ထားမြတ်
စစ်ကောင်စီပစ်ခတ်လိုက်သည့် လက်နက်ကြီးကြောင့် အရပ်သား ၆ဦီး ပွဲချင်းပြီးသေဆုံးပြီး တစ်ဦးထိခိုက်ဒဏ်ရာရရှိကာ နေအိမ်လေးလုံးမီးလောင်ပျက်စီးသွားခဲ့ကြောင်း တအာင်းတပ်မတော်(TNLA)က ထုတ်ပြန်သည်။
ရှမ်းမြောက်ရှိ လားရှိုးနှင့် ကျောက်မဲမြို့နယ်အတွင်း စစ်ကောင်စီတပ်က ပစ်ခတ်ခဲ့သည့် လက်နက်ကြီးကြောင့် အရပ်သား ပြည်သူ သေဆုံးထိခိုက်မှု ထပ်မံ ဖြစ်ပေါ် ခဲ့ရသည့် အခြေအနေကို အသိပေးခြင်းဖြစ်သည်။
Public Service Announcement
ယမန်နေ့ (ဇူလိုင် ၁၆ရက်)က ကျောက်မဲမြို့ ခိုမုန်းသစ်စက်ဝန်းတွင် စစ်ကောင်စီက ပစ်ခတ်လိုက်သည့် လက်နက်ကြီးတစ်လုံး အရပ်သားနေအိမ်ပေါ်သို့ ကျရောက်ပေါက်ကွဲရာ အသက် (၄၀)နှစ်အရွယ် အမျိုးသမီးတစ်နှင့် အမျိုးသား နှစ်ဦးပွဲချင်းပြီးသေဆုံးခဲ့ရသည်ဟု ဆိုသည်။
ထို့ပြင် ရပ်ကွက် (၈)တွင်လည်း ကားဝမ်ရှော့ဆိုင်အတွင်း လက်နက်ကြီးကျရောက်ပေါက်ကွဲမှုကြောင့် မီးလောင်မှုဖြစ်ပွားရာ ကားသုံးစီး မီးလောင်ပျက်စီးသွားခဲ့ဟု အသိပေးသည်။
အလားတူ လားရှိုးမြို့ ရပ်ကွက် (၁)တွင် လက်နက်ကြီးကျရောက် ပေါက်ကွဲမှုကြောင့် မိသားစုဝင် သုံးဦးလက်နက်ကြီးစ ထိမှန်သေဆုံးသွားခဲ့ကြောင်း ထုတ်ပြန်သည်။
ထို့အပြင် မိုးကုတ်အရှေ့ပိုင်း ညောင်လေးပင်တွင် လက်နက်ကြီးနေအိမ်ပေါ် ကျရောက်မှုကြောင့် အမျိုးသားတစ်ဦးထိမှန်ဒဏ်ရာရရှိပြီး ချမ်းမြေ့သာယာရပ်ကွက်နှင့် ရေပူတွင်လည်း လက်နက်ကြီးကျ ရောက်ပေါက်ကွဲမှု ဖြစ်ရာ နေအိမ် သုံးလုံးထိမှန်ပြီး မီးလောင်ပျက်စီးသွားခဲ့ကြောင်း ဖော်ပြထားသည်။
TNLA အနေဖြင့် ဇူလိုင် ၁၄ရက် ညပိုင်းမှ ၁၈ရက် ညပိုင်းအထိ အပစ်ရပ်ထားမည်ဟု အသိပေးထားသော်လည်း တိုက်ပွဲများ ယနေ့အထိ နေ့စဉ်ဖြစ်ပွားလျက်ရှိသည်။
အရပ်သားကို ပစ်မှတ်ထားသည့် လေကြောင်း၊ လက်နက်ကြီးပစ်ခတ်မှုကြောင့် TNLAက အပစ်ရပ်ကြေညာထားသည့် ဇူလိုင် ၁၄ရက်မှ ယနေ့အထိ ၃ရက်တာအတွင်း အရပ်သား ၉ဦးသေဆုံးကာ ၉ဦး ဒဏ်ရာရရှိခဲ့သည်ဟု အသိပေးသည်။
TNLAနှင့် မဟာမိတ်တပ်များသည် ဇွန်လ ၂၅ရက် မှစတင်၍ စစ်ကောင်စီတပ်များကို တိုက်ခိုက်ခဲ့ရာ စစ်ကောင်စီပစ်ခတ်သည့် လက်နက်ကြီးနှင့် လေကြောင်း တိုက်ခိုက်မှုကြောင့် သေဆုံးသည့် အရပ်သား ၇၆ဦးထက်မနည်းရှိခဲ့ပြီး ပြည်သူ ၁၁၀ကျော် ဒဏ်ရာရရှိခဲ့သည်။
