စောနွေဦး/People’s Spring
ဂန့်ဂေါမြို့နယ်၊ ကျောတိုက်နယ်ရှိရေနံ နှင့်သဘာဝဓာတ်ငွေ့လုပ်ငန်း(MOGE)ပိုင်ရေနံမြေကို စစ်ကောင်စီက မြေပြင်နှင့်ဝေဟင်တို့မှ ထိုးစစ်ဆင်နေသဖြင့် တပ်စွဲထားသည့် ကာကွယ်ရေးတပ်များ စခန်းစွန့်ပေးခဲ့ရသည်ဟု ဒေသခံကာကွယ်ရေးတပ်များထံမှသိရသည်။
ကျောတိုက်နယ်အတွင်းရှိ MOGE ရေနံမှော်ကင်းစခန်း ( Wall-1 ထုတ်လုပ်ရေးစခန်း)နှင့် ရေနံကျင်းကင်းစခန်းကို ကာကွယ်ရေးတပ်များက ဩဂုတ် ၁၅ရက်တွင် တိုက်ခိုက်သိမ်းယူခဲ့သည်။
Public Service Announcement
သို့သော်ရေနံမြေကို စက်တင်ဘာ ၅ ရက်တွင် စစ်ကောင်စီကအင်အားအလုံးအရင်းဖြင့် ကြည်းတပ်၊လေတပ် အသုံးပြုထိုးစစ်ဆင်ခဲ့ခြင်းဖြစ်သည်ဟု ကာကွယ်ရေးတပ်ဖွဲ့ဝင်တစ်ဦးကပြောသည်။
“အခုတော့ ကျောတိုက်နယ်မှာလူတွေအကုန်ရှောင်နေကြရတယ်။လေကြောင်းဗုံးကျဲတာကော မြေပြင်တိုက်ပွဲက လက်နက်ကြီးတွေကြောက်လို့ ရှောင်နေကြရတယ်”ဟု ဒေသခံတစ်ဦးကပြောသည်။
ကျော ကပစ( စစ်ကောင်စီကာကွယ်ရေးပစ္စည်းထုတ်စက်ရုံ)က အင်အား ၁၅၀ဖြင့် စစ်ကောင်စီက စစ်ကြောင်းလေးကြောင်းခွဲကာထိုးစစ်ဆင်ပြီး Mi35ဖြင့် လေကြောင်းမှပစ်ကူပေးခဲ့သည်ဟု ၎င်းကဆက်ပြောသည်။
ကာကွယ်ရေးတပ်များက ကျော MOGEရေနံမြေကင်းစခန်းကို တိုက်ခိုက်သိမ်းပိုက်ခဲ့စဉ်က စစ်ကောင်စီတပ်မှ ကပစ-၂၃ မှ ဗိုလ်ကြီး သော်ဇင်အောင် နှင့် ဒု-ရဲအုပ် ကိုကိုအောင်အပါအဝင် ၁၂ဦးသေဆုံးပြီး ၁၂ ဦးကို အရှင်ဖမ်းဆီးခဲ့သည်။ လက်နက်မျိုးစုံ ၃၀လက်နှင့် ကျည်များသိမ်းစည်းရရှိခဲ့သည်။ ထိုစစ်ဆင်ရေးကို ဂန့်ဂေါခရိုင် ကွပ်ကဲရေးရုံး ကွပ်ကဲမှုဖြင့် ဂန့်ဂေါခရိုင် တပ်ရင်း (၁၊ ၇၊ ၁၁၊ ၁၂၊ ၁၄၊ ၁၉)၊ ABSDF၊ KKG တပ်ရင်း (၄၊ ၅၊ ၆)၊ ဂန့်ဂေါခရိုင် ဒရုန်းတပ်ဖွဲ့ (Hyper UAV Force) နှင့် ကျောတိုက်နယ် ပကဖ ပူးပေါင်းအဖွဲ့တို့မှပူးပေါင်း တိုက်ခိုက် ခဲ့ခြင်းဖြစ်ကြောင်း အမှတ် (၁)စစ်ဒေသကထုတ်ပြန်သည်။ ထိုတိုက်ပွဲတွင် တော်လှန်ရေးတပ်မှ တစ်ဦးကျဆုံးခဲ့သည်။
