ကံဆောင်သပိတ်ပြုလုပ်မှု မြို့နယ် ၁၈မြို့နယ် အထိရှိလာ
ကံဆောင်သပိတ်ပြုလုပ်မှု မြို့နယ် ၁၈မြို့နယ် အထိရှိလာဇေအောင်/People’s Spring
မန္တလေးတိုင်းအတွင်း ပထမဆုံးအနေဖြင့် မြင်းခြံခရိုင်အတွင်းရှိ မြို့နယ် သုံးမြို့နယ်မှ သံဃာတော်များက စစ်ကောင်စီအား ပတ္တနိက္ကုဇ္ဇန ကံဆောင်သပိတ်မှောက်မှုပြုလုပ်ရာတွင် ပါဝင်လာပြီး အင်အားအများအပြားဖြင့် ချီတက် ဆန္ဒပြခဲ့ကြသည်။
ဇူလိုင် ၂ ရက်က မြင်းခြံခရိုင်ရှိ မြင်းခြံ၊ တောင်သာနှင့် နွားထိုးကြီးမြို့နယ်တို့မှ သံဃာတော်များစုဝေးကာ ပတ္တနိက္ကုဇ္ဇန ကံဆောင်သပိတ် ပြုလုပ်ခဲ့သည်။
ထို့နောက် သံဃာတော်များက အင်အားအများအပြားဖြင့် လှည့်လည်ကာ စစ်ကောင်စီအား သပိတ်မှောက် ဆန္ဒပြခဲ့ကြောင်း သပိတ်ဦးဆောင်သူများက ပြောသည်။
Public Service Announcement
ထို့အပြင် ပြည်သူများကလည်း လိုက်ပါဝန်းရံကာ စစ်ကောင်စီအား ဆန္ဒပြခဲ့ကြသည်။
သံဃာတော်များ၏ ပတ္တနိက္ကုဇ္ဇန ကံဆောင် သပိတ်ကို မြင်းခြံခရိုင်၊တပ်ရင်းအမှတ်(၁)၊ တပ်ရင်းအမှတ် (၃)၊ တပ်ရင်းအမှတ် (၈) ၊ မြင်းခြံမြို့နယ် ပြည်သူ့အုပ်ချုပ်ရေးအဖွဲ့၊ မလှိုင်မြို့နယ် ပြည်သူ့ကာကွယ်ရေးတပ်ဖွဲ့တို့က လုံခြုံရေးယူပေးခဲ့သည်။
အလားတူ ယမန်နေ့ကပင် မကွေးတိုင်း၊ ဆိပ်ဖြူမြို့နယ်ရှိ သံဃာတော်များကလည်း သိမ်တစ်ခုတွင်စုဝေး၍ ပတ္တနိက္ကုဇ္ဇန ကံဆောင်သပိတ် စတင်ပြုလုပ်ခဲ့ကြရာ မကွေးတိုင်းအတွင်း စတုတ္ထမြောက်ပါဝင်လာသည့် မြို့နယ်ဖြစ်လာသည်။
“တိုင်းနဲ့ပြည်နယ်အသီးသီးမှာရှိနေတဲ့ သံဃာတော်အရှင်သူမြတ်တွေကို လက်ရှိဆောင်ရွက်နေကြတဲ့ ပတ္တနိက္ကုဇ္ဇန ကံဆောင်သပိတ်ကို ညီညီညွတ်ညွတ်နဲ့ ပါဝင်ကြဖို့တိုက်တွန်းပါတယ်။ ပြည်သူလူထုတရပ်လုံးကလည်း တိုင်းရင်းသားလူမျိုးစုတွေအားလုံးကပါ စုပေါင်းပြီး စစ်ရေးတိုက်ပွဲကြီး ဆင်နွှဲနေကြတယ်။အာဏာရှင်စနစ်ကိုအမြစ်ပြတ်ချေမှုန်းဖို့။ NUG အစိုးရကလည်း နိုင်ငံရေးတိုက်ပွဲတွေ သံတမန်ရေးတိုက်ပွဲတွေစီးပွားရေးတိုက်ပွဲတွေ ဦးဆောင်ပြီးဆင်နွှဲနေတယ်။ အဲဲဒီလိုဆင်နွှဲနေကြတဲ့အချိန်မှာ သံဃာထုကလည်း သံဃာထုတိုက်ပွဲအနေနဲ့ ဓမ္မလမ်းကြောင်း၊ ဝိနည်းလမ်းကြောင်းကနေ ညီညီညွတ်ညွတ်ပါဝင်ကြဖို့ တိုက်တွန်းလိုပါတယ်။”ဟု ဒီပဲယင်းမြို့နယ်မှ ကံဆောင်သပိတ်ဦးဆောင်ဆရာတော်တစ်ပါးက မိန့်ကြားသည်။
ကံဆောင်သပိတ်ကို ဇွန်လ ၂၃ရက်က စစ်ကိုင်းတိုင်း၊ ချောင်းဦးမြို့နယ်မှ စတင်ပြုလုပ်ခဲ့ပြီးနောက် ဒီပဲယင်း၊ ဆားလင်းကြီး၊ တန့်ဆည်၊ စစ်ကိုင်း၊ မုံရွာ၊ဝက်လက်၊အရာတော်၊ ဘုတလင်နှင့် မြင်းမူမြို့နယ်များ၌လည်းကောင်း၊ မကွေးတိုင်း၌ မြိုင်၊ ပခုက္ကူ၊ ပေါက်နှင့် ဆိပ်ဖြူမြို့နယ်များ၌လည်းကောင်း၊ တနင်္သာရီတိုင်း၊ ထားဝယ်မြို့နယ်တွင်လည်းကောင်း၊ မန္တလေးတိုင်း၊ မြင်းခြံ၊ နွားထိုးကြီး၊ တောင်သာမြို့နယ်များတွင်လည်းကောင်း ပြုလုပ်လာရာ စုစုပေါင်း မြို့နယ် ၁၈ မြို့နယ်အထိ ရှိလာပြီဖြစ်သည်။
ပတ္တနိက္ကုဇ္ဇန ကံဆောင်သပိတ်ကို နိုင်ငံတော်သံဃမဟာနာယက(ငြိမ်း)၊ ဝင်းနိမ္မိတာရုံ ကျောင်းတိုက် ဆရာတော်ကို စစ်ကောင်စီက ပစ်သတ်ခဲ့၍ သံဃာတော်များက ဆန့်ကျင်သည့်အနေဖြင့် ပြုလုပ်လာခြင်းဖြစ်သည်။
