အလုပ်လုပ်ကိုင်ခွင့်ကိုပါ ယာယီရပ်ဆိုင်းလိုက်သည်။
လက်ရှိတွင် ရေဦးမြို့အပြင် စစ်ကိုင်းမြို့နှင့် မကွေးတိုင်း၊ နတ်မောက်မြို့နယ်တို့တွင်လည်း ပြည်သူ ၂၀ထက်မနည်း စစ်ကောင်စီတပ်က ဖမ်းဆီးထားသည်။
