နောင်ချိုတွင် တိုက်ပွဲဆက်ဖြစ်၊ သီပေါတွင် စစ်ကောင်စီ လေကြောင်းတိုက်ခိုက်၍ အရပ်သားနှစ်ဦး ထပ်မံသေဆုံး

ဟန်နွေ/People’s Spring

တအာင်းတပ်မတော်(TNLA) သိမ်းပိုက်ထားသည့် နောင်ချိုမြို့နယ်တွင် ယနေ့ တိုက်ပွဲဆက်လက်ဖြစ်ပွားခဲ့ကြောင်း TNLA ပြောရေးဆိုခွင့်ရှိသူ လွေးယေဦးက ပြောသည်။

ဩဂုတ် ၂၀ရက် TNLA စစ်ရေးလှုပ်ရှားရာဒေသ တိုက်ပွဲဖြစ်ပွားမှု အခြေအနေကို မေးမြန်းရာ နောင်ချိုမြို့နယ် တောင်ခမ်းကျေးရွာအနီး တိုက်ပွဲဆက်ဖြစ်နေကြောင်း ၎င်းက ဆိုသည်။

ထို့ပြင် စစ်ကောင်စီတပ်က သီပေါမြို့နယ်ကို လေကြောင်း တိုက်ခိုက်ခဲ့၍ အရပ်သားသေဆုံးထိခိုက်မှု ဆက်လက်ဖြစ်ပေါ်ခဲ့ကြောင်း လွေးယေဦးက ပြောပြသည်။

Public Service Announcement

“သီပေါမှာ ဒီကနေ့နဲ့ မနေ့ကအချိန်ထိ တိုက်ပွဲဖြစ်ပွားတာမရှိဘူး။ စစ်ကောင်စီကအရပ်သားလူထုတွေကို ဦးတည်ပြီးတော့ လေကြောင်း၊ လက်နက်ကြီးတိုက်ခိုက်တာကြောင့် အရပ်သား ၂ဦးသေဆုံးခဲ့ပါတယ်” ဟု လွေးယေဦးက ပြောပြသည်။

သီပေါမြို့လေကြောင်း တိုက်ခိုက်မှု၊ လက်နက်ကြီးပစ်ခတ်မှုကြောင့် အရပ်သား ၂ဦးသေဆုံးကာ စက်သုံးဆီ သိုလှောင်ကန်မီးလောင်မှု ဖြစ်ခဲ့ကြောင်း TNLAက ယနေ့ မွန်းလွဲပိုင်း၌ သတင်းထုတ်ပြန်ထားသည်။

သြဂုတ် ၁၈ရက်တွင် သီပေါမြို့ရှိ စစ်ကောင်စီ၏ ခြေလျင်တပ်ရင်း-၂၃ အနီးရှိ နားမုံရပ်ကွက်၌ လေကြောင်းတိုက်ခိုက်ခဲ့၍ အမျိုးသား ၂ဦး သေဆုံးခဲ့ရသည်ဟု ဆိုသည်။

ယမန်နေ့တွင်လည်း သီပေါမြို့ ကျောက်စုရပ် ကွက်ရှိ AAAဆီသိုလှောင်ကန်အတွင်းသို့ စစ်ကောင်စီ၏ လက်နက်ကြီးကျ‌ရောက်ပေါက်ကွဲခဲ့၍ မီးလောင်မှု ဖြစ်ခဲ့ရာ TNLA ၏ သီပေါမြို့မီးသတ်တပ်ဖွဲ့နှင့် မြို့ခံပြည်သူလူထုများ အချိန်မှီဝိုင်းဝန်းမီးငြိမ်းသတ်နိုင်ခဲ့ဟု ဖော်ပြသည်။

ဩဂုတ် ၁၆ရက်ကလည်း သီပေါမြို့နယ် နမ့်လန် တွင် စစ်ကောင်စီမှ လေယာဉ်ဖြင့် လာရောက် ဗုံးကြဲချတိုက်ခိုက်မှုကြောင့် အမျိုးသမီး တစ်ဦး ထိမှန်ဒဏ်ရာရရှိပြီး နေအိမ် နှစ်လုံးပျက်စီးသွားခဲ့ကြောင်း ထုတ်ပြန်သည်။

TNLAသည် သီပေါမြို့သိမ်းတိုက်ပွဲဆင်နွှဲလျက်ရှိရာ မြို့ကို ထိန်းချုပ်ထားနိုင်ပြီး စစ်ကောင်စီ လက်ကျန် စခန်းအချို့ကို ဆက်လက်ထိုးစစ်ဆင်လျက်ရှိသည်။

သီပေါမြို့တိုက်ပွဲအတွင်း စစ်ကောင်စီ၏ လေကြောင်း၊ လက်နက်ကြီး တိုက်ခိုက်မှုကြောင့် အရပ်သား ထိခိုက်သေဆုံးမှုများရှိခဲ့ရာ သြဂုတ် ၁ရက်နေ့မှ ၁၉ရက်အထိ သေဆုံးသူအရပ်သား ၁၄ဦး ရှိပြီး ၄၂ဦး ဒဏ်ရာရခဲ့ဟု TNLAက ထုတ်ပြန်ထားသည်။