ရဲခေါင်/People’s Spring
မွန်ပြည်နယ်၊ရေးမြို့နယ်၊ မြို့ဟောင်းကျေးရွာ တွင် တိုက်ပွဲဖြစ်ပြီး စစ်ကောင်စီတပ်မှ ခြောက်ဦးသေဆုံးကာ ရဲဘော်တစ်ဦးကျဆုံးကြောင်း မွန်ပြည်သစ်ပါတီ(AD)က ယနေ့ထုတ်ပြန်သည်။
ကမော့ကနင်ကျေးရွာ အခြေချ စစ်ကောင်စီတပ် ခလရ(၁၀၆) နှၚ့် ခမရ (၅၈၈)မှ အင်အား ၁၂၀ခန့်သည် မြို့ဟောင်းကျေးရွာသို့ ဝင်ရောက်လာပြီးနောက် ယမန်နေ့ ညနေ ၃ နာရီခန့်ကစ၍ တိုက်ပွဲ ဖြစ်ပွားခဲ့သည်ဟု ဆိုသည်။
Public Service Announcement
၆နာရီကျော်ကြာမြင့်ခဲ့သည့် တိုက်ပွဲအတွင်းစစ်ကောင်စီတပ်သား ခြောက်ဦးသေဆုံးပြီး ဒဏ်ရာအများအပြားရရှိကြောင်း ဖော်ပြထားသည်။
မွန်ပြည်သစ်ပါတီ(AD)၊ရေးမြို့နယ်ပြည်သူ့ကာကွယ် ရေးတပ်ဖွဲ့(YPDF)တို့ ပူးပေါင်း တိုက်ခိုက်မှုတွင် YPDF ရဲဘော်တစ်ဦးကျဆုံးခဲ့ကြောင်း အသိပေးသည်။
“ မနေ့က တစ်ညနေလုံးတိုက်ပွဲ ဖြစ်တယ်။ဒီနေ့ မနက် ပိုင်းတင် သူတို့(စကစ)ဘက်က မြို့ဟောင်းကနေ ဆုတ်သွားတယ်။ဘဲလမုရွာဘက် ရောက် နေတယ်လို့လည်းကြားတယ်” ဟု ဒေသခံစစ်ရေးသတင်းရင်းမြစ်က ပြောသည်။
စစ်ကောင်စီသည် သံဖြူဇရပ်-ရေး-ထားဝယ်လမ်းပိုင်း ပြန်လည်စိုးမိုးနိုင်ရေးအတွက် ဇူလိုင်ကစ၍ အင်အားဖြည့်တင်းပြီး စစ်ကြောင်းထိုးနေခြင်းဖြစ် သည်။
စစ်ကောင်စီစစ်ကြောင်းထိုးမှုနှင့် လက်နက်ကြီးပစ်ခတ်မှုများကြောင့် မွန်ပြည်နယ်အတွင်း ဒေသခံ ၃,၀၀၀ထက်မနည်း နေရပ်စွန့်ခွာ တိမ်းရှောင်နေရကြောင်း Rehmonnya Institude က ထုတ်ပြန်ထားသည်။
