ရှမ်းပြည်နယ်မြောက်ပိုင်း မိုးမိတ်မြို့ရှိ စစ်ကောင်စီ ဗျူဟာကုန်းကို ယနေ့(ဇူလိုင် ၃၁ရက်)တွင် အလုံးစုံ သိမ်းပိုက်နိုင်ပြီဖြစ်ကြောင်း တအာင်းတပ်မတော်(TNLA) ပြောရေးဆိုခွင့်ရှိသူ လွေးယေဦးက ပြောကြားသည်။
မိုးမိတ်မြို့ရှိ စစ်ကောင်စီ ဗျူဟာကုန်းကို ဇူလိုင် ၂၄ရက်တွင် စတင်ထိုးစစ်ဆင်ခဲ့ရာ တစ်ပတ်ခန့်အကြာတွင် သိမ်းနိုင်ခဲ့ခြင်းဖြစ်သည်။
Public Service Announcement
“ဒီကနေ့မှာတော့ မိုးမိတ်မှာရှိတဲ့ စစ်ကောင်စီ ဗျူဟာကုန်းနဲ့ အခြားတပ်စခန်းတွေကို ကျမတို့ အလုံးစုံ သိမ်းပိုက်နိုင်ခဲ့တာဖြစ်ပါတယ်။မိုးမိတ်အပြင် ကျောက်မဲ (၅၀၁) (၅၀၂)မှာလည်း တိုက်ပွဲတွေပြင်းထန်စွာ ဖြစ်ပွားနေပါတယ်”ဟု လွေးယေဦးက ပြောသည်။
TNLAနှင့် မဟာမိတ်တပ်များသည် ၁၀၂၇ စစ်ဆင်ရေးအပိုင်း(၂)ကို ဇွန်လ ၂၅ရက်တွင် စတင်ခဲ့ရာ ဇူလိုင် ၁၀ရက်တွင် နောင်ချိုမြို့၊ ဇူလိုင် ၂၄ရက်တွင် မိုးကုတ်မြို့၊ ဇူလိုင် ၃၁ရက် ယနေ့တွင် မိုးမိတ်မြို့ကို အလုံးစုံသိမ်းပိုက်နိုင်ခဲ့ခြင်းဖြစ်သည်။
TNLA ပူးပေါင်းတပ်သည် ကျောက်မဲမြို့ကိုလည်း ဝင်ရောက်နေရာယူထားပြီး လက်ကျန် တပ်စခန်းများကို ဆက်လက်ထိုးစစ်ဆင်နေသည်။
စစ်ကောင်စီက လေကြောင်း၊ လက်နက်ကြီး ပစ်ကူပေး ခုခံနေသည့်ကြားမှ မြို့ သုံးမြို့ကို TNLA ပူးပေါင်းတပ်များက အလုံးစုံ သိမ်းပိုက်ရရှိထားခြင်းလည်းဖြစ်သည်။
