ရှမ်းပြည်နယ် မြောက်ပိုင်း သီပေါမြို့ပေါ်ကို စစ်ကောင်စီတပိက ယနေ့(ဩဂုတ်လ ၂၇ရက်) နံနက် ၁ နာရီခန့်မှ ၂ နာရီခန့်အတွင်း Y12 လေယာဉ်ဖြင့် ဗုံးအလုံးရေ ၅၀ ထက်မနည်း ကြဲချခဲ့ရာ ဒေသခံပြည်သူ နှစ်ဦး ထပ်မံသေဆုံးခဲ့သည်။
သီပေါမြို့အုတ်ကျင်းရပ်ကွက်အပါအဝင် မြို့ပေါ်နေရာများကို ဗုံးကြဲချတိုက်ခိုက်ခြင်းဟု ဒေသခံများကပြောသည်။
အဆိုပါတိုက်ခိုက်မှုကြောင့် အုတ်ကျင်းရပ်ကွက်အတွင်း နေအိမ်အချို့ ပျက်စီးခဲ့ပြီး အမျိုးသားနှစ်ဦးသေဆုံးသွားကြောင်း ဒေသခံများကပြောသည်။
Public Service Announcement
ထိုအပြင် ဩဂုတ်လ ၂၅ရက်နှင့် ၂၆ရက်ကလည်း သီပေါမြို့ဘုရားကြီးကုန်းပေါ်နှင့် အနောက်ရပ်ဘက်သို့ စစ်ကောင်စီက လက်နက်ကြီးဖြင့်ပစ်ခတ်ရာ အရပ်သား နှစ်ဦး သေဆုံးခဲ့သေးသည်။
” သီပေါက စစ်တပ်ကမြို့ထဲကိုတည်ပြီးပစ်နေတာမို့လို့ မနေသင့်တော့ဘူးလို့ထင်တယ်။လတ်တလောမှာ ရှောင်ထားသင့်တယ်” ဟု စစ်ဘေး ရှောင်လာခဲ့သည့် သီပေါမြို့ခံတဦးကပြောသည်။
သီပေါမြို့ရှိ စစ်ကောင်စီစခန်းများကို တအာင်းအမျိုးသားလွတ်မြောက်ရေးတပ်မတော်(TNLA)နှင့် မဟာမိတ်များက ဩဂုတ်လ၁၀ ရက် နံနက်အစောပိုင်းမှစ၍ ထိုးစစ်ဆင် တိုက်ခိုက်ခဲ့သည်။ မြို့မရဲစခန်း၊ ထွေအုပ်ရုံးမှ စစ်ကောင်စီတပ်များထွက်ပြေးသွားပြီး ခလရ(၂၃)၊ ခမရ (၅၀၃)၊ ခမရ(၅၀၄)အတွင်းသို့ ဆုတ်ခွာသွားသည်။
ထိုကြောင့် သီပေါမြို့ပေါ်ကို TNLA ကသိမ်းပိုက်ထားပြီး မြို့ ပြင်ရှိ ခလရ(၂၃)၊ ခမရ (၅၀၃)၊ ခမရ(၅၀၄) တို့ကို TNLA က ပိတ်ဆို့ထားပြီး ရိက္ခာဖြတ်တောက်ထားသည်။
သီပေါမြို့ကို TNLA က အုပ်ချုပ်ရေးယန္တရားလည်ပတ်ရေးကြိုးစားနေချိန်တွင် စစ်ကောင်စီတပ်က ကုန်းကြောင်းက မလာနိုင်တော့ဘဲလေကြောင်းဖြင့်သာ လာရောက်တိုက်ခိုက်နေခြင်းဖြစ်သည်။သီပေါမြို့ကို TNLA က အရေးပေါ်ကာလအခြေအနေ ကြေငြာထားပြီး ညမထွက်ရ အမိန့်လည်း ထုတ်ပြန်ထားသည်။
သီပေါမြို့ပေါ်မှ စစ်ဘေးရှောင်များကို မြို့ခံလူမှုကူညီအဖွဲ့များက ဆန်လှူရန် ယနေ့စီစဉ်ထားပြီး စစ်ကောင်စီ၏လေကြောင်းတိုက်ခိုက်မှုများကြောင့် အစီအစဉ်ဖျက်သိမ်းထားရကြောင်း မြို့ခံအချို့ကပြောသည်။
“ဆန်လာလှူမယ်ထင်တာ။ အခုက လေကြောင်းကိုစိုးရိမ်နေရတော့ ဘယ်သူမှလည်းမထွက်ရဲကြတော့ဘူး။ ဆန်မရရင် စားစရာမရှိတဲ့သူတွေအများကြီးပဲ” ဟု ဒေသခံတစ်ဦးကပြောသည်။
သီပေါမြို့နယ်အတွင်း စစ်ကောင်စီကအရပ်သားများရှိရာသို့ ဦးတည်ပြီး လေကြောင်းနှင့် လက်နက်ကြီး ပစ်ခတ်နေကြောင်းနှင့် ဩဂုတ်လ ၁ရက်နေ့မှ ၂၆ ရက်နေ့အထိ အရပ်သား ၂၁ ဦး သေဆုံးပြီး ၅၉ ဦး ဒဏ်ရာရရှိခဲ့သည်။
