မန္တလေးမြို့လယ်ရှိ MAI ရုံးခွဲ စပိတ်

အင်ကြင်း၊​စော​နွေဦး /People’s Spring

မန္တလေးမြို့လယ်၌ ဖွင့်လှစ်ထားသည့် MAI ရုံးခွဲ စက်တင်ဘာ ၁ ရက်နေ့မှစတင်၍ ပိတ်သိမ်းထားကြောင်း သတင်းရရှိသည်။

မန္တလေးမြို့လယ်၊ ချမ်းအေးသာစံမြို့နယ်၊ ၇၈လမ်း၊ ၂၉လမ်းနှင့် လမ်း၃၀ကြား၊ ဟေမာဇလရပ်၌ ဖွင့်လှစ်ထားသော MAI လေကြောင်းရုံးခွဲအား စက်တင်ဘာ ၁ ရက်မှစတင်၍ ပိတ်သိမ်းထားမည်ဟု MAI လုပ်ငန်းက ကြိုတင်အသိပေး​ကြေညာခဲ့သည်။ ထိုရုံးခွဲကို ၂၀၁၉ သြဂုတ် ၇ ရက်စတင်ဖွင့်လှစ်ခဲ့ခြင်းဖြစ်သည်။

Public Service Announcement

မန္တလေးမြို့တိုက်ပွဲများနီးကပ်လာ၍ MAI ရုံးခန်းပိတ်သိမ်းခြင်းဖြစ်မည်ဟု မြို့ခံများက ယူဆ​နေကြသည်။

“သူတို့နေရာက တပ်နဲ့လည်းနီးတော့ ပိတ်လိုက်တာဖြစ်မယ်။”ဟု မန္တလေးမြို့ခံတစ်ဦးက ပြောသည်။

သို့သော် အွန်လိုင်းအရောင်းများနှင့် ကိုယ်စားလှယ်များကြောင့် မန္တလေး ရုံးခွဲ ပိတ်သိမ်းရန် ဆုံးဖြတ်လိုက်ခြင်းဖြစ်ပြီး ဆိုရှယ်မီဒီယာတွင် ပျံ့နှံ့နေသကဲ့သို့ လုံးဝမဟုတ်ဟု MAI က ငြင်းဆိုသည်။

လူမှုကွန်ယက်မီဒီယာများတွင် မန္တ​လေးမြို့၌ တိုက်ပွဲများဖြစ်လာနိုင်၍ ပိတ်ခြင်းဖြစ်မည်ဟု​ပြောနေကြခြင်းဖြစ်သည်။

ရုံးခွဲပိတ်လိုက်သော်လည်း လက်ရှိတွင် MAI လေယာဥ်လက်မှတ်များအား ပုံမှန်အတိုင်း ရောင်းချပေးနေဆဲဖြစ်ကြောင်း မန္တလေးမြို့မှ လေယာဥ်လက်မှတ်အရောင်းကိုယ်စားလှယ်အချို့က ပြောသည်။

MAIသည် မန္တလေးအပြည်ပြည်ဆိုင်ရာ လေဆိပ်တွင်မူ လက်မှတ်ရောင်းချရေးရုံးကို ပုံမှန်အတိုင်း ဆောင်ရွက်ပေးသွားမည်ဟု ဆိုပြန်သည်။

လေကြောင်းလိုင်း ရုံးခွဲမှ ဝန်ထမ်းများက မနေရဲတော့သဖြင့်ရုံး ပိတ်လိုက်ခြင်းဖြစ်ပြီးလေကြောင်းလိုင်းမှာ ဆက်လက်ပျံသန်းပြေးဆွဲနေဆဲဖြစ်​ကြောင်း လေကြောင်းလိုင်း People’s Spring ကစုံစမ်းသိရသည်။

MAI ​လေ​ကြောင်းလိုင်းနှင့် Air KBZ ​လေ​ကြောင်းလိုင်းတို့သည် ခရိုနီ ဦး​အောင်ကိုဝင်း၏ က​မ္ဘောဇကုမ္ပဏီအုပ်စုက ပိုင်ဆိုင်ပြီး ၊ ထို​လေ​ကြောင်းလိုင်းနှစ်လိုင်း၏ စီမံခန့်ခွဲမှု ကို အခြားခရိုနီတဦးဖြစ်​​သော ဦး​အောင်​အောင်​ဇော် ၏ 24 Hour Group က လုပ်ကိုင်​နေခြင်းဖြစ်သည်။စစ်အုပ်စုအတွက် ATR ​လေ​ယာဥ်များပျံသန်းနိုင်ရန် ကူညီ​ပေး​နေ​သော ပြည်တွင်းနှင့် နိုင်ငံတကာကုမ္ပဏီများတွင် 24 Hour Group လည်းပါဝင်ပြီး နိုင်ငံတကာက ဒဏ်ခပ်အ​ရေးယူရန် Justice For Myanmar (JFM)က သြဂုတ် ၂၉ ရက်တွင်ထုတ်ပြန်ထားသည်။

မန္တလေးမြို့သည် တိုက်ပွဲများနှင့်နီးကပ်လာပြီး မန္တလေးစည်ပင်နယ်နမိတ်ဖြစ်သည့် ပုသိမ်ကြီးမြို့နယ်၌ပင် တိုက်ပွဲများမကြာခဏဖြစ်ပွားခဲ့သည်။ ပြည်သူ့ကာကွယ်​​ရေးတပ်မ​တော် (မန္တလေး) က မန္တလေးတိုင်း၊စဥ့်ကူးမြို့နယ်တစ်မြို့နယ်လုံး၊ သပိတ်ကျင်းမြို့နယ်အတွင်း စစ်ကောင်စီတပ်စခန်း ၁၀ ခုထက်မနည်း သိမ်းပိုက်ထားသည့်အပြင် မန္တလေးနှင့်အနီးဆုံး မတ္တရာမြို့နယ်အတွင်း၌ တပ်စခန်း ၃၅ ခုအား သိမ်းပိုက်ထားသည်။

ထို့အပြင် မန္တလေးနှင့် နေပြည်တော်ခရီး အလှမ်းမဝေးတော့ဟု မန္တလေး PDF သတိပေးထားသည်။

သြဂုတ်လ နောက်ဆုံးပတ်အတွင်း အာဏာသိမ်းစစ်ခေါင်းဆောင်မန္တလေးမြို့သို့လာရောက်စဥ် ၎င်းအောက်ခံခရိုင်အဆင့်ဝန်ထမ်းများအား လုံခြုံရေးသတိပြုရန် မှာကြားသွားခဲ့သည်။