မိထက်/People’s Spring
သီပေါမြို့တွင် ယမန်နေ့(ဩဂုတ်လ ၁၁ရက်)ညပိုင်းအထိတိုက်ပွဲပြင်းထန်ပြီး စစ်ကောင်စီတပ်ကလေကြောင်းတိုက်ခိုက်မှုများပြုလုပ်ခဲ့သော်လည်း ယနေ့နံနက်ပိုင်း အခြေအနေတည်ငြိမ်နေပြီး မြို့ခံအများအပြားသည် ကျောက်မဲမြို့ဘက်သို့ စစ်ဘေးတိမ်းရှောင်နေကြကြောင်းသတင်းရရှိသည်။
“စစ်တပ်က ညကအထိ လေယာဉ်နဲ့ ဗုံးကြဲခဲ့ပါတယ်။ မြို့ဘေးနားရွာတွေကိုကြဲတာပါ။ သီပေါမြို့ခံမဟုတ်တဲ့ အိမ်ငှားနေသူတချို့ သေဆုံးတာ ရှိပါတယ်။ သုံးဦးလို့ သိရပါတယ်” ဟု စစ်ဘေးတိမ်းရှောင်နေသည့်မြို့ခံတစ်ဦးကပြောသည်။
Public Service Announcement
စစ်ကောင်စီက ပစ်ခတ်သည့် လက်နက်ကြီးသည် သီပေါမြို့၊ မြို့လယ်ရပ်ရှိ အိမ်တစ်အိမ်ပေါ် ကျရောက်ပေါက်ကွဲပြီး မိသားစုဝင်၃ဦးသေဆုံးခဲ့ခြင်းဟုဆိုသည်။
သီပေါမြို့မှ ရဲစခန်း၊ ထွေအုပ်ရုံးအပါအဝင်စစ်ကောင်စီစခန်းများကို ဩဂုတ်လ၁၀ရက် နံနက်အစောပိုင်းမှစ၍ တအာင်းအမျိုးသားလွတ်မြောက်ရေးတပ်မတော်(TNLA)နှင့် မဟာမိတ်များကထိုးစစ်ဆင် တိုက်ခိုက်ခဲ့သည်။
တိုက်ပွဲအပြင်းအထန်ဖြစ်ပွားပြီးနောက် စစ်ကောင်စီတပ်ဖွဲ့ဝင်များသည်ခလရ(၂၃)၊ ခမရ (၅၀၃)၊ ခမရ(၅၀၄)အတွင်းသို့ ဆုတ်ခွာသွားခဲ့သည်။
ထို့နောက် လက်နက်ချရန် မဟာမိတ်ပူးပေါင်းတပ်ဖွဲ့များက ကမ်းလှမ်းခဲ့သည်။၇နာရီခန့်ကြာ ညှိနှိုင်းသော်လည်း အဆင်မပြေဘဲ သြဂုတ်တ် ၁၁ ရက် ည ၇နာရီခန့်တွင် တိုက်ပွဲများပြန်ဖြစ်ခဲ့သည်။မြို့၏ နေရာအများစုကို တော်လှန်ရေးတပ်များက ထိန်းချုပ်ထားကြောင်းသိရသည်။
ဩဂုတ်လ ၁၀ရက်က တိုက်ပွဲတွင် သီပေါထောင်ပွင့်သွားပြီးနိုင်ငံအကျဉ်းသား ၂၉ဦးအပါအဝင် အကျဉ်းသား ၁၀၉ ဦးကို တော်လှန်ရေးတပ်များက ကယ်ထုတ်ခဲ့သည်။တိုက်ပွဲပြင်းထန် နေစဉ် အကျဉ်းသားများသည် ကိုယ်နည်းကိုယ်ဟန်ဖြင့်ထောင်ဖောက်ထွက်ပြေးလာခြင်းဖြစ်ကြောင်းသိရသည်။
သီပေါတိုက်ပွဲသည် သုံးရက်ကြာလာပြီဖြစ်ပြီး တိုက်ပွဲအတွင်း ဒေသခံအချို့ သေဆုံးကြောင်းသတင်းရရှိသော်လည်း ဖုန်းလိုင်းဆက်သွယ်ရေးအခက်အခဲကြောင့် အသေးစိတ်အတည်ပြုနိုင်ခြင်းမရှိသေးပေ။
