နိုင်ပကောင်း/People’s Spring
ကရင်ပြည်နယ်ထဲကို စစ်ကောင်စီက တပ်အင်အားဖြည့်တင်းရာမှာ စစ်မှုထမ်းသင်တန်းဆင်း တပ်သား သစ်တွေ အများအပြားရောက်ရှိလာတယ်လို့ မြေပြင်မှာရှိတဲ့ ကရင်စစ်ရေး သတင်းရင်းမြစ်ထံကသိရပါတယ်။
KNU တပ်မဟာ (၆) နဲ့ တပ်မဟာ (၇) နယ်မြေတွေ ဖြစ်တဲ့ ကော့ကရိတ်၊ ကျုံဒိုး၊ နဘူးကျေးရွာတွေ ဘက်ဆီ အခုရက်ပိုင်းမှာ စစ်ကောင်စီတပ်က ယာဉ်တန်းတွေနဲ့ အင်အားဖြည့်နေတာလို့ မြေပြင်မှာရှိနေတဲ့ အဲဒီ သတင်းရင်းမြစ်က အသိပေးပါတယ်။
Public Service Announcement
“ကားတန်းတွေနဲ့ အများကြီးရောက်လာတယ်၊ ကားထဲမှာ (အင်အား)အပြည့်ပဲ” လို့ မြေပြင်သတင်းရင်းမြစ်က ပြောပါတယ်။
လက်ရှိမှာလည်း KNU တပ်မဟာ (၇) နယ်မြေ ၊ ကော့ကရိတ်မြို့ မြောက်ပိုင်း ၊ မြပတိုင်ကျေးရွာ မှာ KNU ပူးပေါင်းတပ်နဲ့ စစ်ကောင်စီတပ်တို့ကြား နှစ်ဖက် စစ်ရေးတင်းမာနေတာပါ။
ဒါအပြင် KNU တပ်မဟာ (၆) နယ်မြေ ၊ မြဝတီမြို့နယ် ၊လေးကေ့ကော်မြို့သစ်အနီးက အမြှောက်ကုန်းကိုလည်းအပြီးသတ်သိမ်းဖို့ KNUပူးပေါင်းတပ်က တိုက်ခိုက်နေချိန်လည်းဖြစ်ပါတယ်။
ဒီလိုအခြေအနေမှာ စစ်ကောင်စီတပ်က စစ်သင်တန်း ၃ လဆင်း စစ်မှုထမ်း တပ်သားသစ်တွေကိုကရင်ပြည်နယ် စစ်မြေပြင်ဆီ စေလွှတ်လာတာလည်းဖြစ်ပါတယ်။
စစ်ကောင်စီဟာ အခုနှစ် ဖေဖော်ဝါရီလကစပြီး စစ်မှုထမ်း အင်အားစုဆောင်းတွေကိုလုပ်ဆောင်ခဲ့ရာမှာ လက်ရှိ မှာအပတ်စဉ် (၅) ကိုရောက်ရှိနေပါပြီ။
အပတ်စဉ်တစ်ခုကို အင်အား ငါးထောင်ခန့် စုဆောင်းတာကြောင့် လက်ရှိမှာ စစ်ကောင်စီဟာတပ်သားသစ် အင်အားခန့်မှန်းခြေနှစ်သောင်းခွဲ နီးပါး စုဆောင်းရရှိထားပြီးပြီလည်းဖြစ်ပါတယ်။
