ဟာနာဆန်/People’s Spring
မကွေးတိုင်း၊ ပခုက္ကူမြို့တွင် ခွင့်ရ၍ အလည် ရောက်နေသည့် စစ်ကောင်စီ၏ ဗိုလ်ကြီးတစ်ဦး KTV မှအပြန် PDFများက ဖမ်းဆီးသွားကြောင်း သတင်းရရှိသည်။
ယနေ့(ဇူလိုင် ၂၄ရက်) ညနေ ၃နာရီခန့်က ပခုက္ကူမြို့၊ စက်မှုဇုန်၌ KTVမှ ပြန်လာသော ဗိုလ်ကြီးဝင်းဇော်ဆိုသူကို ဖမ်းဆီးရမိခဲ့ကြောင်း Southern YSO PDFအဖွဲ့ခေါင်းဆောင် ကိုအောင်မောင်းက ပြောသည်။
Public Service Announcement
ဗိုလ်ကြီးဝင်းဇော်အား စစ်ဆေးချက်အရ ၎င်းသည် လက်ရှိနေပြည်တော် အမှတ်(၂၃) တပ်မတော် ကုတင်(၂၅)ဆေးရုံတွင် တပ်ရေး၊တပ်ထောက်အဖြစ် တာဝန်ထမ်းဆောင်နေသူဖြစ်ပြီး ပခုက္ကူမြို့သို့ ခွင့်ရက်ဖြင့် ပြန်လာစဥ် KTV သွားရင်း ဖမ်းဆီးခံရခြင်းဖြစ်သည်ဟု Southern YSO PDFအဖွဲ့ခေါင်းဆောင် ကိုအောင်မောင်းက ပြောသည်။
“သေနတ်အတိုပါတယ်ဆိုလို့ သတင်းရလို့ ဖမ်းဆီးတာ။”ဟု ကိုအောင်မောင်းက ပြောသည်။
သို့သော် ၎င်းဗိုလ်ကြီးထံမှ လက်နက်ရရှိခြင်းမရှိဘဲ Shayang 125 ဆိုင်ကယ်တစ်စီး၊ ငွေကျပ် ၆၁၈,၀၀၀ ကျပ်၊ မှတ်ပုံတင် တစ်ခု၊ လစာထုတ်ယူသည့် အင်းဝဘဏ် ATM ကတ်တစ်ခု၊ ပိုက်ဆံအိတ် ၁လုံး၊ ဘေးလွယ်အိတ် ၁ လုံး၊ ဦးထုပ်တစ်လုံး၊ ဖုန်း ၂လုံးတို့ သိမ်းဆည်းရမိခဲ့ကြောင်း Southern YSO PDFက အသိပေးသည်။
၎င်းသည် ဗသက-ဗထူးမြို့ အမှတ်စဉ် (၁၁၂)တွင် သင်တန်းဆင်းပြီးလုပ်သက်(၂၄) နှစ်ရှိသူဖြစ်ကာ မိခင်တပ်ရင်းမှာ ကလော ခလရ(၇) ဖြစ်ကြောင်း သိရသည်။
ဗိုလ်ကြီးဝင်းဇော်အား စစ်သုံ့ပန်းဥပဒေအတိုင်း ဖမ်းဆီးထိန်းသိမ်းထားပြီး လိုအပ်သော သတင်းအချက်အလက်များကို စစ်ဆေးဆောင်ရွက်နေကြောင်း Southern YSO PDFက အသိပေးထားသည်။
