ဟာနာဆန်/People’s Spring
မကွေးတိုင်း၊ မြိုင်မြို့ပေါ်ရှိ စစ်ကောင်စီတပ်စွဲရာနေရာများနှင့် ဂိတ်များအား ဒေသတွင်း PDFတပ်ဖွဲ့များက တပြိုင်နက်ဝင်ရောက်တိုက်ခိုက်ခဲ့ရာ ရုံးအချို့ မီးလောင်ပျက်စီးခဲ့ကြောင်း သတင်းရရှိသည်။
ယမန်နေ့(စက်တင်ဘာ ၇ ရက်) နံနက် ၇နာရီခန့်က မြိုင်မြို့ရှိ စည်ပင်သာယာရေးရုံး၊ တရားရုံး၊ ပညာရေးမှူးရုံးနှင့် ပြည်ခိုင်ဖြိုးပါတီရုံးများအား သွားရောက်ပစ်ခတ်တိုက်ခိုက်ခဲ့ကြောင်း မြိုင်မြို့နယ်ပြည်သူ့ကာကွယ်ရေးအဖွဲ့(ပကဖ)ခေါင်းဆောင် ကိုလက်ယျာက ပြောသည်။
Public Service Announcement
ထို့အပြင် မြိုင်မြို့အရှေ့ဘက် မြို့အဝင်ဂိတ်ကိုလည်း ပစ်ခတ်တိုက်ခိုက်ရာဘန်ကာအနီးရှိ နှစ်ထပ်တိုက်အား သိမ်းနိုင်ခဲ့ကြောင်း၊ သို့သော်လည်း ခဲယမ်းအင်အားနည်းလာ၍ ပြန်လည်ဆုတ်ခွာခဲ့ရကြောင်း ဒေသကာကွယ်ရေးအဖွဲ့များက ပြောသည်။
“မြို့ထဲ အထိရောက်တယ်။ ကိုယ့်လူတွေထိခိုက်မှာစိုးတာနဲ့ တပ်ခေါက်ဖို့အမိန့်ပေးလိုက်တာ။”ဟု ကိုလက်ယျာက ပြောသည်။
ထို့အပြင် မြိုင်မြို့ရှိ စစ်ကောင်စီရုံးအချို့ကိုလည်း မီးရှို့ဖျက်ဆီးနိုင်ခဲ့သည်ဟု ဆိုသည်။
အဆိုပါတိုက်ခိုက်မှုအား မြိုင်ပကဖ၊ 8+အညာမြေစစ်ဆင်ရေးအဖွဲ့၊ M.V.P Revolution Force မုံရွာခရိုင်ရင်း (၂၇)တပ်ခွဲ -၃သိန်းငှက်၊ အညာမြေတပ်ပေါင်းစု၊ ဆင်ရိုင်းရာဇာ၊ Gd of Myaing ရင်း (၁၆)ခွဲ-၃၊ Anya Myayguerilla Force Myaing၊ Corba People Diffence Force ကိုမုဆိုးအဖွဲ့၊ PKU Underground Force၊ တမာမြေပြောက်ကျားတပ်ဖွဲ့ – မြိုင် ဓာမင်းကြီး ဂဋ္ဌုန်တပ်ရင်း (၁)တပ်ခွဲ-၂ မြိုင်နယ် Droneအဖွဲ့များ ပူးပေါင်းတိုက်ခိုက်ခဲ့ခြင်းဖြစ်သည်။
ထို့အပြင် သြဂုတ် ၇ ရက်နှင့် ၈ ရက်ကလည်း ပခုက္ကူခရိုင်၊ မြိုင်မြို့နယ်အတွင်းရှိ ကိုင်းတောမရဲစခန်းနှင့် ဝက်ပုတ်ပျူစောထီးစခန်းများအား တော်လှန်ရေးတပ်များ သိမ်းပိုက်နိုင်ခဲ့သည်။
အထိနာနေသော စစ်ကောင်စီတပ်က စက်တင်ဘာ ၆ ရက်တွင် မြိုင်မြို့နယ်ရှိ လက်ယက်မကျေးရွာစာသင်ကျောင်းကို လေကြောင်းမှ ဗုံးကြဲတိုက်ခိုက်ခဲ့ရာ ဒေသခံပြည်သူ ၆ ဦးသေဆုံးခဲ့ပြီး သုံးဦး ပြင်းထန်ဒဏ်ရာများ ရရှိခဲ့သည်။
