ထားမြတ်/People’s Spring
ပအိုဝ်းဒေသ ဆီဆိုင်မြို့နယ်တွင် ပအိုဝ်းအမျိုးသားလွတ်မြောက်ရေးတပ်မတော်(PNLA) မဟာမိတ်ပူးပေါင်းတပ်များနှင့် စစ်ကောင်စီတို့ ယမန်နေ့က တိုက်ပွဲဆက်လက်ဖြစ်ပွားခဲ့ပြီး စစ်ကောင်စီတပ်ဘက်က သေဆုံးထိခိုက်မှုများ ရှိခဲ့ကြောင်း PNLA ပြောရေးဆိုခွင့်ရှိသူ ခွန်ရိန်းယံက ပြောသည်။
ဩဂုတ် ၆ရက်က ဆီဆိုင်မြို့နယ် လွယ်ထွယ်ရွာ အနီးတိုက်ပွဲဖြစ်ခဲ့ရာ စစ်ကောင်စီတပ် အလောင်း ၁၀လောင်းနှင့် လက်နက် ၁၀လက်၊ ဒရုန်း ၁စီး သိမ်းရခဲ့ပြီး ယမန်နေ့(ဩဂုတ် ၇ရက်) တိုက်ပွဲတွင်လည်း စစ်ကောင်စီတပ်က ၁၆ဦး ထက် မနည်းသေဆုံးခဲ့ခြင်းဖြစ်သည်ဟု ဆိုသည်။
Public Service Announcement
” မနေ့က တိုက်ပွဲဆက်ရှိပါတယ်။ တိုက်ပွဲပြင်းထန်တဲ့ အခြေအနေပါ။ စစ်ကောင်စီ အလောင်း ၁၆လောင်း ကျန်ရှိပါတယ်။ လက်နက်အချို့ သိမ်းဆည်းမိတာရှိပါတယ်။ စစ်ကောင်စီ အလောင်းတွေကို ကောင်းမွန်စွာ သင်္ဂြိုလ်ပေးခဲ့ပါတယ်”ဟု PNLA ပြောရေးဆိုခွင့်ရှိသူက ပြောသည်။
တိုက်ပွဲဖြစ်ပွားရခြင်း အကြောင်းအရင်းမှာ စစ်ကောင်စီတပ်ဘက်က စစ်ကြောင်းထိုးလှုပ်ရှားလာ၍ ဖြစ်သည်ဟု ဆိုသည်။
စစ်ကောင်စီနှင့် ပြည်သူ့စစ်ပူးပေါင်းအဖွဲ့ကလည်း လက်နက်ကြီးဖြင့် ရမ်းသမ်းပစ်ခတ်မှုများ ပြုလုပ်ခဲ့၍ အရပ်သား သေဆုံးထိခိုက်မှုများ ရှိခဲ့ကြောင်း PNLAက ထုတ်ပြန်ထားသည်။
စစ်ကောင်စီတပ်ဖွဲ့နှင့် စစ်ကောင်စီလက်အောက်ခံ ပြည်သူ့စစ်များသည် သြဂုတ် ၃ရက်မှစပြီး ဆီဆိုင်မြို့နယ်အတွင်းရှိ ပအိုဝ်းကျေးရွာ ပအိုဝ်းနယ်မြေအတွင်းသို့ လက်နက်ကြီးများ ပစ်ခတ်တိုက်ခိုက်မှုများ ပြုလုပ်နေခြင်းဖြစ်ကြောင်း၊ ထို့ကြောင့် ပြည်သူများသတိရှိရန် PNLAက တိုက်တွန်းထားသည်။
