အင်ကြင်း/People’s Spring
မန္တလေးမြို့ရှိ မြို့နယ်ခြောက်ခုတွင် စစ်ကောင်စီက လမ်းဘေးစျေးသည်များအား စတင်ရှင်းလင်းနေကြောင်း မြို့ခံများက ပြောသည်။
မန္တလေးမြို့ သန့်ရှင်းသာယာလှပရေးစီမံချက်ဟုဆိုကာ ပုသိမ်ကြီးမြို့နယ်မှလွဲ၍ ကျန် မြို့နယ်ခုခြောက်ရှိ လမ်းဘေးစျေးသည်များအား စစ်ကောင်စီလက်အောက်ခံ စည်ပင်ဌာနက ရှင်းလင်းနေခြင်းဖြစ်ကြောင်း စည်ပင်နှင့်နီးစပ်သူများက ပြောသည်။
“အကုန်မထွက်ရဘူးဆိုပြီး လာပြောသွားတယ်။ တချိ့စျေးသည်တွေ လက်မှတ်ပါထိုးပေးရတယ်။ စျေးသည်တွေ အကုန်ဆိုင်ပိတ်ထားရတယ်။ တော်တော်ဒုက္ခရောက်တယ်။”ဟု အမရပူရမြို့နယ်ရှိ လမ်းဘေးစျေးသည်တစ်ဦးက ပြောသည်။
Public Service Announcement
လမ်းဘေးဖွင့်လှစ်ထားသော အသေးစား အသုပ်ဆိုင်၊ ကွမ်းယာဆိုင်၊ပန်းဆိုင်၊ အကြော်ဆိုင်၊ အအေးဆိုင်၊ လက်ဖက်ရည်ဆိုင် အစရှိသည့်ဆိုင်အများအပြား ပိတ်သိမ်းထားရပြီး အခက်အခဲများတွေ့နေရကြောင်း လမ်းဘေးစျေးသည်များက ပြောသည်။
“တစ်ပတ်လို့ ပြောတာပဲ။ တစ်ပတ်ကျော်ရင်တော့ ပြန်ဖွင့်လို့ရမလားမသိဘူး။”ဟု လမ်းဘေးအသုပ်ဆိုင်ရှင်တစ်ဦးက ဆိုသည်။
အဆိုပါ စီမံချက်အား စစ်ကောင်စီ၏ စည်ပင်သာယာရေးကော်မတီရှိ လမ်းတံတား၊ သန့်ရှင်းရေး၊ အခွန်၊ ပန်းဥယျာဥ် ဌာနလေးခုပေါင်းပြီး လမ်းဘေးစျေးသည်များတင်မက မီးပွိုင့်၌ ပန်းရောင်းသူများပါအကျန် ရှင်းလင်းမည်ဖြစ်ကြောင်း၊ ထိုအစီအစဉ်အား စည်ပင်အတွင်းရေးမှူးက အင်္ဂါနေ့တိုင်း လှည့်ပတ်ကြည့်မည်ဖြစ်ကြောင်း 𝑴𝑫𝒀 𝑹𝒆𝒗𝒐𝒍𝒖𝒕𝒊𝒐𝒏က ရေးသားသည်။
အာဏာသိမ်းစစ်ကောင်စီအဖွဲ့သည် ယခင်ကလည်း ၎င်းတို့၏ စစ်ကောင်စီလူကြီးများ နယ်လှည့်ခရီးစဥ်ရှိပါက လမ်းဘေးစျေးသည်များအား စီမံချက်ဖြင့် ရှင်းလင်းလေ့ရှိသည်။
