စဉ့်ကူးမြို့ကို စစ်ကောင်စီရေတပ် ထပ်မံတိုက်ခိုက်နေ

ဇေအောင်/People’s Spring

မန္တလေး PDF ပူးပေါင်းတပ် သိမ်းပိုက်ထားသော စဉ့်ကူးမြို့ကို စစ်ကောင်စီ​၏ ရေတပ်က ယနေ့နံနက်တွင် ရေကြောင်းမှလာရောက်တိုက်ခိုက်နေကြောင်း ဒေသခံများက ပြောသည်။

ယနေ့(ဇူလိုင်၂၉ရက်)နံနက်ပိုင်းက စစ်ကိုင်းတိုင်း၊ ဝက်လက်မြို့နယ်၊ ရှိမ်းမကားရွာမှ ဧရာဝတီမြစ်ကြောင်းအတိုင်း သံခွန်ရေယာဥ်(၄)စီးဖြင့် ဆန်တက်လာသော စစ်ကောင်စီတပ်သည် နံနက် ၈နာရီခွဲက စဥ့်ကူးမြို့အနီးရောက်ရှိပြီး လက်နက်ကြီးများဖြင့် ပစ်ခတ်တိုက်ခိုက်ခဲ့ကြောင်း The Voice of Wetlet Madayar အဖွဲ့က ပြောသည်။

Public Service Announcement

“အင်အားကတော့ များမယ်။ စဥ့်ကူးနဲ့ လက် ပန်လှ ထိုးစစ်ဆင်မယ်ကြားနေတာပဲ”ဟု အထက်ပါအဖွဲ့ဝင်တစ်ဦးက ဆိုသည်။

ထိခိုက်ပျက်စီးမှုနှင့် တိုက်ပွဲအခြေအနေကိုမူ မသိရသေးပေ။

စဉ့်ကူးမြို့အား မန္တလေး PDFနှင့် ပူးပေါင်းတပ်များက ဇူလိုင် ၁၇ရက်တွင် အပြီးသတ် သိမ်းပိုက်ပြီးနောက် (၃)ရက်အကြာ ဇူလိုင် ၂၀ ရက်တွင် စစ်ကောင်စီက သင်္ဘော ၅စီးဖြင့် မြစ်ကြောင်းမှတဆင့်တန်ပြန်ထိုးစစ်ဆင်ခဲ့သည်။

သို့သော် စစ်ကောင်စီရေတပ် အထိနာပြီး ဆုတ်ခွာသွားခဲ့ကြောင်း မန္တလေး PDFက အသိပေးထားသည်။

ယနေ့နံနက်ပိုင်း စစ်ကောင်စီ၏ တန်ပြန်ထိုးစစ် ဆင်မှုအခြေအနေနှင့်ပတ်သတ်၍ မန္တလေး PDF ၏ ပြောရေးဆိုခွင့်ရှိသူ ကိုအော်စမွန်အား ဆက်သွယ်မေးမြန်းထားပြီး လက်တလော ပြန်လည်ဖြေကြားခြင်းမရှိသေးပေ။

စဉ့်ကူးမြို့ နယ်မြေလုံခြုံရေးနှင့် စစ်ကောင်စီ၏ တန်ပြန်ထိုးစစ်အတွက် ပြင်ဆင်ထားကြောင်း မန္တလေး PDFက ဇူလိုင် ၂၇ရက်တွင် ထပ်မံအသိပေးထားသည်။

အလားတူ ရွှေဘို​မြို့နယ်၊ ကျောက်မြောင်းတပ်ကလည်း လက်နက်ကြီးများဖြင့် ပစ်ခတ် တိုက်ခိုက် နေ၍ ဒေသခံပြည်သူများမှာ ထွက်ပြေးတိမ်းရှောင်နေရသည်။

စဉ့်ကူးစစ်ဆင်ရေးများတွင် စစ်ကောင်စီမှ လေကြောင်းတိုက်ခိုက်မှုများ အဆက်မပြတ် ပြုလုပ်ခဲ့သောကြောင့် မြို့နေဧရိယာများ၊ အရပ်သားပြည်သူနေအိမ်များ ထိခိုက်ပျက်စီးခဲ့သည်။