မိထက်/People’s Spring
ရှမ်းပြည်နယ်မြောက်ပိုင်း နောင်ချိုမြို့နယ်ရှိ ရွှေမုဌောကျေးရွာကို ယမန်နေ့ညက စစ်ကောင်စီလေကြောင်းမှ နှစ်ကြိမ်ဗုံးကြဲတိုက်ခိုက်ရာ ကလေးငယ်တစ်ဦး သေဆုံးပြီး နေအိမ်အများအပြား ပျက်စီးခဲ့ရသည်။
ရွှေမုဌောရွာကို ယနေ့(စက်တင်ဘာ ၆ရက်) နံနက် ၁နာရီခန့်နှင့် နံနက် ၅နာရီခန့်တွင် လေကြောင်းမှဗုံးအလုံး၂၀ကျော်ကြဲချတိုက်ခိုက်သွားခြင်းဟု ဒေသခံတစ်ဦးက ပြောသည်။
Public Service Announcement
” ပြီးခဲ့တဲ့လတွေက ရွာနားမှာတိုက်ပွဲဖြစ်တော့ ဒေသခံတွေရှောင်ခဲ့ကြရတယ်။ ဒီရက်ပိုင်းမှာ တိုက်ပွဲမရှိတော့လို့ ပြန်ဝင်နေကြတာ။ TNLAလည်း ရှိမနေဘူး။ ဒါကို လေကြောင်းကနေလာပစ်တာ”ဟု ဒေသခံတစ်ဦးက ပြောသည်။
လေကြောင်းတိုက်ခိုက်မှုကြောင့် အသက်(၁၃)နှစ် အရွယ်ကလေးငယ်တစ်ဦး သေဆုံးပြီး ယင်းကလေးငယ်ဖခင်ဖြစ်သူလည်း ဒဏ်ရာရရှိခဲ့သည်။
ယခုအခါ ဒေသခံများသည် နောက်တစ်ကြိမ်ထပ်မံ၍ စစ်ဘေးတိမ်းရှောင်နေကြရကြောင်းသတင်းရရှိသည်။
တအာင်းတပ်မတော်(TNLA)နှင့် ပူးပေါင်းတပ် များသည် နောင်ချိုမြို့နယ် တောင်ခမ်းကျေးရွာရှိ အမြောက်တပ်ရင်းများသာ ထိုးစစ်ဆင်တိုက်ခိုက်နေခြင်းဖြစ်ပြီး ရွှေမုဌောကျေးရွာ၌ စစ်ရေးလှုပ်ရှားမှုမရှိကြောင်း PDFနှင့်နီးစပ်သူတစ်ဦးက ပြောသည်။
စက်တင်ဘာ ၄ရက်ကလည်း တောင်ခမ်းအနီးရှိ မဲပုတ်ကျေးရွာအား စစ်ကောင်စီက လေကြောင်းတိုက်ခိုက်ရာ နေအိမ်အများအပြား ပျက်စီးခဲ့သည်။
“စကစက တောင်ခမ်းနားက ရွာတွေကို လေကြောင်းရော လက်နက်ကြီးရော ပစ်နေတာ။ အဲနားကရွာဒေသခံတွေ အတော်လေး ထိတယ်ပြောတယ်။ ဒလန်ကြောင့် အသတ်ခံရတာရော။ ဆုံးရှုံးမှုက တခြားမြို့သိမ်းတာထက် တောင်ခမ်းက ပိုပေးဆပ်ရတယ်ကြားတယ်”ဟု နောင်ချိုမြို့ဒေသခံတစ်ဦးက ပြောသည်။
စစ်ကောင်စီသည် TNLA ထိန်းချုပ်ထားသည့် နမ့်ခမ်းမြို့ကို ယနေ့နံနက်အစောပိုင်းတွင် လေကြောင်းမှ တိုက်ခိုက်ရာ ကလေးငယ် ၂ဦး၊ အမျိုးသမီး ၄ဦး အပါအဝင် ၁၁ဦးသေဆုံးပြီး ၁၁ ဦး ဒဏ်ရာရခဲ့သည်။
စစ်ကောင်စီတပ်သည် TNLAအုပ်ချုပ်နေသည့် မြို့များဖြစ်သည့် ကွတ်ခိုင်၊ နမ့်ဆန်၊ မန်တုံ၊သီပေါ၊ ကျောက်မဲ၊နောင်ချိုနှင့် နမ့်ခမ်းမြို့တို့၌ အရပ်သားပစ်မှတ်များဦးတည်ကာ လူအများအပြားသေစေနိုင်သည့် ပေါင်(၅၀၀)ဗုံးများဖြင့် တိုက်ခိုက်မှုများ လုပ်ဆောင်ကာ စစ်ရာဇဝတ်မှုကို ပြောင်ပြောင် တင်းတင်းချိုးဖောက်နေခြင်းဖြစ်ကြောင်းလည်း TNLAက ထုတ်ပြန် ထားသည်။
