မိထက်/People’s Spring
ရှမ်းပြည်နယ်မြောက်ပိုင်း၊ သီပေါမြို့တွင် ယနေ့(ဩဂုတ် ၁၄ရက်)နံနက်ကစ၍ တိုက်ပွဲ ပြင်းထန်နေပြီ စစ်ကောင်စီက လေကြောင်းမှတိုက်ခိုက်နေသည်။
” Y-12နဲ့ရော ဂျက်ဖိုက်တာနဲ့ပါ လေကြောင်းက ပစ်နေတာ။ ဗုံးတွေကြဲတယ်။ ရဲစခန်းပတ်ဝန်းကျင်ကို ပိုကြဲနေတယ်”ဟု သီပေါမြို့ခံတစ်ဦးက ပြောသည်။
Public Service Announcement
စစ်ကောင်စီ၏ လေကြောင်းတိုက်ခိုက်မှုအတွင်း အရပ်သားထိခိုက်မှုများရှိသော်လည်း ပြင်ပသို့ထွက်မရသည့် အရေးပေါ်အခြေအနေဖြစ်၍ အတ်ိအကျမသိရသေးကြောင်း မြို့ခံတစ်ဦးကပြောသည်။
သီပေါမြို့ရှိ ရဲစခန်း၊ မြို့နယ်အထွေထွေအုပ်ချုပ်ရေးမှူးရုံးအပါအဝင် စစ်ကောင်စီစခန်းများကို ဩဂုတ် ၁၀ရက် နံနက်အစောပိုင်းမှစ၍ တအာင်းအမျိုးသားလွတ်မြောက်ရေးတပ်မတော် (TNLA)နှင့် မဟာမိတ်များက တိုက်ခိုက်ခဲ့သည်။
တိုက်ပွဲအပြင်းအထန်ဖြစ်ပွားပြီးနောက် စစ်ကောင်စီတပ်ဖွဲ့ဝင်များသည် နေ့လယ်ပိုင်းတွင် ခလရ(၂၃)၊ ခမရ (၅၀၃)၊ ခမရ(၅၀၄)အတွင်းသို့ ဆုတ်ခွာသွားခဲ့သည်။
ထို့နောက် လက်နက်ချရန် မဟာမိတ်ပူးပေါင်းတပ်ဖွဲ့များက ကမ်းလှမ်းညှိနှိုင်းသော်လည်း အဆင်မပြေဘဲ ည ၇နာရီခန့်တွင် တိုက်ပွဲပြန်ဖြစ်ခဲ့သည်။
ဩဂုတ် ၁၀ရက်ကတိုက်ပွဲတွင် သီပေါအကျဉ်းထောင် ပွင့်သွားပြီး နိုင်ငံအကျဉ်းသား ၂၉ဦးအပါအဝင် အကျဉ်းသား ၁၀၉ ဦးကို မဟာမိတ်တပ်များက ကယ်ထုတ်ခဲ့သည်။
သီပေါတိုက်ပွဲသည် ငါးရက်ကြာလာပြီဖြစ်ပြီး တိုက်ပွဲအတွင်း ဒေသခံ ၁၅ဦးထက်မနည်း သေဆုံးကြောင်း သတင်းရရှိသော်လည်း ဖုန်းလိုင်းဆက်သွယ်ရေးအခက်အခဲကြောင့် အသေးစိတ်အတည်ပြုနိုင်ခြင်းမရှိသေးပေ။
